الروح إذا آوت دأوَت و إذا أَحبت أحيت

2

جالسه على سجادتها تصلي سنه الفجر و تدعي لي امها تطيب من المرض ب اسرع وقت سمعت صوت المؤذن و قامت عشان تصحي امها و ابوها
روح : يابيي قوم صل الفجر يا بيي
ابو روح : قمت يابنيتي قمت
قام بيطلع من الغرفه و لف لي روح و نطق : صحي امس خليها تصلي و تاكل علاجها
حركت راسها بالموافقه و طلع محسن يتوضى صحت روح امها تصلي و جهزت لها العلاج و طلعت تصلي الفجر عشان تجهز الفطور لهم بدري
" بيت الجد عايض "
دخل وهو معصب و يصارخ على العيال يقومون لصلاه
الجد عايض : قوم يا ورع انت وياه قومو قامت قيامتكم
دخل ابو حامد " سيف " من ورا الجد عايض : يا يبه استغفر الحين اقومهم و نلحقك للمسجد لا تدعي عليهم
الجد عايض : لا اشوف واحد منهم يتاخر قومهم بسرعه و طلع رايح للمسجد صحى ابو حامد العيال عشان يروحون يصلون الفجر .
- دخلت سلمى " ام حامد " زوجت سيف تقوم البنات يصلون عشان بعد الصلاه يبدون يجهزون الفطور
ريحانه قامت وهي تتذمر : ياربي متى اتزوج واحد غني و ساكن بنجد و يصحيني على ورد و.. قاطعتها الجده فاطمه و هي تضحك و تضربها بشويش بالعصاء : خلي التذمر عنك مالك الا عيال عمك قومي بس صلي عشان ما نتاخر بالفطور قومي
قامو البنات يصلون عشان يجهزون الفطور
" بيت محسن "
دخل البيت و هو يبتسم اول ما شاف روح تسولف على امها الي جالسه بالصاله و هي بالمطبخ سلم على روضه و راح يصبح على روح : اخبارتس يابنيتي ، ابتسمت روح لانه ما يترك عادته انه يجي يسالها عن حالها كل صباح نطقت و هي تسلم على راسه : بخير يا بيي دامكم بخير اجلس ونس امي بسواليفك شكل ما عجبتها سواليفي وانا بجهز الفطور ، ضحكت ام روح و هي تقول : حرام عليك ليه ما تعجبني سواليفك
روح : ابد يا اميمتي لك ساعه تساليني عن رسن شكل سواليفها احسن من سواليفي ، ضحك ابو روح على روح و هو يجلس جنب روضه يسالها اذا اكلت العلاج او لا
" بيت الجد عايض " دخل و هو معصب من العيال الي يضحكون وراه و لف لهم و هو معصب : يا ورع انت وياه ضحككم واصل لاخر الحاره فضحتونا مع هلفجر ، سكتو كل العيال كاتمين الضحكه تقدم وسام و هو يبوس راس جده و يقول : ما تبينا نضحك يا جد ، صد عنه الجد و دخل البيت و هم انفجرو يضحكون على امجد الي جاي للمسجد بدون حذيان من الخوف لا يعصب عليه جده عايض
امجد و هو يضحك : خير انت وياه انقلعو عن وجهي لا تخلوني اذكركم ب اشكالكم قبل ، هزاع مسك بطنه من الضحك و هو يتذكر قبل ان وسام جاء و ثوبه مقلوب و ذياب جاء و هو لابس حذيان كل وحده شكل انفجرو كلهم يضحكون الا سكتو فجأه من شافو حامد و هو يناظر لهم بنص عين قال وسام و هو يناظر فيه : وش فيك تناظر انت لا يكون ذابحين احد عيالك ! دقه ذياب مع كتفه بمعنى اسكت تجاهله حامد و دخل البيت دخلو بعده و هم يضحكون من وسام الي دايم يرادد حامد و حصلو ابوهم قدامهم و سلمو عليه و جلسو يفرشون الفرش بالحوش عشان البنات يحطون الفطور عليه زي كل مره و جلسو ينتظرون جدهم و ابوهم و البنات يجيبو الفطور قال امجد بنبره حزينه : تصدقون يا عيال اشتقت لعمي محسن ، عم الصمت بينهم و كل واحد يفكر بينه و بين نفسه ايش حال عمهم محسن الحين و هم لهم اكثر من عشر سنين ما شافوه
قال ذياب و هو يناظر شباك غرفت ابوه : تصدقون دايم افكر و اقول وش صار بينهم لدرجه ان ابوي صار يكره طاري عمي محسن !
