آرد أگلك كلشي بعيونك خذآني
وآرد أگلك فآهيه عيون البشر من غير رسمك
آرد أشمك وأرجع صغير وآضمك
وأترس الدنيآ ورد
انت يآ أخر اغنية تتيه مني ومآ ترد
________
أنتَ تنقصني
ميرال.
_______
لتنسون التصويت ع النجمة ووالتعليق ع الفقرة الي تعجبكم
احب اقره تعليقاتكم و اعرف رأيكم بالقصة
_^^^^^^^__
باهر
ركضت للباب اشوف شكو ، ما لكَيت أحد بس ظرف معلكَ بالباب سحبته و فتحته
( وصلتني الفلوس ، راح اعدي فرحتكم ع خير هالمرة )
اجو وراي اسلام و ضباب
اسلام: ها ها منو ،شصاير
انطيت الورقة الهم
باهر: جاي يلعب ويانا
أسلام: راح تجي الشرطة اكيد هسه يوصلهم خبر من الجواسيس
باهر:خليهم، بلكي يسوون جارةة يقبضون عليه
ضباب: اني أقترح تكَول للشرطة ،حتى يخلون دورية قريبة منا ، في حالة فكر يسوي شي ، يكونون اله بالمرصاد
باهر: اني هم كَلت
أسلام: اني اتكفل بكلشي، ابقى انتَ ويه سِنان ، باله يظل يمك اذا طلعت و اتأخرت
باهر: مااريد اورطك أسلام اخاف عليك
أسلام: انتوا عائلتي ، شنو ما تريد تورطني ، نسيت اني بعد يومين ح انزل وياكم بالتومينية
ضباب: صح كلام أسلام، خلي هو يتولى القضية ، احنا محتاجيك هنا و الناس راح تجي ، اكيد كلها راح تسأل عنك
اسلام: بوقت الحنة اني يمك
باهر: مو تتأخر و تخلي بالي مشغول بيك
أسلام: ما اتأخر، راح انطي خبر لخالي حتى نسجل الدعوة و اجي بساع
ضباب: اجي وياك؟
أسلام: ابقى يم التليفون اذا احتاجك اتصل ، مع السلامة
باهر: الله وياك
___^^_^
ضباب
طلع أسلام و احنا ظلينا واكَفين
باهر: راح اتخبل منو ينطي فلوس بأسمي
ضباب: ممكن مهدد احد غيرك، قريب عليك و عنده سلطة يسحب مبلغ جبير لأن اكيد مراح يطلب الف و الفين دينار
باهر: محد اله هيج سلطة غير اني و أمي
حتى الولد ميكَدرون يسحبون مبلغ جبير اذا مو موافقة مني
ضباب: حييرة
طفى جكارته ووهو يتجه للبيت
باهر: رايح احاجيها هسه و افتهم منها مااكَدر ابقى هيج حاير ، عاد تخليها تكَلي اعرف راسي من رجليه
لزمته من ساعده و اني اوكَفه
ضباب : لتتسرع ، اذا رحت هسه و كَالت اي اني راح تكَلب الدنيا عليها ، و الناس كلها مجتمعة يمكم راح يضطر سِنان يلغي حفلته
ينتهي العرس و تروح الناس و اكَعد تباصر وياها ، هذا احسن بهاي الحالة
مسح ع شعره و هو يزفر
باهر: تعبببت ضباب تعبببت
قبل جنت اركض ورى الولد
هسه اركض ورى امي و ابوي ، ما طلعت شغلة هاي
ضباب: اهدئ و صلِ ع محمد
ماكو شي ما ينحل ، شما تصعب و تتعقد الها رب يحلها لتتتعب بيها
باهر : و نعم بالله
طلعت علينا أرجوان و هي تركض لأبوها ابتسم
ونزل لمستواها و هو يفتح ادي يحضنها
باهر : حلوة البنات، شيخة كَلبي
أرجوان: اشتاقيتلك ، كَال أمير راح ويه أسلام يتأخر لليل يلا يجي
كَلت اطلع انتظرك هنا لما ترجع
و شوففف طلعتت لكَيتك موجود ، الله انطاني ع كَد نيتي
باهر: ليش طالعة بالبرد يا بابا ، جان صحتيني و اجيتج ، مناعتج ضعيفة اخاف عليج تتمرضين
أرجوان: لتخاف حبيبي لابسة ملابس هووووواي، بعدين وبن تدخل جوه كله نسوان لا اني و لا ماما نقبل
