ولا واحد اجه مثلك
اباوع بالوجوه وبالي يم شكلك
احسك مضفر بالأيسر ويه الروح
بس مو مالت نحلك
احب الناس لتشبهك
واحب اهلك
واحب الناس البحلك
همه الناس مو بيهم صفه حلوه
اشو انتَ حلو كلك…🤍
^_^__^♡♡♡♡♡_^_^_^_^_
صبابة الهوى
البارت الرابع من الجزء الثاني
بقلم ميرال
__^_^_^_^^^^_^^^^^_^^^^^_
لتنسون التصويت ع النجمة و التعليق ع الفقرة الي تعجبكم احب اقره تعليقاتكم و اعرف ارائكم بالقصة
_^_^_^_^■■■■■■■■_^_^_^_^_^■■■■■■■■_^_^__^_
أرجوان
رجعت البركَع ع وجهي اول ما صعد
باوع علينا بالمرايا الامامية و كَال لبُراق
ضباب: نروح؟
رد عليه بُراق
بُراق: اي اطلع ، بناتنا منتظرات هناك
هز راسه ، شعل جكَارته و حرك السيارة ، طالع بينا لاستوديو التصوير
اسيل: عمة بُراق ظلمت شلون تصورون
بُراق: اي عمة هي جلستنا ليلية ، و المكان داخلي هسه تشوفي
اسيل: رحيق و سِنان راح يجون ورانا
بُراق : ههههههه طالعين لمطعم قصر الأميرات
أسيل: شوف اللوتي ، دز النا سفريات للبيت و هو طلع يونس نفسه
تقرب عليه من ألشباك مالتي و مد ايده فتحه الي شوي
بُراق: ضباب ادخل بهذا الشارع ثاني بناية
وكَفنا كَبال البناية ساعدني بُراق انزل
و دخلنا للاستوديو ، لكَينا اسراء و مهى اخوات بُراق قبلنا واصلات
اسراء : هلا عيني هلا ، هلا بعريسنا
مهى : كشختنا حبيبي ، هاي غراضك الي ردتها
اخذهن منها و هي يعدل نفسه
كَعدتني اسراء و هي تعدل مكياجي ،و مهى نزعت البركَع خلته ع ايدها و عدلت فستاني
دخلت المصورة و ظلت تنطينا لقطات
اخر لقطة خلته يحضني و قرب كلش من وجهي لدرجة ما بينا بس كم سنتم
اخذت اللقطة و هو أبتعد عني بسرعة طلع اكلينكس من جيبه يمسح كَصته و وجهه
مهى: بُراق هسه دورنا
اخذن وياي صور و اسيل، انطى أسلام رقم للمصورة حتى من تكملهن و يطلعن يجي ياخذهن بحكم هو يلتحق بعد يومين
رجعنا للبيت وراحوا
صعدت بدلت و علكَت البدلة
و تمددت، مااعرف شكد نمت
و فزيت ع صوت التليفون ،رفعته شفت الساعة ب٤ الا ربع الفجر ،فصل و اندزت رسالة اني بُراق ،رجع اتصل
فتحت خط اجاني صوته
بُراق: صباح الرطوبة نتعارف لو مخطوبة
ضحكت
أرجوان: صباح الخوخ خاف نحجي و تدوخ
ضحك بصوت عالي
بُراق: لا احجي اني مخابر ع مود تحجين و اسمع صوتج، اخذتت الرقم من عمي سِنان و ما اتصلت البارحة اعرف تعبانة، كَلت قبل لا التحق اخابرج
رحعت شعري و اني ارد عليه
ارجوان: شنو اليوم التحاقك؟
بُراق: اي اليوم و راح ابقى ١٥ يوم و احتمال ماكو شبكة مو يظل بالج
أرجوان : هو شنو فهمت من اجازتك ،خلصتها ركض بركض ع مود العقد
سمعته سحب السحابة مال الجنطة
بُراق: الجايات هواي و افتهم منهن
ارجوان:مكانك خطر؟
بُراق: مو أخطر مِن عِيونج
بقينا نحجي ل٥ و ربع شهكَت و اني اشوف الساعة
ارجوان: بُراق اتاااخرت راح عليك الوقت و احنا نحجي
بُراق: لا الولد بعدهم مواصلين كَاعد انتظرهم
أرجوان: زين من توصل و تنطي خب لعمتي لو لاسراء خلي يقولي رسالة
بُراق: خوب اني ادزلج و اطمنج
أرجوان: انتظر رسالتك ، مو تخلي بالي و انتبه لنفسك
بُراق: احبج
سكتت سمعت صوت يمه
