لأننا نخشى المواجهة ( مكتملة)

الفصل الرابع والثلاثون

الفصل الرابع والثلاثون

الرجل: ويا ترى الجواب دا اللى خلاك مش كويس

زين: مش عارف .. أنا متلغبط ومبقتش عارف أعمل ايه

الرجل: وأنت بتعمل ايه لما تبقى متلغبط

زين: بهرب .. بروح أماكن تانية متفكرنيش أنى مش كويس

الرجل: وليه معملتش كدا المرادى

زين: عشان الشخص اللى بهرب منه مبقاش موجود بس الحاجات اللى عملها مش عارف أهرب منها

الرجل: اممم ومفكرتش تواجه

زين: مش سهلة زى ماأنت متخيل الحاجات دى أتحفرت فيا

الرجل: عندك وقت تحكيلى

زين: وليه مضطر تسمعنى

الرجل: تعرف أنا باجى هنا كل يوم وبشوف أشكال مختلفة من الناس أغلبهم بعرف أقرا مشاكلهم من برا بس أنت بالذات معرفتش أقراك فيمكن تسمع حاجة منى تحللك مشاكلك

لا يعرف زين لماذا ارتاح لذلك الشخص الذى يعرفه منذ خمس دقائق فقط ويحكى له عن حياته ولكنه جاء له فى وقت كان قد يأس حقا من والده .. حكى له زين كل شئ كان يشرح له بأستفاضة وكان الرجل يسمعه بإهتمام ولم ينطق بحرف حتى أنهى زين بكل ما عنده من كلمات كانت بداخله لسنوات عدة

الرجل: أنت عارف ليه كل دا متحوش جواك .. عشان أنت عمرك ما حاولت تصلح المشكلة زى مانت بتقول كنت بتهرب وعمرالهروب ما كان حل لمشاكلنا

زين: وأنت شايف ايه اللى كنت ممكن أعمله فى وقتها .. أنا مكنش عندى غير حلين يا إما أحاول أصلح علاقتى بأبويا اللى هى من مسئوليته أصلا يا إما أركز على حياتى وأحاول أبقى كويس ودا اللى انا عملته

الرجل: من ضمن الحاجات اللى بتخلينا كويسين هى أننا نصلح علاقتنا بالقريبين مننا أو تنهيها دا لو ينفع ودا طبعا مينفعش مع والدك .. فكرة أنك تركز على نفسك دا شئ حلو بس أنك تحاول تمحى حاجات محفورة جواك دى عمرها ما هتحصل غير لما تتقبل أنها موجودة

زين بيأس: وأنا المفروض أعمل ايه

الرجل: متفكرش فى أى حاجة كان ممكن تعملها زمان عشان أحنا فى دلوقتى فكل اللى هيفرق معاك هى حياتك دلوقتى .. أحساسك بالذنب أن اللى حصل لأختك دا أنت السبب فيه وغضبك من والدك أنه السبب فى كل حاجة وحشة حصلتلك دى مش هيغير حاجة فى حياتك غير أنه هيدمرك أنت نفسيا

زين: بس هو السبب فى كل حاجة حصلتلى وحشة أنا بسببه أتربيت من غير أم ويعتبر من غير أب لأنه هو عمره ما كان أب بالنسبالى .. حسسنى كتير أنى فاشل وأنى متحبش لدرجة أنى أقتنعت بكل الكلام اللى كان بيقولوا

الرجل: بس هو كان غلط وأنت دلوقتى حد ناجح وحواليك صحابك وحبيبتك اللى بقت مراتك يعنى كل كلامه دا ملوش لازمة