باهر: شوكت يروحن؟
أرجوان: الطركاعة ح يباتن، روح لبيت عمو ايسر و بات هناك و قريبين ذول ورانا و اني اروح وياك خاف تستاحش
تقدمت و اني اوكَف بصف باهر
ضباب: باهر يروح وياي لبيتنا
ردت عليه و هي تسوي حركة لا باديها
أرجوان : نونو بيتكم بعيد ، ابعد من طرطبيل
ضباب؛ ههههههه شنو طرطبيل
التفت الي باهر و هو يضحك
باهر: طريبيل ، بنتي عدها مشكلة بالمناطق ، تكَلب اسماءهم
باوعت لارجوان
ضباب: المحمودية شسمها عندج أرجوان
أرجوان: سهههلة الحمادية
ضباب : انتِ كَالبة خارطة العراق هههههه
باهر : مو بس العراق اسمع ذن شسم سويسرا و اسطنبول
خلت خدها تفكر
أرجوان : سويرا و السنسول
ضباب:هههههههههه مسوية كرة ارضية لوحدها ست أرجوان
أبتعدت عن أبوها و لمت شفايفها بزعل و اتجهت لباب المطبخ
أرجوان: تضحك عليه بابا، زعلت منك و الله
ركض وراها باهر و هو يسحبها لحضنه مبوس راسها
باهر: حلوة البنات، حبيبة ابوها ماعاش الي يزعلها، اختاري الاكلة الي تحبيها و هسه أجيبها الج ، ها هيج نتصالح؟
أرجوان:دجاجة محشية؟
باهر: وياها ببسي ، هل تصالحنا
أرجوان: جيب و نشوف
ءءءء احسب حساب عموو سِنان و محمد
باهر: تدللين روحي انتِ
ضباب: هههههههه بنتك طالعة ع سِنان
باهر: اي غير تربيته، ٢٤ ساعة ع كَلبه
تخيل يزاعلوني و همه غلطانين و تعال باهر صالحنا
ضباب: ملوت سِنان، اليوم العب عليه
التفت عليها و هي تحاجيني بطرف عينها مكتفة اديها
أرجوان : عمو يلعب ويه الشيطان ، يخدعه و يلبسه حذائه مكَلوبي(الله يكرمكم) ميمشي عليه أي شي
سِنان: هاي فعلاً ع كَلب عمها
باهر: شكَتلك اني ، يلا بابا ادخلي جوه اجيب عشى و اصيحلج
أرجوان: بابا لتجيب هوايةة، امي مسوية عشا للناس الموجودين
باهر: محتاجين اجيب الكم شي
أرجوان: سألتها كَالت لا كلشي عندي
باهر: زين بابا ادخلي و احنا رايحين نجيب العشى
هزيت راسي
دخلت للبيت و احنا طلعنا للمطعم جبنا الهم عشى و رجعنا
بالباب لزمته اصدقائه يحجون وياه انطاني العلاكَة كَال انطيها لرجوة لا تبرد
اخذتها من ايده و دخلت دكَيت باب المطبخ مرتين
درت وجهي صرت ع صفحة ثواني
فتحت الباب و اجاني صوتها
أرجوان ها خالو
التفت عليها و اني انطيها العلاكَة
ضباب: الزمي ابوج دزهه ، و لتطلعين بعد الحديقة انملت شباب ، من تحتاجين شي دكَي الباب و احنا نجي نشوفج شتردين
أرجوان: ماشي ما اطلع
شكَرا الك
سديت الباب و رحت يم الولد اساعدهم شوي و شفت سِنان يدخل للبيت
_^^^^^^^^^__
رجوة :
دخلت جوه و اني شايلة العلاكَة ، شفت ماما كَاعدة ويه النسوان ، صعدت فوكَ لغرفتي و خليت محمد يصيح ع عمو سِنان و يصعدون
دخل عمو و هو ينشف باديناته
سِنان: يا بعد عمج ، راح تخرط روحي من الجوع
أرجوان: اكَعد اكل اكَعد وجهك صاير ليمونة هواية تعبت هالايام
رد عليها محمد و هو ياخذ الخاشوكَة
محمد: كلنا تعبنا ست رجوة مو بس هو
يعني هم نحتاج جرعة من هذا كلامج و اهتمامج حلو لو هي بس لعمو سِنان