أسلام: خاييييب من الصبح احبج و احبج شنو متريك ويه جاك لو شاروخان ،دعوف البنية تتعود عليه كَبل دخلت ع السلك الحار شبيك بوية
قفلت الخط بسرعة و اني اضرب خدي
أرجوان: و الله فشششلة
وصلتني رسالة ، فتحتها عالسريع
بُراق : هههههه شبيج طفرتي، المهم اني هسه طالع ، من اوصل ادزلج رسالة و من يصير عندي وقت اتصل عليج ، لتخافين اذا لكَيتي مغلق يعني منطقتنا ما بيها شبكة
رجعت دزيتله
ارجوان: بامانة ابو الفضل، تروح و ترجع بالسلامة ، انتظر رسالتك
قفلت التليفون ، تمددت ع سريري و اني الابتسامة ع شفافي
كَعدتني الصبح عمة اسيل
اسيل : الساعة ب٢ الظهر ، سِنان كلساع داخل يشوفج ، هسه كَال اصعدي كَعديها حتى تتغدى ويانا
مطيت جسمي ، ضربتني خفيف ع شعري
اسيل : يلا ولج فيها عدنا خطار
أرجوان: منو عدنا
اسيل : بيت اهل رحيق عازمهمسِنان بمناسبة الصلحة
رفعت الها حاجبي و ألم شعري ليفوكَ
ارجوان: شوكت تصالحوا و شلون
اسيل: البارحة بالخطبة وكَع ضباب ع سِنان و صالحه و اعتذر منه ، و سلم ع بُراق و عادي بُراق رحب بيه
هزيت ايدي
أرجوان: هذا الولد بيه شي
أسيل: هي كلها مو صاحية بقت ع ضباب
يلا بدلي راح انتظرج هنا حتى ننزل سوة
مالي خلكَ اكَعد اجرب سوالف وياهم .
ارجوان: بايتة يمنا انتِ؟
اسيل: اي ، زعلانة
ارجوان : شبيكم ؟
اسيل: رجوة يغاااار هوووواي يغار ، هو مو شغله بنص الكلية و بين البنات شو مااغار لهذهِ الدرجة
رغم اموت عليه و اموت ع اطفاله احبهم حتى اكثر من أمهم الله يرحمها .
تخيلي اجاني للمستشفى و لكَى يمي والد واحد من المرضى يستفسر ع حالة إبنه
غير قامت القيامة ع راسي ،حتى البيت كسره
ارجوان: حاولي تكَعدين تحجين وياه ، كَليله غيرتك هيج ح تأذي و تأذيني ، فهمي انتِ تحبي و متشوفين غيره
حسسي بالحب الي دتحجين عنه
اسيل: ميفييد اخر مرة تعاركنا وصلت بيه اذا اجه يستخدم الضرب ، عفت البيت و اجيت هنا هذا الحجي قبل يومين من خطوبتج و حتى اتصالاته ما رديت عليهن
ارجوان : شنو هاي ؟ شو ما مبين عليه هالكَد عصبي
اسيل: تعبت منه ، هاي هي اتطلكَ احسن
أرجوان: تتوقعين يقبل يطلكَج؟ هو يكَلب الدنيا من تباتين برى مو نوب تطلكَين ، نشيييييل احسن
وجهت تليفونها الي
اسيل: هاج شوفي ديتصل
خلت التليفون ع الميز
ارجوان: اي يا عيني الأمور متنحل هيج
عاقبي بغير طُرق ، ليش تبتعدين عن بيتج
اسيل: يفيدن وياه؟
ارجوان: يفيدن ، ارجعي و ابتعدي عنه ظلي مزاعلته
و استعملي درب الهلاك ، هسه اكيد يصالحج
وراها اكَعدوا احجوا و تفاهموا ،عمو رجال طيب و حباب و يحبج بس مشكلته يظن انج ما تحبي لهذااا يغار
و انتِ ما تعبرييييين
وين اكو وحدة صار الها ٦ سنوات متزوجة و ما كَايلة لزوجها احبك ، هسه عوفينا من الاحبك عبري اله عن حبج ، ليش جامدة و ساكتة
أسيل: الله كريم
كَمت ع السريع غسلت و بدلت وكَفت ع المراية اعدل وجهي، عمتي اسيل تزوجت قبل ٦سنوات من احد الأساتذة الجامعيين يكون زميل عمة رحيق أرمل عنده ٢ أطفال ولد و بنية جان اعمارعم وقتها ٣ ، شافها مرة و هي جاية للكلية تأخذها و أعجب بيها ظل سنة يخطب بس عمو سِنان ميقبل متخوف من من فكرة عنده أطفال خاف عمة متكَدر تتعايش وياهم ، لحد ما جاب مشية و اقنع عمو سِنان ، من تزوجوا بقت هي تهتم بيهم و همه حسبوها مثل امهم صاروا أطفالها و لحد الان ما صار عدها حمل، لمحت انعكاس ملامح اسيل الحزينة
