ရွံ့ဗွက်တွေ ပြည့်နှက်နေသော မညီမညာလမ်းကို ကြည့်ကာ သက်ပြင်းချမိသည် ။ နှိုင်းမခကတော့ ပျော်နေသယောင် အပြုံးရေးရေးကို ချိတ်ဆွဲထားသည် ။
" လွန်း ငါတို့တော့ မှားပြီလား မသိဘူး "
ပိုးဖြူ၏ ငိုချတော့မယောင်ဖြစ်နေသော မျက်နှာကို ကြည့်ကာ ရယ်လိုက်မိသည် ။ ပိုးဖြူသည် နာမည်နှင့် လိုက်အောင် ပိုးမွေးသလို ပြုစုပျိုးထောင်ခြင်း ခံလာရသူ ဖြစ်သည် ။ ထို့ကြောင့် လန့်နေသည်ကို အပြစ်မတင်လို ။
" စောင့်ကြည့်ရမှာပေါ့ ပိုးရဲ့ ၊ မကြောက်ပါနဲ့ ငါ ရှိနေတာပဲဟာကို "
" ကားဝင်လို့ရတဲ့ နေရာကတော့ ဒီအထိပဲ ၊ ဆယ်မိနစ်လောက်တော့ လမ်းလျှောက်ရမယ် "
ဧကရီက ခပ်ပြုံးပြုံးဖြင့် ဆိုလာသည် ။ နေသူရာက နှိုင်းမခ လက်ထဲမှ အိတ်ကို ဆွဲယူနေသည်ကို တွေ့ရသည် ။
" ငါ့ဟာငါ သယ်မယ်လို့ "
" ဒီလမ်းကို နင် ဘယ်လို သယ်မလဲ "
" ငါ သယ်နိုင်ပါတယ် သူရာရယ် ၊ နင့်ဟာနင်သာ ဆေးတွေ သေချာစစ်ပြီး ယူလာခဲ့ "
နှိုင်းမခ၏ အာဏာကို မည်သည့်အချိန်ကမျှ ဖီဆန်နိုင်စွမ်းမရှိခဲ့သည့် နည်းတူ ယခုလည်း နေသူရာ အရှုံးပေးလိုက်ရပြန်သည် ။
" ဒီနေ့ကတော့ ခရီးပန်းလာကြတာဆိုတော့ ဒီတိုင်း နားလိုက်ကြပါဦး ၊ မနက်ဖြန်မှ ရွာထဲက ကလေးတွေကို ကျန်းမာရေးစစ်ပေးဖို့ အလုပ်စကြတာပေါ့ "
ဧကရီ၏ စကားသံက လေတိုးသံကြောင့် မသဲကွဲ ။ သစ်ပင်ဟူသည် မရှိသလောက် ဖြစ်နေသော လွင်ထီးခေါင်ပြင်ဖြစ်၍ လေတိုက်နှုန်းမှာလည်း ပြင်းထန်လှသည် ။ လက်မှ နာရီကို ငုံ့ကြည့်တော့ နေ့လည် တစ်နာရီသို့ပင် ညွှန်ပြနေသည် ။ နွေကန္တာဦးကတော့ အပူအပင်မရှိစွာ နှိုင်းမခအနားမှ မခွာချေ ။
တည်းခိုရန်အိမ်သို့ ရောက်သည့်အခါ ပင်ပန်းနေသည်များ ကြက်ပျောက်ငှက်ပျောက်ဖြင့် ပျောက်ကွယ်သွားရသည် ။ ကျယ်ဝန်းလှသော ခြံထဲတွင် အရိပ်ရအပင် အတော်များများက နေပျောက်ပင် မထိုးနိုင်လောက်အောင် စီရီစွာ ပေါက်ရောက်နေကြသည် ။ သီးပင်စားပင်ကဲ့သို့ အပင်ငယ်လေးများကိုလည်း ခြံခတ်ကာဖြင့် စိုက်ပျိုးထားသေးသည် ။
YOU ARE READING
Once Upon On Us
Romanceတိမ်ဆိုင်တစ်ခုကို ချစ်မိသည် ။ ဖမ်းဆုပ်ဖို့တော့ မဖြစ်နိုင် ။ တိမ္ဆိုင္တစ္ခုကို ခ်စ္မိသည္ ။ ဖမ္းဆုပ္ဖို႔ေတာ့ မျဖစ္ႏိုင္ ။ { Cover photo from Pinterest }