أرجوان: اخذ نفس ، ابلع ريكَك ، لتحسد الولد وراه زفة عوفه و التهي بهاي الدجاجة
شووووف التحميصة
ضربه عمو ع ركَبته خفيف
سِنان: لتخلي عينك عليه ، هي بس رجوة و يُسر مدارين كرشي ، اذا تخرب علاقتنا اديح
محمد: تشبع فلافل هههههههه
بدينا ناكل لهناك و جان افجرها
ارجوان:اكَول عيني محمد ، اشو هاي دُرر هواي تتلزكَ بيك ، عفية لتنطيها وجه
سِنان: دُرر بنت نصر
أرجوان: ييي و لا اطيقها تتكَلب هواي
محمد: بالعكس حبابة ، امي تكَول ماخذة أطباعه امها كلهم
سِنان: لهذا لازم تبتعد لأنها تشبع امها ههههههههه و خلي كلامي هذا بأذنك خاف تحتاجه بالمُستقبل
يلا شباب اني اروح ، و الله يوفقكم شبعتوا كرشي
ما انساها الكم ، عشاكم باجر عليه
أرجوان: عمو عشى المعزومين باجر كله عليك مو بس احنا حبيت اذكرك
خله ايده ع كَلبه و هو يصيح
سِنان: بوووية بوووووية كَلبي ليش ذكرتيني
محمد : شحال لو ما العشى ع بابا
ارجوان: هو من يسمع بالفلوس ينط
منه، من غيره ينط
سِنان: صدكَتي يا ابنة اخي
اكَوم ابدللل الناس اجتي
أكرمكم الله عيوني
أرجوان: حبيبي الف عافية
جره محمد من ايده و هو يطلعه برى
محمد: فضنا يااخي تسووولف هوووواي
طلعوا اثنينهم و اني غسلت عالسريع وبدلت ملابسي لبست الفستان الي اشتراه الي بابا و نزلت الصينية جوه شفتهن يباعن عالحنة من شباك المطبخ صابرة لخة
ماكو مجال واحد يحط رجله مو يباوع وياهن
يُسر:ها رجوة شبيج ماما
رجوة : ماما اريد اباوع ،شلون شوفيها صايرة طكه و طيح
دارت وجهه صفنت عليهن و رجعت باوعتلي
يُسر: روحي لغرفة بيبي و باوعي
بس اقفلي الباب لا يدخل احد و تضيع شغلة من اغراضها
رجوة: اي بعيوني راح اقفلها
عفتهن يتعاركن عالشباك ، رحت لغرفة بيبي مُطلة عالحديقة ، طفيت الاضوية ووكَفت اباوع من الشباك
شفت عمو سِنان و ضباب يركَصون بالنص
و عمو أمير صاعد عالطاولة الجبيرة يهز جتف منظره يموت ضحك
و أسلام واكَف يغني ويه المطرب
وكَف الموسيقيين و عزم الحظور عالاكل
أسلام: اكلوووووا الللفات و نعاود فعالياتنا
اترسوا بطونكم حتى تهزون زين
امير: شمسوين عشى ، بس كون يستاهل الهز الهزيناه
اسلام: لتخاااف مدلعين كرشك من كلشي تحبه نجيبلك حتى باكَلا مسوين الكم بعد شتردون
نزل من الستيج و بده يوزع الهم
أكلوا و رجعوا يركَصون استلم المايك عمو نصر و ظل يهوس خلاها كلها تردح نص ساعة و كلمن طش لأهله
بقوا بس ولدنا كَاعدين برى يركزون و يضحكون ، سديت البردة و طلعت كَعدت يم امي انطتني لفة بديت اكل بيها كَعدن يحشن بالمعازيم و بالحنة
و يحجي بجمال العروس ، لاحظت عمة مودة ما شاركتهن صافنة ووكل شوي تمسح عيونها بلا ما واحد يشوفها
شوي و صاح بابا علينا حتى نتستر حتى يدخلون الولد ، غطن البنات لبسها
و همه دخلوا ، استقر نظر عمو نصر ع عمة مودة و هو يتفصحها بقلق
نصر: ها مودة تروحين لو تباتين هنا
جاوبته و هي تتهرب منه ما تباوع بعيونه
مودة: لا اروح وياك
كَامت اله و هي تعدل عبايتها
تقرب منها و هو يسألها بخوف
نصر: بيج شي ؟ تعبانة من شي؟