ارجوان: شبيج عمة ع شنو بعدج ضايجة
أسيل: رجعة ضباب وترتني
ارجوان: ليش
اسيل: أمير محابة ، ديكَول رجعته راح تسبب مشاكل و شؤم
سحبت شالي البسه
ارجوان: يمةةة احساس امير ما يتقارش
امي تكَول جنه احساس ابوي ابد ميخيب
اسيل : الله يستر من ضباب المضبضب
رفعت تليفوني ما شفت بُراق داز شي ،بس صارله هواي من راح معقولة بعده ما واصل
تركت التليفون نزلنا سوه اني و عمة اسيل سلمنا عالنسوان و رحنا للمطبخ نصب اكل
اجه عمو سِنان للمطبخ من شافني ضحك و فتحلي ايده
ركضت لحضنه
سِنان: حبيبة ابوها ، هذا كله نوم عبالي بيج شي
ارجوان: لا تعبت البارحة و نمت ما دريت بنفسي
سِنان: التحق خطيبج
ارجوان: اي الصبح
وخرت من حضنه و هو يسألني
سِنان: وصل لو بعده
أرجوان: ما داز شي
سِنان: يجوز واصل ما حصل شبكة من يحصل يخبركم ، هسه اريد منجن تصبن النا بالاستقبال و كلكم تكَعدون ويانا
اندارت عليه عمة و هي تتخصر
اسيل: سِنان
سِنان؛ أعرف شجاي اسوي سولة صبن يلا
دخلت رحيق تساعدنا
رحيق: اني افرش السفرة و اخذ الاكل بس حضرن
اسيل: اييي عفيية
اخذت السفرة منه وبدت ترتبها هي و عمو سِنان
دخل محمد من برى و سلم عليهم
سِنان: اسيييل رجوووة يلا بابا تعالن
دخلنا اني ووياها و كَعدنا بالطرف
ما رفعت راسي و لا درت بال اله
كملنا اكل و شلنا السفرة
وكَفنا نغيل مواعين
دخل همام يركض
همتم: رجوووة رجوووة تليفونج احتركَ
هاج خطيبج يتصل
نشفت اديه و اخذت من ايده و اني افتح خط
أرجوان: الووو
بُراق: هللوو حبيبي ترى وصلت من زمان بس ما عدنا إرسال بالمقر
أرجوان: الحمد لله ع السلامة ، اهم شي طمنتني
بُراق: اني اروح عدنا اجتماع
اتصل بعدين
أرجوان: بالسلامة انتبه لنفسك
قفلت التليفون و اني اخلت ع الكاونتر
اسيل: وصل
ارجوان: واصل من زمان
كملنا و كَعدنا اني ووياها بالصالة نباوع فيلم
الجماعة بقوا للعشه
راح عمو سِنان و همام جابوا من برى بس رتبناه الهم
و ما تعشينا وياهم
ورى العشه اجو بيت عمو ايسر و بيت عمو نصر و كل شلة كَعدت بمكان تسولف
اجه السحب و ووصى عمي نطفي القاطعين الفوكَ حتى تبقى المبردات مشتغلة
ل١١ اتصل بُراق ، اضطريت اطلع للحديقة احجي وياه ،
ما طولت وياه لأن تعبان ، ربع ساعة و سدينا الاتصال
درت وجهي اريد ارجع للبيت صار خالو ضباب بوجعي
باوع الأيدي الي لابسة بيهه الحلقة و باوع لوجهي صفن شوية و رجع نظره لحلقتي
ضباب: مبروك
أرجوان: يبارك بيك يوم الالك
حاولت اتعداه و ادخل للبيت وكَفني و هو يكَول
ضباب: غلطة طلعت مني نتيجة العصبية ، ليش تخليها بين قوسين و تنسين الباقي
أرجوان: مو اول مرة تعيدها
حاولت اعديها ، الثالثة بعد طفح الكيل منك خالو
و ان كان تصالحتوا انتَ و عمو و كَدر يسامحك ع كلامك، اني ممشمولة بهذاالصلح و لا ممكن اسامحك او انساه
ضباب: لا تنسى بس ع الاقل لا تدورين حياتج و تاخذين قرار انتِ متأكدة منه بسسب هالكلام
