أنتَ تنقصني
___^^_^
سنان
سمراء بلون القهوة
يُسر فؤادي عند النظر إليها
___
سنان
دخلت أسلام جوه و هو يداهر ظليت واكَف بالباب اشرب جكارة
التفت عليه
أسلام: تفضل حبيبي تفضل البيت بيتتي
اني اعزمك تفوت شلون تبقى واكَف بالباب ميصير وليدي
رديت عليه و اني اخذ نفس من جكارتي
سنان: أسلام أبتعد عني لا اطلع حركَتي بيك
اسلام: شكو شبيك سنان احجيلي أخيك اني
سنان: ليش كل ما نحل كلشي ، يطلع النا شي يعقد الأمور و يخرب كلشي احس ضايكة بيه حيل
تقرب يمي خله ايده ع كتفي
أسلام : باهر دائماً يكَول
وَلَرُبَّ نازِلَةٍ يَضيقُ لَها الفَتى
ذَرعاً وَعِندَ اللَهِ مِنها المَخرَجُ
ضاقَت فَلَمّا اِستَحكَمَت حَلَقاتُها
فُرِجَت وَكُنتُ أَظُنُّها لا تُفرَجُ
خلي إيمانك بالله جبير تفرج و تحجي هالسوالف لجهالك باجر
أبتسمتله
سنان: و نعم بالله
تعال تفضل سووو طريق
دخلنا سوى و جابوا جاي
أسلام: السالفة انحلت تكدرون ترجعون لبيتكم امان ماكو شي
حميد : يعني ما يجون مرة ثانية
أسلام : لا اطمأن بس اكو شي
باهر: كول شنو
أسلام : اكو واحد متعمد يحط اسمكم بدل هذاك
دوروا و شوفوا منو هالمرة طلعتوا سلامات
المرة الجاية يجوز يحبكها صح و ما نكدر نسوي شي
سنان : لوووووو اعرفه و الله ثم و الله اخلي يتمنى الموت و ما يلاكَي
باهر: خالي شاك بشخص
حميد: مادري شكلك يمكن مو هو
بس اكو شخص تقدم لمودة قبل فترة اجه حتى يشوفها مقبلت تطلع اله
اخذ نفس و و هو يكمل
حميد: فأصر يحجي وياها جبرتها تطلع اله و كَعدوا سوه بس رفضته هو جبير بالحزب ، اعتقد هو الوشى بينا حتى ينتقم
سنان: و ليش احنا ما ندري بهل السالفة
حميد : خالي كَلت خطبة عادية و ما صارت ميحتاج نكَول
انتفض و هو يصيح
سنان: لااا مو عااادية و بعدين بأي حق تجبرها تكَعد وياه و تحجي و هي ما تريد هالشي
حميد: انجببببرت لو ما طالعتله جان شالنه كلنا و أخذها غصب كَدام عيونا
عافنا سنان و طلع برى
سمعنا طكة الباب الخارجي
سنان: فركت وجهي
_و هذا شيريد من مودة.
حميد: مادري كله حجيه جان فلوسي ع فلوسها
أسلام: الأستاذ داخل ع طمع
هذا يعرف مودة نص املاكك بأسمها فؤاد يستغلها و يستخدمها ورقة رابحة حتى يسحب البساط من جواك
حميد: هي افتهمته و رفضت
بس ظل يتهدد و اكثر من مرة راح لجامعتها
و صدته بقى يلاحكَها حتى خافت و ماكَامت تطلع
باهر: كل هذا تعرفه و انتَ ساكت
شوكت ناوي تحجي ياخالي
تنهد و نزل راسه
أسلام: تعرف اسمه
رفع راسه خالي
حميد : اي اعرفه اسمه حسان يداوم ب......
أسلام: حلو مالكم غرض نحل هالسالفة اني و سنان
هسى اترخص منكم عندي شغل
باهر: ابقى عالغده
أسلام: ماكَدر وداعتك
عود اجيكم عالعشه
طلع أسلام و اني طلعت للمكتب اكمل شغلي
_____
يُسر
ورى المغرب كَاعدين نسولف
دخل سنان الضحكة شاكَة حلكَه
سنان: شلونهن الحلوات
أنتصار: زينات وين جنت
كَعد و هو يرد عليها
سنان: نصر شبيج وياي شو تردين من ورى خشمي
أنتصار: تعرف الوضع شنو و انتَ من الصبح مختفي ما ندري كَاعك وين ما وين
سنان: اتصلت بيكم و كَتلكم اتأخر معزوم يم جماعتي
أنتصار : وووكتها سنان ولك اخاف عليك هسه احنا مستهدفين
سنان: شمسوين سابين الريس
ركضت عليه عمتي و مرت خالهم يسدن بحلكَه
أنتصار : فلللللشك اسكتتت الحيطان الها اذان
ام مودة: يا خالة تريد تفلكنا سد اسكت اسكت
سنان: خنننننكتني شبيجن هو منو يسمع
اندار باوع عليه بخبث قدم جسمه وحجى بصوت ناصي
سنان: وججج يُسر خافج من الرفيقات المناضلات
يُسر: سنان كَوم جيب النا حب شمسي و كون حار
بس مو يركب ع كَلوبنا مثلك
اشر ع روحه
سنان: اننني اركب ع الكَلب
شفايتلج لو تطلع خلفتج كلها تشبهني