وسام : الصداقه الي كان ينضرب فيها الامثال انتهت ب جمله " حتى عزاك يا محسن ولله ما احضره " كلهم تضايقو من طاري عمهم محسن
( ملاحظه : محسن ما يكون عمهم بس هم يقولو له عم لان لما كانو صغار كانو يقولو له عم و كبرو على كذا )
كان هزاع بيتكلم بس سكت من شاف عمه سيف طالع من الغرفه و الجد عايض مستند عليه و جلسو معهم ينتظرو الفطور
" بالمطبخ "
رفيف و هي تصفف القرصان عشان تشيلها : امانه ديمة جيبي لي من الغرفه غطوتي بطلع اعطي ذياب القرصان ، راحت ديمة تجيب لها الغطوه التفتت ريحانه لرفيف و قالت : ليه تطلعين له كان ناديتيه، رفيف و هي تلف الغطوه على شعرها و تغطي وجها : لا عادي و هو رجله تعوره من طيحته الي امس ما يحتاج اتعبه زياده و طلعت من المطبخ و القرصان بيدها نادت ذياب من عند باب المطبخ الخلفي الي يطل على الحوش بصوت خفيف عشان عيال عمها محمد " امجد و هزاع " معاهم بالحوش قام ذياب و راح لها و هو يبتسم ، ذياب : تسلم يدينتس يا خيتي ما نصبر عن قرصانتس ،  شالها من يدها و حصلها حاره كالعاده : كم مره اقول لتس لا تشيلينها و هي حاره بتحرقتس ، ابتسمت رفيف من اهتمامه و هو دايم يوصيها ما تشيلها و هي حاره ولا تقول له يجي ياخذها من المطبخ ، رفيف : ما عليك يا اخوي مو مره حاره ولا بتحرقني ان شاء الله بس ناد لي معك وسام عشان ياخذ الشاهي من ريحانه لا تطفشني زي كل مره ، ضحك ذياب و اشر على خشمه بمعنى " على خشمي " و راح و دخلت رفيف و راحت للمطبخ تجهز الباقي ، الا شوي و دخل وسام و هو يتبسم من شاف امه و خواته بالمطبخ : يالله انك تصبحهم بالخير ، و اتجه يسلم على امه و التفت لريحانه  : غريبه ما جيتي تصارخين عشان الشاهي ، ضحكت ريحانه بخفه : اصبر للحين ما فار خذ الصحون ذي و طلعها و تعال خذ الشاهي اشر لها بمعنى طيب و اخذ الي هي وصت عليه و طلع للحوش ناظر لذياب و ساله : كيف رجلك الحين ، ابتسم ذياب : معليك كويسه ماعليها خلاف اروح اجيب الشاهي ولا بتجيبه ، نزل وسام الي معاه و قال له انه بيروح
-
"بيت محسن " قام من على الفطور و هو يشوف الساعه ردفت روح و هي تشيل الصحون بتوديها المطبخ : بتروح للحلال ولا المزرعه يا بيي
ابو روح : لا بروح للمزرعه بشوف وش سوو العمال
روح : بتتاخر ولا احسب حسابك عالغداء
ابو روح : تسلم يدينتس يا بنيتي بس لا تحسبين لي يمكن اجي على العصريه انتبهي لي امتس و خليها تاكل علاجها و انتي لا تتعبين نفتس زين ! راحت روح و هي تسلم على راسه : ابشر يا بيي انتبه لنفسك زين
سلم عليها و على امها و طلع من البيت رايح للمزرعه ،
ام روح و هي تقوم : روح يا بعدي انا بروح اريح امس ما نمت زين وانتي ريحي لا تشتغلي واجد
روح و هي تبوس راسها : نومك عافيه يا عافيتي ابشري بس بشيلي الفطور و ارتاح
ام روح و هي تمشي للغرفه : و دقي على خيتس ترا نست ان عندها اهل
روح ضحكت من كلام امها : ابشري الحين ادق عليها و تجي ارقدي انتي
-