صفنت بوجهه ، كمل كلامه
ضباب: اعرف قبلتِ ببُراق انتقاماً مني عالكَلته
أرجوان: لا عيني لا ترى هواي شايف نفسك ، منو انتَ ع مود ادمر حياتي ع مودك
قراري اخذته بكامل قواي العقلية و القلبية و متأكدة منه
مو بسببك
تقدم عليه
ضباب: افصخي و اني اخطبج بنفس اليوم، بُراق ما يستاهلج ،من عساه لا رد من المعركة
ضربته ع خده بقوة
ارجوان: أنتَ إنسان مرريض
تركته و اني اغلي من العصبية ، دخلت كَعدت يم البنات
_^_^^^_^^_^_^♡♡♡♡_^_^_^^_^^_^^
محمد
بعد التخرج بسنة تعينت
صرت الصبح بالوظيفة ، و العصر بالمحل ويه عمي
ورى خطوبة رجوة بشهر، كَعدت ويه عمامي و امي
قررت اروح اخطب دُرر رسمي مدام انطو الموافقة
يُسر: خلي ببالك محمد ، خطوبة وراها عرس فوراً ، هذا شرط ابوها ، و كليتها تكملها يمنا
سِنان: بعد أحسن اني ما حاب السالفة هاي تطول
محمد: ما عندي اي أشكال، مكون و مجهز نفسي
أمير: عالخير عمي
سِنان: ع بركة الله، انطوهم خبر حتى نروح الهم باجر ورى العشى
التفت عمي سِنان لعمي امير الصافن بوجهه
حركِ ايده كَبال وجهه
سِنان: ها وين وصلت بعد اخوك؟
خله امير ايده ع لحيته يمسح عليها
امير: احسك خايف من دُرر ابو الهمام
سِنان: اترك هالموضوع هسه
امير: ترى محمد يعرف بيه ليش اتركه
و لمعلوماتك، دُرر تختلف عن امها
و حتى و ان وكَفت بوجهها و ما قبلت تنطيها لمحمد
دُرر راح تحارب و تأخذه ووقتها تعالي
زفر سِنان أنفاسه
سِنان: اني ما خايف من شي
خايف ع محمد مااريد ينكسر كَلبه مثلي و لا أريد يحس بالشعور الحسيته بذيج الفترة
مال اشوفه بموقف يسبه هذا و متأذي غير احركَها هي و عشيرتها
اشرت ع عمي امير
محمد: لتخاف عمي أخذها من ابو علي الشيباني دُرر تختلف
سِنان : هه دحنا
عموماً تحضروا باجر نروح الهم، راح انطي خبر لايسر يروح ويانا ، تاخذين رجوة؟
يُسر: اي لعد شلون هي و رحيق و هيام و اسيل كلنا نروح
دخلت عمة رحيق بيدها العصير انطا النا
امير: سويلة المنعجرة بعدها متعاركة ويه ذاك المطعوج
محمد: قمةةة التنمر عمي قمةةة التنمر
باوع لعمي سِنان و هو يهز بيده
أمير: شوف جيل هالوكت تنمر و تنمر
هذول لو يرجعون لوكتنا ، من جنه نصيح لفارس علام لأن وجهه مربعي يجوز نروح بيها ٤ ارهاب
ضحك عمي سِنان
سِنان : تذكر من جنت تصيح ليُسر ابلة عفت ( مدرسة المشاغبين) لأن اجت سنة كَصت شعرها مثلها
امير: هي صدك جنها ابلة عفت شكل و تصرفات
باوعت عليه امي بطرف عينها
يُسر : تذكر شجنت اسميك
فز عمي امير من مكانه
امير: عليج العباس لاااا ، احلفج بروح باهر لا تحجين هاي بيناتنا بس اني و وياج و باهر ندري بيها ، اصير مزق اذا عرفوا ذول
محمد: انتم ارهاااب مو ٤ ارهاب
سِنان: عوفونا من التنمر هسه، رايح احجي ويه أسيل رجلها داك رجل الا ترجع
تركنا سِنان و طلع ، صيح وراه امير
امير: صالح المنعجرة و المطعوج و اجرررررك ع الله خل نفككك مسوينا بيتنا كراج النهضة كلساع جافت اريد مرتي ، هو اني زوج و خليتها توافق عليك
رحيق: شبيك شاد ويه الولد
أمير: المطعوج اخذ توأمي
انتهت ليلتنا بالضحك .