ابتسمت اله بتعب و هي ترد
مودة: لا ما بيه شي
نصر: أحد ضوجج؟ سمعج كلام ؟لتظلين ساكتة كَولي
مودة : لا و الله محد حجى وياي بس اني شوي تعبت ،ما متعودة ع هيج تجمعات، تعودت ع محيرني المغلق
نصر: اذا تردين ابقي ويه البنات تتونسين ، تغيرين جو
صارلج هواي ما شايفتهن
مودة: لا شلون تبقى انتَ و البنات و ريان منو الكم؟
خله ايده ع راسها
نصر: ههههههه شعلينا، هو بس سواد الليل و الصبح يمج
مودة: و انتَ كَلتها هو بس سواد الليل شسوي باقية
اني الصبح احبهم
نصر: بكيفج بعد، صيحي بنات و خل نروح
ضربه باهر ع كتفه
باهر : ابقوا باتوا هنا ، نفرش الكم بالاستقبال
و همه هي تبقى يم البنات ، شعدكم رايحين بهذا الليل
نصر: لا يمعود ، هو انتم صايرين حل و و شد وين نصير احنا ، تروحون تحتارون بينا
باهر: لا كلها راحت بقينا بس احنا و انتم
شسالفة البيت شكبره ما يشيلنا
إنتصار: اي يوم محد بقى بس عائلة بيتنا ، و بيت عمك ابو مودة باقين ، ابقوا انتو هم
سِنان: اي نصر شعندك رايح ، ابقى هاي غرف فارغة شكددد و حتى نبقى سهرانين كلنا
أسلام باقي
انتصار: ضباب راح؟
سِنان: اي بس خلصت الحفلة ، يكَول ما اعوفهن لوحدهم
انتصار: راح يودع عمته ،خطية رابين سوى و متعودين ع بعض مااعرف شلون راح يفاركَها
يُسر: اي خطية رغم فرحه بعرفها تحسه حزين لأن راح تبتعد عنهم
سِنان:همه اخزان اكثر من عمة و ابن اخوها ،عايشين راسه و راسها مناكَرهم و مشاكلهم و مصايبهم كله سوه
و ابد ما تنطي بي لو شما يسوي ، عدها ضباب خط احمر
يُسر: بدت الغيرة
ضحك سِنان و هو يغطي عيونه
سِنان: اي بدايةً جنت هواي اغار منه و هي تغار من أرجوان و تايهة بينا
باهر: اي لازكَ بالطفلة و نوب كل سوالفه عبارة عن أرجوان ، لو منها اطلكك
سِنان: يااابة هاي بأول الخطوبة، هسه تطوورت و صرت اعرف افتح مواضيع و كذا
محمد : عاف أرجوان كَام يحجي عالبرياني و شلون يوخر الزفرة من اللحم
سِنان: ههههههههههه قدييييمين دادا انتو قدددديمين
نصر: يعني شنو نوع التطور الواصل اله
خله سِنان رجل ع رجل و هو يصم تدي لصدره
سِنان: مثلاً وصلنا السمج الشوي حفظنا البرياني
باهر: ههههههههه
نصر: عقلي يكَلي مجاي تقصد الاكل
سِنان: اي مو اكل ، لا جاي اقصد الأكلات
وين راح تكَعدون
باهر: بالاستقبال بدلوا و تعالوا
ام محمد بلا امر العليج فد قوري جاي معدل من ايدج
يُسر:: تدلل
سِنان: خل احفظها هاي خاف احتاجها
وكَف و هو يتجه للدرج و يحجي ويه نفسه
سِنان: ام غايب بلا امر العليج قوري جاي معدل من ايدج الحلوة
باهر: ام غايب؟ ناوين تسموه غايب لا ربحنا
سِنان: انسى الاسم ، و عاش لسانك باهر بعددددد
امير: اي ترى اخوانك طايحين من الدرج
باهر: كَوم الحكَ اخوك تبدل و تجيب النا الجاي
يلاااا بساعكم
صعدوا يبدلون و امي كَامت خلت قوري جاي الهم و دلة كَهوة
عفتهم و رحت انام
___^^__^^^^^^^^^__^^^__
باهر
فتت كَبل ليجون ، كَعدت يم أسلام
باهر: ها شسويت، اتأخرت ظل بالي يمك
