လေအေးပေးစက်မှ အအေးဓာတ်တစ်ချို့က ခန္ဓာကိုယ်တစ်ခုလုံးဆီသို့ လာရောက်ရိုက်ခတ်သည် ။ စောင်ထူထူထဲတွင်နစ်မြုပ်နေ၍သာ တော်သေးတော့သည် ။ အကြောင်းအရာတစ်ချို့က မှတ်ဉာဏ်ထဲသို့ အစီအရီတိုးဝင်လာသည် ။ အလန့်တကြားဖြင့် ထထိုင်လိုက်တော့ ခါးအောက်ပိုင်းမှ နာကျင်မှုကြောင့် အိပ်မက်မဟုတ်မှန်း သုံးသပ်လိုက်မိသည် ။
ဘေးဘီဝဲယာတွင်မူ သူမနှင့်တူသည့် ဆံချည်မျှင်လေးတောင် မတွေ့ရ ။ နှိုင်း၏ ခန္ဓာကိုယ်ပေါ်မှ ဖရိုဖရဲအဝတ်အစားများအရ သူမဝတ်ပေးသွားမှန်း သိလိုက်သည် ။
လမ်းပင်မလျောက်ချင်သော်လည်း အိမ်ထဲတွင် သူမကို ပတ်ရှာရဦးမည်ဖြစ်သည် ။ နာကျင်နေသော ခါးအောက်ပိုင်းကို မသိကျိုးကျွံပြုကာ အခန်းအပြင်သို့ထွက်လာခဲ့လိုက်သည် ။
" နိုးပြီလား ၊ ရေခဲသေတ္တာထဲမှာ ဘာမှ ထွေထွေထူးထူးမတွေ့လို့ ပေါင်မုန့်ကြက်ဥကြော်ပဲ လုပ်ထားပေးတယ် ။ လာစားတော့ "
" မူးနေလို့ အသိစိတ်လွတ်သွားတာ "
" အဲ့လို သတ်မှတ်ပေးမယ် ။ ဘာမှ မဖြစ်ခဲ့ဘူးလို့ မှတ်လိုက် "
ဖန်ခွက်ထဲသို့ ကြိုပြီးသား နွားနို့များကို လောင်းထည့်နေသော လက်များ ရပ်တန့်သွားသည် ။
" ဒါပေမယ့် ဘယ်လိုလုပ်မလဲ ၊ ညီမက အကုန်မှတ်မိနေတယ် "
" လွန်းဟေမာန်ငယ် ! "
" ဒေါက်တာနှိုင်းမခရဲ့ ခန္ဓာကိုယ်အချိုးအစားက စပြီး အသက်ရှူသံတွေအထိလေ ၊ ဒီမှာကြည့် အစ်မကိုက်ထားလို့ သွေးတောင် စို့တယ် "
စိတ်လွတ်သွားသလား စိတ်လိုလက်ရလား နှိုင်းကိုယ်တိုင်လည်း ဝေခွဲမရတော့ပါ ။ လွန်း၏ နှုတ်ခမ်းထောင့်မှ ပေါက်ပြဲဒဏ်ရာအသေးစားကလည်း နှိုင်းကြောင့် ရခဲ့သည်မှာ လွဲနေလိမ့်မည် မဟုတ်ပါချေ ။ လွန်း၏ လည်တိုင်များကို အားကိုးတကြီး ဖက်တွယ်ထားမိသော ပူနွေးမှုကိုလည်း မှတ်မိနေပါသေးသည် ။
" ဘာပဲ ဖြစ်ဖြစ် အစ်မ ညီမကို ယူမှရတော့မယ် "
" ငါက ဘာလို့ __ "
" သွေးဆောင်ဖျားယောင်းမှုလေ "
" ဘာပြောတယ် !! "
YOU ARE READING
Once Upon On Us
Romanceတိမ်ဆိုင်တစ်ခုကို ချစ်မိသည် ။ ဖမ်းဆုပ်ဖို့တော့ မဖြစ်နိုင် ။ တိမ္ဆိုင္တစ္ခုကို ခ်စ္မိသည္ ။ ဖမ္းဆုပ္ဖို႔ေတာ့ မျဖစ္ႏိုင္ ။ { Cover photo from Pinterest }