اجتمعنا ثاني يوم بليل ، و رحنا الهم ، اتفقنا ع يوم الخطوبة و تمت بحمد الله
و حددنا العرس وراها بأسبوعين
عمي جان يركض ركض بالتجهيزات و الوقت ، كَلبه كَارصه من ام دُرر ، بس ما بيده يسوي شي ، من يشوفني شلون فرحان و طاير اطلع بأذني التليفون و ادخل بأذني، يطير وياي من الفرح و يبقى يدعيلي تكمل ع خير و نعرس
دُرر اول ما تشوفها تحسها جامدة و غير اجتماعية ، متعالية ، وومن تعاشرها تعرف معدنها انسانة نقية و فطيرة الى حد مالها بسوالف الحيايا
بس رأيها ثابت و ما تغيره
و إذا رادت شي تأخذه لو يوكَف العالم كله بوجهه
هذا الحبيته بيها
مرة من المرات طلعن دُرر و عمتي مودة ويه امي يكملن الجهاز صارت رجعتهن لبيتنا ويه استراحة عمي سِنان ، كملوها من اجو بيت عمي أسلام البنات يشوفن بشنو يساعدنا بالعرس
فهو عافهن كَاعدات جوه و صعد للطابق مالته يرتاح بغرفته
مدري شلون غافلتنا عمة مودة و صعدتله ع بالها عمة رحيق ما منتبهة الها،
من حست بيها عمة رحيق صعدت فوكَ لحكَتها ع كيف ، أشرت لارجوان تشوف الوضع
صعدن وراهن هي و اسيل
€^_^_^_^_^_♤♡♡♡♤_^_^_^^^_^^^^_
سِنان
دخلت للغرفة نزعت قميصي و فتحت باب الكنتور، صار الباب بظهري يعني اليدخل ما اشوفه اذا ما درت وجهي اله
وكَفت ادور ع أوراق مهمة تخص دوامي
انفتح الباب ، ما درت وجهي فكرتها رحيق
سِنان: ما عندج اخوان ليش تركضين وراي
مو عيب عليج تتحرشين بولد لا حول و لا قوة متخافين تطلع بضباب ولج رحيقة
استغربت من ما سمعت رد ،اردفت
سِنان: هم زعلانة و هم تتخيل وياي شلون بيج المن صعدت اذا ما تردين تحجين
سمعت صوت ورايه يصيح بأسمي ، عرفتها مودة
سحبت تيشيرت لبسته و انداريت الها
سِنان: اعتذر منج ام ريان بس جان لازم تستأذنين يلا ، مو تدخلين هيج
فركت اديها و هي عيونها تدور بالغرفة
مودة: آسفة سِنان خليتك بموقف محرج
بس اجيت اكَلك هالكلمتين و انزل
اني ام خايفة ع بنتي ، اني مو ضد سعادة دُرر و محمد بالعكس اني وياهم و اريدهم يتزوجون و يحققون الي ماكَدرنا نحققه و ظلينا بحسرته
قاطعتها و اني اخلي ادي بجيوبي
سِنان: اني حققته ، لهذا اريدهم يحققون امنيتهم و يتجمعون تحت سقف واحد مثل ما سويت اني
و لتخافين ع بنتج ويه محمد و نعم الرجال راح تكون وياه اسعد انسانة
مودة: هذا الحجي لأن ابن اخوك و انتَ ربيته
سِنان: لا لأنه تربية باهر و يُسر ، الي ربونا كلنا احنا الكَدامج و هاي صرنا أباء و أمهات و درنا بيوت و شوفي بعينك حياتنا ، ام ريان خلي اديج و رجليج بمي بارد من ناحية محمد و اتأكدي ح بداري بنتج اكثر من ما انتِ مداريتها و راح تذكرين كلامي هذا بالمستقبل