" بيت الجد عايض "
دخل ابو سعد " محمد " و سلم عليهم و جلس جنب عياله امجد و هزاع و تكلم و هو ينظر لامجد : امجد يا ولدي سعد ما كلمك امس او اليوم ؟
امجد و هو يشرب شاهي : لا ولله يا يبه ما كلمني اخر مره كلمته قبل امس و قال انه مودي ام هيام لاهلها
ابو سعد : زين اذا دق عليك قول له ابوك يقول لك لا تطول
امجد : ابشر يا يبه
الجد عايض : يا وسام انت و ذياب روحو للعزبه الحين و حطو اكل للبل و شوفو اذا فيه شي ناقص ولا لا
وسام : ابشر يا جدي بس ما يحتاج ذياب يروح رجله تعوره من طيحته امس انا اخذ امجد او هزاع و نروح
الجد عايض ناظر لذياب : مطفوق من يومك " ملقوف "
كتمو الضحكه العيال و هم ينظرون لذياب الي وده يقوم يذبحهم قام امجد و هو يمسح يدينه و ناظر لوسام : ابك انت ما تشبع قوم قوم خل نروح و نرجع قبل تحتر الشمس
وسام و هو ياكل : اسكت خلني افطر وش الشمس تحتر ترا شتينا يا الورع اسكت
امجد و هو يمشي جهت الباب : اقول بس اسرع يلا انتظرك ، و طلع
قام وسام بيمشي مد له ذياب كاسه شاهي و همس : ما شربت واجد اليوم
ابتسم ويام و اخذ الشاهي و قال : جعلني قبلك يا اخوي ، و لحق امجد
امجد شاف وسام و هو جاي له و تكلم و هو يطلع الولاعه و الدخان : اخيرا جيت يا المشفوح
وسام و هو يضحك : اقول بس امش امش و خل عنك الدخان
امجد غمز له : يويلي ليكون تخاف علي ؟
وسام صد متجه لالسياره الددسن : لا بس ما ودي انكتم انا ولا انت بحريقه و ركب السياره و لحقه امجد و هو يضحك
" عند البنات ب بيت الجد عايض "
تكلمت رفيف بحزن : بنات احس اني اشتقت لروح
ريحانه : تكفين يا رفيف تراني اتناسا الموضوع
ديمه : ودي اشوفها ولله ولا ندق عليها ابوي و عمي محسن الله يهديهم ضيعو بعض و ضيعونا
رفيف : وش الموضوع ذا الي بعدنا عن بعض عشر سنين
كانت بتتكلم ريحانه بس شافت امها و هي داخل و اشرت للبنات بمعنى اسكتو
-
" عند روح "
دقت على رسن و اول ما ردت قالت و هي معصبه
يا الوغد " بزر او طفل " ما تستحين انتي ؟
ضحكت رسن : ولله يا خيتي معليش انشغلت مع عمتي " ام مصلح " عندهم عزيمه الاسبوع ذا شسوي
روح : اقول بس امي تسال عنتس و تقول تعالي اليوم و جيبي معتس الوغدان اشتقت لهم
رسن : طيب باكلم مصلح هو ما بعد جاء من الدوام ، ابوي عندتس ودي اكلمه
روح : لا ولله طلع للمزرعه يقول بيجي العصريه يمكن وش عندتس
رسن ضحكت : تراه ابوي بعد اشتقت له
روح : اسكتي يا القاطعه اذا بتجين دقي علميني عشان اسوي لنا حلا و قهوه من قديم ما جلسنا مع بعض
رسن بحنيه : ابشري يا خيتي ولله اشتقت لتس ان شاء الله اجي لما يجي مصلح
روح : يلا ما بطول عليتس و بروح ارتاح لا تنسين تعلمينن
رسن : ابشري ما بنسى يلا فمان الله
روح : مع السلامه

" خلص البارت الاول ما حبيت يكون فيه احداث كثيره و معقده عشان يمدي تتعرفون على الشخصيات " حسابي انستا n.aili8 و تيك توك " انزل التشبيهات هناك ان شاء الله عجبتكم البدايه و لنا لقاء قريب 💙 "