اسلام : لا ليظل بالك ، قدمت بلاغ و ساعدني خالي بالموضوع راح يقبضون عليه لأنكل الادلة تشير اله و هم واحد من الجيران شايفه هو و يرمي عالبيت فشهد ضده، الضابط كَال راح نخلي دورية حماية قريبة منكم خاف يصير ، لأن حالياً مهددين بالخطر
باهر: مطولة سالفة القبض
أسلام: اي لازم ندير بالنا، انتبه لعائلتك باهر ووصي اخوتك، ترى مبين ناوي ع نية سودة الكم
قاطع حديثنا دخول نصر و سِنان و هم يتعاركون
سكتنا اثنينا
نصر : هاي باررررردةةة تعتبرها؟
هاي مقببببلات هناك
سِنان: عمي احنا ناس متعودين عالشمس التصلي صلي
وينا وين البرد ، بووووية اعظامي ظلت تصل عليه
سويتله مكان بصف الصوبة
باهر: تعال تعال هنا ، استبردت كونك ما سابح
سِنان: ما كَدرت لعبت نفسي من الصبح ما سابح
دخل أمير و بيده الصينية بده يصب النا جاي
امير: هاك دزته ام محمد ياسين مدري شسمه تكَول يدفي عظامه و يطلع البرد منه
سِنان: الف رحمة ع والديها
نصر: و الله و لا باردة ، اني محتررر
سِنان: ما يكَعدددد البطررريق ما يكَعدددد
اندار ع باهر و هو يحاجي
سِنان: صدك باهر حجزت طباخ اني و أسلام و كَتله شنريد عشى ، و اتفقت ويه القاعة
باهر: و اني حجزت الفندق
سِنان: حلووو ، و السيارات حجزت اربعة كافي؟
باهر: اي ، احنا عوائلنا تروح بسياراتنا
بيت أيسر ياخذهم أيسر و اني اخذ عائلتي و اسيل
ونصر ياخذ عائلته
أسلام هو يجيب اهله كَبل للقاعة
سِنان: بس يحضر زفتي غير؟
أسلام: و انزل اهزلك بنص الشارع تأمر أمر
ظلينا نسولف لل٢ قفلنا
فرش أمير بصف أسلام و ناموا بالاستقبال مثل القتلى
نومهم كبش ثكَيل
احنا طلعنا نريد نصعد لغرفنا
سِنان: راح انزل فراشي انام يمهم ، ميقبلون انام بغرفتي
باهر: عليمن صاعد، اخذ من غرفة امي و نام
اتجه للغرفة يريد يفتححها
سِنان: خلي اشوفها خاف قافلة الباب ،
اندار عليه
سِنان: اكَلك منو مغير مكان التليفون ماكو بالاستقبال
رد عليه نصر
نصر: شفته بالغرفة النايمين بيها ، اجيبه الك
سِنان: لا لا عوفه
دخل للغرفة اخذ فراش و دخل تمدد بنصهم
____^^^^___________
مودة
قضيت الايام الفاتت و اني هواي افكر
لازم انفصل عن نصر
ما اكَدر اكمل وياه بعد
احس هالوضع خانكَني
حسمت أمري و كَلت من يجي احاجي بالموضوع
ظليت منتظرته إلى أن دخل
نصر: ها مودة: بيج شي
مودة: اي اكو شغلة مهمة اريد اكَلك بيها
___________
سِنان
ورى ما فرشت بدقائق
سمعت عياط نصر و هو يصيح عليه
دفرت فراشي و ركضت لغرفته
لاكَاني بالباب و هو ع قميصه دم
____^^____^^^^^^^^^^^^^______
قراءة ممتعة
#ميرال
_^____________
هذا الجزء الاول من البارت
بعد بارتين و تنتهي هالقصة....
__________
أنت تقرأ
أنتَ تنقصني (صبابة الهوى)
Gizem / Gerilim_كَيف لَنا أن نفترِق؟ _كيف لنا أن نتفِق؟ انتِ كالجليد و انا كالقبس .. كيف لنا أن نكمل في هذا العشق؟ _داخلكِ نبات زاهر بيما داخلي حُطام مُبعثر ضامِر... _هل لكِ أن تجمعي حطامي و تضميني بين ذراعيكِ ؟؟ و تكون كل صباحاتي جميلة كجمال خديك؟؟؟ #ميرا...