خليهم يتزوجون و لتوكَفين بطريقهم حرام عليج
رجعت تدور عيونها بالغرفة
مودة: جان لازم تكون هاي غرفتنا ، و جان لازم هسه نجهز لعرس إبنه او بتنا بس ما حققنا هالشي
رحيق باكَت حلمي و باكَتك مني
هي السبب انك نفرتني و ما قبلت اطلكَ و ارجع الك
سِنان: لا ما باكَت شي منج
اني حقها من البداية، حاربت اهلها و عمامها و اخذتني هاي عود احنا بينا ثار و صايرة مصايب
استاهل انسانة نقية بنقاوة مشاعري
ام الهمام تاج ع راسي ، و لو اموت ما ابدلها
هاي هي كشت نفسي عن كلشي غيرها
اعشق ترابها مو بس هي
دخلت علينا رحيق عيونها بكَصتها من الغضب و وراها رجوة تجر بايدها و تهمس بأذنها
تخوصرت رحيق و تهز برجلها
رحيق: شنو غرفتي صايرة مقر اجتماعات
اي كِولولي بشنو جنتوا تحجون
ضحكت ع شكلها
سِنان : جنه بسيرتج بعد العشيرة اكَول ام الهمام اعشقها و اموت عليها
دارت وجهه و هي مراضية أشرت لمودة
رحيق:يدورون عليج ابو ريان جوه ينتظرج تفضلي انزلي
طلعت مودة عالسريع و هنه وراها وصلت للباب اندارت تباوعلي
رحيق: سترت عليك اخر جملة كَلتها قبل لا ادخل و الا جنت ناوية اسوي مجزرة بيكم انتو الاثنين
بردت كَلبي بحجايتك
سِنان : مدام بردت كَلبج دتعالي دوريلي الملف الاخضر مجاي الكَاه
رحيق: حير بروحك مزاعلتك
هزيت أيدي، شبيها هاي العالم متخبلة عليه الحمد لله و الشكر
مرت الأسبوعين و اختار محمد يوم الأحد يسوي عرسه
لأن بُراق ينزل يوم الأحد الصبح ما كَدر ياخذ اجازة
اجل العرس من الجمعة للأحد ع مود يلحكَ و ميفوته نفس الحنة
حجزوا قاعتين للحنة و للعرس و الملابس سوه ، يخابره بليل وقت استراحته و ميخلي يحاجي ارجوان يكَله اني اولى بيك منها ، هي ما عدها شيييي
بيوم الحنة اجو المعازيم كَرايبنا و اصدقائنا و أصدقاء الولد و الشباب نصها تتراكَص
اباوع لابن اخوي وجهه مفرحان و كلساع يتصل بالتليفون و ينفخ ، يشوف بُراق ما موجود
شوي و طفت الاغاني صار هدوء
أعلن الدي جي وصول شخص قريب كلش ع كَلب محمد
انفتح باب القاعة اشتغلت اغنية خياي و دخل بُراق
ترك محمد مكانه و نزل اله و هو يضحك
محمد: و القرآن عرفتك تجي، كَلبي حاضني راح تجي
تحاضنوا بنص القاعة
بُراق: كل عقلك ما احضر حنتك؟
حركَوا اثنينهم الجو حركَ لحد ما طردوهم اهل القاعة
ثاني يوم راح وياه بُراق للحلاق و رتبه
و زورق سيارته و زفهم للقاعة
كمل العرس ، رادوا يزفون العرسان للفندق
اندار محمد ع بُراق ااي واكَف بصف ارجوان يتهامسون
محمد: عوووف الحجي ويه مرتك زززفني لللفندق
رد عليه بُراق
بُراق: اني احير بمرتي لو احير بيك
محمد: تحير بيه اخوك صار ٢٤ سنة استحي ع دمك صارلك شهرين خاطب اختي شوكت لحكَت تحير بيهه
