باهر:
وطني كَتفُ من أُحِب ...
______________
باهر
أحد أيام شهر الثامن عصراً
الدنيا تسمط من الحر
واكَف انتظرهم كَدام العيادة النسائية تأخروا هواية
ظل بالي يمها خاف بيها شي
توجهت لمدخل العيادة اريد ادخل
و هنه طلعن ، تقدمت ليُسر و اخذتها للسيارة
اباوع لامي متحجي، هزيت راسي الها بمعنى شكو
اومأت الي بمعنى اسكت
صعدن للسيارة
باهر: شكو شبيج يُسر ، شكَالت الدكتورة الكم
تنهدت و نزلت راسها
ردت اني بدلها
انتصار: حملها ثكَيل و خطر
الطفل نازل كلش و احتمال تصير عدها ولادة مبكرة
فلازم ترتاح هالفترة و تظل نايمة ع ظهرها
باهر: الله يستر عليها ما تسمع الكلام
ما عبالك نحجي لخاطر صحتها
مسوية الدرج ماراثون صاعدة ركض
نازلة ركض
يُسر: باهر
درت وجهي عنهه و اني اسكتها
باهر: لا باهر و لا شي
اليوم انزل غراضنا بالغرفة الجوه نبقى بيهه هالفترة لما تصيرين زينة و تجيبين عود نصعد فوك
أنتصار: حجي باهر صح انزلوا هالفترة حتى هم تصيرين قريبة عليه عاد اتطمن عليج كل شوي
تكعدين ويانا جوه
فوكَ تظلين معلكَه وحدج لازم تصعدين متنزلين شنو هيج حتى تتكأبين
تحملي لخاطر طفلج هنه بقن شهرين و نص
باوعت عليهن من المراية
باهر: بعد الها اسبوع يلا تدخل بالسابع
أنتصار : يمة هي عظمتها شهر الثامن
السابع و التاسع ما بيهن خوف
وصلتهم للبيت
نزلت امي باوعت عليه يُسر
يُسر: شنو مراح تنزل ويانا
باهر: لا حبيبي مواعد ولد ع قضية رايح اشوفه و ارجع بليل ،لتصعدين ابقي جوه اجي و انزل غراضنا
يُسر: ماشي عيني الله وياك
ديربالك ع نفسك
نزلت و تأكدت دخلت للبيت حركت سيارتي و رحت
__
يُسر:
دخلت للبيت ورى عمتي كَعدت يمها
شوي و دخل سنان بيده صينية الجاي
كَعد يمنا يصب و هو يقلد كلام عمتي
سنان: يا هلا بالحبايب شلوووونجن عيييني
اشو كَاطعات متمرن لتسألن
لتكَولن خلي نشوفهم شبيهم
خله الاستكاين كَبالنا
سحبت عمتي استكانها و هي تباوعله بنص عين
سنان: وججج أنتيصاااررر اجيتي ع بالي البارحة حجزتلج وياي ع حفلة ح يجيبون ببها حاتم اللاااا تمووووووت تجين موو
ردت عليه بخبث
أنتصار:يي عيني اروح ليش ما اروح ، بس اخذي وياج واحد يشيلج خاف تكثرين هناك و شلون ارجعج أكَدر اشيلج اني
انكَلب وجه سنان و عدل كَعدته
سنان: هيي مرة وحدددة و تبنا آلى الله
جنت زعطوط و انضحك عليه
كلما حجيت وياج عيرتيني بيها ميصير هالشكل
ذب استكانه و اجه يطلع
صاحت وراه
أنتصار : ولك سنون تعال وين موليى
التفت عليها و هو فاتح حلكه
يأشر ع نفسه
سنان: اني اني سنون شبيج حتى بصغري ما دلعتيني هيج
كَال سنون كَال
دخل أمير من بره بيده طوبته سمع سنان فكَبل شكل وياه عالخط
أمير : هذا منو ملقبك هاللقب الخايس
هز ايده سنان و رد عليه
سنان: سنون بربك هو هذا هم دلع
امير : سنون تحسه بيه ريحة هيج
كَامت عليهم عمتي تريد تلزمهم و همه شردوا منها
انتصار: ادبسزية اليوم اطيح حظكم ترجعون لو ما ترجعون
اندارت عليه
أنتصار: بلا كلام يلا كَومي ارتاحي بالغرفة
بين ميجون و نكمل نقل اغراضكم
اني اسوي العشه اليوم
هزيت راسي و دخلت تمددت و غفيت
ورى مدة طويلة حسيت ع شخص يلعب بشعري و يمسح ع خدودي
فتحت عيوني لكَيت باهر كَاعد يمي
ابتسمتله
باهر: صح النوم حبيبي
صارلج هواي نايمة اكَعدي وراج علاج
يُسر: يصح بدنك
بيش الساعة
باهر: بالعشرة بليل
خليت أيدي ع راسي
يُسر: اوووووف صارلي ٤ ساعات نايمة
ليش ما كعدوني
باهر: شفتج تعبانة كَلت اعوفها ترتاح شوي و اكَعدها تشرب علاجها و شويتلج كباب مو تحبي
لزمت ايده
يُسر: شبيك باهر احسك مو ع بعضك
تقرب يمي حضني
باهر: خايف عليج يُسر
حضنته اقوى
يُسر: لتخاف هالسوالف تصير ويه اغلب الحوامل
باجر تخلص بيه تنسي من يشرف إبنه و تشيله بين اديك
حط انفه ع شعري يشتمه
باهر: ان شاء الله تكمل و تطلعون اثنينكم بخير و سلامة
مرت وراها الايام متشابهة
بين دلال عمتي و باهر
و بين مواعيدي ويه دكتورتي
قضيت شهرين و اني نايمة ع ظهري
و ما اتحرك الا للضرورة ، كلشي يجي يمي
أنت تقرأ
أنتَ تنقصني (صبابة الهوى)
Gizem / Gerilim_كَيف لَنا أن نفترِق؟ _كيف لنا أن نتفِق؟ انتِ كالجليد و انا كالقبس .. كيف لنا أن نكمل في هذا العشق؟ _داخلكِ نبات زاهر بيما داخلي حُطام مُبعثر ضامِر... _هل لكِ أن تجمعي حطامي و تضميني بين ذراعيكِ ؟؟ و تكون كل صباحاتي جميلة كجمال خديك؟؟؟ #ميرا...
