الفصل السادس والثلاثون
ميرفت: أنا متعودتش أطرد حد من بيتى
أدهم: أنا جاى أتكلم معاكى بخصوص نور
ميرفت: وأنا ايه اللى هيجمعنى بيك غير نور قول اللى عندك
صمت أدهم ثم تنهد قائلا: أنا بحب نور وعايزها فى حياتى أنا معرفش أنتى ليه بتكرهينى بس أنا حبيت أجى أفهم منك
ميرفت: أنا مش بكرهك يا أدهم زى ما أنت فاهم أو نور فاهمة..كل الفكرة أنى مش عايزاك لبنتى
أدهم: أيوة ليه أنا عاوز أفهم ليه
ميرفت: أنت كمان بتسأل ليه .. يعنى أنت بعد كل اللى عملته معاها دا وبتقول ليه .. طبعا نور فاكرة أنى معرفش حاجة عن حياتها بس للأسف محدش عارف نور أكتر منى عشان كدا بقولك أنا مش عايزاك ليها عشان أنت بتأذيها وهتأذيها وهى زى العبيطة بترجعلك
أدهم: ماشى أنا غلطان ومعترف بدا ودا كان سوء تفاهم بينا وخلاص حليناه .. ليه تحكمى عليا أنى هأذيها بعد كدا وبعدين أنتى كدا مش بتأذيها لما ترفعى أيدك عليها وتجبريها على حاجة مش عايزاها
ميرفت :أولا نور غلطت وكان لازم أوقفها عند حدها ومش أنت اللى هتيجى تحاسبنى على تصرفاتى ثانيا لما أكون عايزة بنتى تبطل تتسرمح معاك وتبقى مع حد محترم يقدرها يبقي دا مش أجبار
أدهم: على فكرة نور مرجعتليش بالسهولة اللى أنتى متخيلاها عشان تقولى كدا وأنا عرفت غلطى وزى ماقولتلك كان سوء تفاهم
ميرفت: وكان سوء تفاهم بردو لما خطبت صاحبتها!
أدهم: كنت متخيل أن دا قرار صح فى وقتها وسبتها بعد شهرين من خطوبتنا وأكتشفت أنى مش هعرف أكمل حياتى من غير نور
ميرفت: أنا مش فاضية للكلام دا أنت عايز ايه دلوقتى
أدهم: عاوزموافقتك أن أنا ونور نتجوز .. أنتى وباباها طبعا بس قولت أشوفك الأول عشان الخناقة اللى حصلت
ميرفت: هى مش قالت مش عايزة تعرفنا تانى خليها تتجوز لوحدها بقا
أدهم: نور بتقول كلام وقت الخناق غير اللى بيبقى جواها وأكيد هتبقى محتاجاكى جنبها ولو أنتى تعرفى نور فعلا هتبقي عارفة الكلام دا
ميرفت: وأنتوا قررتو خلاص مع نفسكوا أنكوا هتتجوزو وفى الأخر جايلى
أدهم: لأ لأ نور لسة متعرفش أى حاجة أنا بس حبيت أخد موافقتك قبل ما أسألها
صمتت ميرفت قليلا ثم قالت: وايه اللى يخلينى أوافق عليك
أدهم: مستعد أنفذ أى حاجة أنتى تطلبيها
ميرفت: بس دا مكنش كلامك أخر مرة ولا ايه
أدهم: عشان بحبها هعمل أى حاجة عشان نبقي مع بعض وزى مانتى قولتى انا غلطت مرة أذيتها فمش هكررها تانى وانا متأكد أنك لو وافقتى نور مش هتنسالك حاجة زى كدا طول حياتها
أنت تقرأ
لأننا نخشى المواجهة ( مكتملة)
Storie d'amoreعزيزى القارئ فى ظل هذه الحياة القاسية اعتاد الأنسان أن يهرب من أشياء عدة عندما تتعاظم الصراعات بداخله يهرب من المواجهة لكى لا يسمح لعقله أن يواجه ما لا يتقبله لكى يحمى ذاته بألا تنهار أو تنكسر .. لكى لا يعانى أو يكون مضطرا لإصلاح ما دمر بداخله أو يع...