امير: هذا هم ضارب سراي و سراك و هم لسانه طويل
شجابك تتحمله عوفه عوفه و اخبرك بشي
ترى اخته الواكَفة يمك لسانها اطول منه، تشيل بلد بكبره
بُراق: و اني راضي بيهه
امير: وكحة حيل
بُراق: راااضي راضيي
محمد: اهوووووو هسه وكت شكوتك عمي خلي يكمل عرسي و اكَعد اشكيله وراك الليل كله شعندك
سِنان: خلي نعرسله و نفتك امشووووا كَدامي
أخذ سِنان العرسان وصلهم للفندق
و بُراق و ارجوان طبعوا يتعشون
ورى الساعة الكل رجع اجتمع ببيت باهر
_^___^_^^♡_^^^♡_^^_^♡
أرجوان
تعشينا برى و رجعنا
وكَفنا السيارة بعيد عن البيت لأن ماكو مجال و كملنا طريقنا مشي و احنا نحجي ، لمحنا ضباب يخابر و منفعل
دغني بُراق بأيدي
بُراق: شبي خالج
أرجوان: مااعرف مبين عصبي
فتنا من يمة ، قفل تليفونه و دخل قبلنا دخلنا وراه كَعدنا يمهم
سِنان: خونة ، غير تاخذوني وياكم اتعشى
بُرااق: بالخطبة تعشيت انتَ برى ، و بالحنة اتعشى ابوي
كَلت اتلاحكَ روحي نتعشى بالعرس
امير: اكَلكم شو السالفة صاير حجوزات
أسلام: التطور مطلوب لازم نواكب الحاضر
قطعنا الكلام من فاتت علينا للاستقبال بنية يبين عمرها نهاية العشرين شايلة ع ايدها طفل عمره حوالي السنتين
وكَف عمو سِنان يسألها و يستفسر منها
سِنان: تفضلي عمو منو انتِ؟
قبل لتفتح حلكَها و تجاوب
ما حسينا الا ضباب سحلها من ايدها يريد يطلعها برى
نترت ايده منها ، حاول يضربها ، لزمه بُراق و هو يمنعه
بُراق: شبببيك تريد تضرب مرة و فوكَاها بيدها طفل
تخخخخبلت
لاحظت رجفة جسمها ، رخت ايدها اجه يوكَع الطفل
تقربت اخذته من أيدها
غافل بُراق و هجم عليها يريد يسحبها
رفعت اديها لوجهه بينت آثار حزام ع أديها
سحله بُراق من ياخته و جتف ادي لظهره
عاط بيه عمو حتى يتركها ، و دخلها كَعدها ع وحدة من القنفات ، ركضت امي جابت الها بطل مي
رفعت ايدها اخذته منها و هي تشربه كلها دفعة وحدة
سِنان: اي عمو ما كَتيلي منو انتِ؟
باوعت ع ضباب و ردت
ميس: انيي ميس
سِنان: اهلاً و سهلاً بيج ، بلا صغرة بس ما عرفتج من انتِ ؟
رفعت نظرها و هي ترد بكل قوة
ميس: زوجة ضباب و هذا إبنه
_^_^_^_^^^^^^^^^^^^
قراءة ممتعة
ميرال
_^^_^^^^^^^
اعذروني ع التأخير جان عندي فاتحة
بقى بارت واحد و تكمل الرواية
و نودع شخصياتها؟
أنت تقرأ
أنتَ تنقصني (صبابة الهوى)
Mystery / Thriller_كَيف لَنا أن نفترِق؟ _كيف لنا أن نتفِق؟ انتِ كالجليد و انا كالقبس .. كيف لنا أن نكمل في هذا العشق؟ _داخلكِ نبات زاهر بيما داخلي حُطام مُبعثر ضامِر... _هل لكِ أن تجمعي حطامي و تضميني بين ذراعيكِ ؟؟ و تكون كل صباحاتي جميلة كجمال خديك؟؟؟ #ميرا...