تكَضين حياتج ساجدة لربج
يُسر: حتى اتخبل
و احنا نتناكَر دخل باهر
باهر: السلام عليكم
_ و عليكم السلام
باهر: وين جنت من الصبح
سنان: يم ثامر و الجماعة
هز راسه
حميد : شبيك باهر
كَعد و هو يرخي رباطه
باهر: الولد الكَلت عليه شالوه هسه بتهمة فساد جبيرة و مو بس هيج طلع عنده قضايا لا أخلاقية
ام مودة: فدوووى الك ربي جزاه
حميد: و شلون وكَعوا و هو ايدهم اليمين
باهر: مااعرف يجوز عليه قضايا اكبر من هذن
رفع نظره لسنان
باهر: او يكون واحد مراقبه و عرف شلون يوكَعه مو سنان
سنان: شنو
باهر: أنتَ الوكَعته
رجع سنان ظهره للقنفة
سنان: لا مو اني بس غرفت شالوه
باهر: سنان
سنان: وداعة باهر مو اني
و بدل ما كَاعد تحقق كَوم جيب لمرتك حب شمسي
نط أمير من يمه
أمير: اريد افهم يُسر ابنكم طيير ياكل بس حب
ما يجي ع بالج شي ثاني
يُسر: لا صايرة تلعب نفسي من كلشي يس السمج و الحب احبهم
أمير: ابنكم يحير اكثر من الرياضيات
________^^^^^____
مودة
من صغري اسمع كلمة (السودة)
وخر منا السودة
اكَعدي السودة
حتى جهال المنطقة تعلموا من اطلع العب وياهم يطردوني و يعيبون ع لون بشرتي
جنت اكَعد فوكَ السطح ورى تانكي المي و ابجي
اتذكر مرة عمري هيج ٥ سنوات طلعت العب وياهم و هم طردوني ظليت كَاعدة عالصبة مال بيتنا
اجت يمي بنية شكَرة اسمها منى جيرانه ظلينا تصيرنلعب بلعاباتنا إلى أن اجت امها
_كَومي منى يلا العبي ويه ولد عمج لتبقين هنا
منى: يضربوني و الله عوفيني يم مودة متحاجيني
_كَووومي لج شنو كَاعدة يم هاي السودة كَووووووومي
لزمت طرف عبايتها
مودة : خالة عوفيها يمي و اني اخلي امي ترجعها بعد شوية
نكتت عبايتها
_لا متبقى يمج
جرت ايد بتها و اجت تروح إندارت عليه
_شوفي اذا تردين تلعب وياج تصيرين حلوة مثل بتي
مودة: شلون خالة
_ خلي وجهج بالحليب تصيرين بيضة تبببضين بض
عافتني و اخذت بتها و راحت
كل عقل صدكَتها دخلت شفت امي ملتهية بالمطبخ اخذت جيس الحليب بلا ما تنتبه وياه ماعون و ركضت للحديقة فرغته و خليت وجهي بالماعون عدتها مرتين بالثالثة انشال وجهي باوعت
لكَيته سنان جان عمره تقريب ٩ سنين
مسح وجهي بالمحرمة البيده
سنان : شمسوية بروحج مودة شنو هذا شسوين بي
مودة: هاي جيرانه كالت سوي هيج و تصيرين حلوة بيضة
توقف عن مسح وجهي
رد بعصبية
سنان: و انتِ صدددكَتيها هاي تجذب عليج
و بعدين انتِ كلش حلوة
شو تخبلين
شوفي شعرج شطولها
خشمج صغير مو مثل خشومنا شكبرهن
عيونج حلوات و ملونة شترظين اكثر من هيج
بجيت و حطيت ادي ع عيوني
مودة : ميقبلون يلعبون وياي
يكَولون سودة
تقرب يمي و وخر اديه
سنان: خلي يولون مو عندج بنات خالج يلعبن وياج و اني احاجي امي و اجي العب وياج شسوين بيهم بعد
باوعتله بصدمة
مودة : تعوف أصدقائك و تجي نلعب بيت بيوت
سنان: ييي بس لا تبجين كافي كَومي غسلي لتشوفج
امج
مودة: من هذاك اليوم و رغم صغر سنه صار ظلي
صار دوم يجي يمنا و يلعب وياي
و ويه بنات خالي
حتى من كبرنا ظل دوم يكَلي
سنان: لتهتمين بالحجي مالهم اني اشوفج كلش حلوة و مميزة بلونج هذا
حبي شكلج و نفسج تقبليها
مودة:كلامه صنع مودة و خله عندي ثقة بنفسي
خلاني اشوف جمالي الحقيقي
و حبيته....
€_^__^^^______,
قراءة ممتعة
#ميرال
أنت تقرأ
أنتَ تنقصني (صبابة الهوى)
Mystery / Thriller_كَيف لَنا أن نفترِق؟ _كيف لنا أن نتفِق؟ انتِ كالجليد و انا كالقبس .. كيف لنا أن نكمل في هذا العشق؟ _داخلكِ نبات زاهر بيما داخلي حُطام مُبعثر ضامِر... _هل لكِ أن تجمعي حطامي و تضميني بين ذراعيكِ ؟؟ و تكون كل صباحاتي جميلة كجمال خديك؟؟؟ #ميرا...
