الغرام الفاسد🖤مكتملة🖤

🖤الجزء 6🖤

🖤🥂 الــغـرام الـفـاســد 🥂🖤
فكرة وإشراف : ندى علامي
بقلم : شيماء عمراوي

الجزء 6

صوت الموسيقى لمجهدة كيتسمع فأرجاء لبار .. كايبان مضلم و أضواء ملونة كيضربو فيه كايبانو من الدخلة ديال الباب شيء لي خلا أميمة حرارة جسمها طلعات بستريس ولخلغة ... دخلات صباح وتبعوها لبنات تا هوما دخلو موارها وهي كاضحك لزبائن لي كاتعرفهم تقريبا واحد بواحد .. كان تما عالم أخر على غير ماتوقعوه .. ناس مفرقة فكل بلاصة و طبالي عامرين كيسان وقراعي مع لگارو وشيشة دخانهم مالي الدنيا.. وبلاصة د نبيذ بلأنواع مختالفة مع عصائر .. جات فلوسط على الحيط لي كيتوسطها بارمان .. و كانت بلاصة درقص فلوسط فيها زوج أعمدة (عصا ستريبتيز) طوال لرقص عليهم وعلى لموسيقى المتنوعة لي عطات جو مختالف ... بدات كاتهضر مع لبنات وتشوف فطبالي لي تما .. كانوا معضم لبنات لقدامات شادين لحتيت وتمياع مع لكليان حتى بان ليها جالس فلفوطوي بوحدو.. شحال ما شافتو هنا .. تقدمات مع لبنات من بعد ما خلات أميمة وبنت أخرى جلسو فوق كرسي حدا البارمان لي كان مشغول كينفد الطلبات .. وقالت ليهم يتسناوها تما حتى ترجع .. وصلات لعندو وطلقات ابتسامتها لي متعودين عليها شفايفها و بادلات السلام معاه بلا ماتقرب ليه ..
كان متكي وواخد راحتو .. يد شاد بيها كاس ديال شراب ولوخرا گارو كاينتر منو مرة مرة .. كان لاحظ وجودها ووجود لبنات لي معاها ملي دخلات مع لباب .. شاف فيهم وحدة وحدة ولكن عينيه استقرو غير فوحدة شاف فيها ثواني وقلب وجهو كمل على ماكايدير حتى كيشوف صباح وقفة حدا رجليه ولبنات معاها لي مانزلوش عليه العين .. كانت حاطة يديها على خسرها ولمسكة ففمها كيف ديما شاف تاني فلبنات لي كانو معاها طلعهم ونزلهم مالقاش معاهم لبنت لي شاف وطلع عينيه ل صباح لي هضرات..
صباح : عاش من شافك .. أش هاد لغبرة ماموالفاش ليك
... : ( وجغم من كاسو ) دابا تولفي
صباح : شحال قدك راك دور دور وترجع لينا ماشي لخاطرك ههه ، عنداك غير تبدلنا ألغزال
... : وانا نقدر نبدلك..
شافت فعينيه النايمين ولحمرين بشراب لي كان عطى مفعولو عليه : جيتي مع الجديد قد قد.. واخا بدا كايغلب عليك شراب أولد قاسم ..
.... : ماجايش لداكشي ( حرك عينيه ل وراها كيحاول يركز ويقلب بعينيه عليها )
طلقات ضحكتها وهي كتشوف ف أميمة .. فهماتو : هههه قول نتا حاضيني من لباب .. غير حيدها من بالك ديك سلعة ماشي ديالك..
.... (قهقه بطريقة رجولية) : كلهم بحال بحال .. إلى كانت لغيري مرة أخرى تولي ليا..
صباح : مرحبااا (وشافت فلبنات) ماعلينا دابا ها هوما لبنات قدامك عزل وتخيرك كولشي ديالك .. ولا عرفتي (جرات نعمة) هادي تقضيي الغراض لسي يوسف حيت باينة فيك ماشي هو هاداك غاتفاجيي عليك واخا غير بلكلام لحلوو .. (وغمزاته)
ماجاوبهاش .. هي شافت ف نعمة كتوصيها بعينيها دير اللازم كيف قال ليهم عزيز وتحركات عاطياه بضهر لطبالي لخرين لي تمالغات فيهم شويا مع لكليان وخلات لبنات يكملو على ما بدات ومشات رجعات عند أميمة ولبنت الأخرى لي خلاتهم كايتسناوها....

عند نعمة لي طلعات نفس ونزلاتها وزعمات وتحركات لعندو ماحبسات حتى وقفات عليه خلاتو يشوف فخاض رجليها لي تقابلو معاه وقالت ..
نعمة : بوونسوااغ .. (بصوت أنثوي رقيق كيدوب داخلة فيه الرعشة وجلسات جنبو مبعدة عليه شويا)
عينيه مزاحتش على هاديك لي جالسة بعيدة عليه كيشوف غير نص فوجهها حيت كانت جالسة .. واخا عينيه نايمين من كثرت ما شرب ولكن تفاصيلها وحروفها لي شافهم فاش يالاه دخلات باقا كترسم قدام عينيه .. حول نظراتو ليها فاش سمع صوتها (نعمة) ودار إبتسامة ساخرة ترسمات على شفايفو .. وشير بصبعو لناحية أميمة
يوسف : شنو سميتها
شافت لبلاصة فين شير صبعوو .. واخا ماعرفاتش علاش سول ولكن جاوباتو بلا ماتكثر الهضرة : أميمة
ورجع شاف فيها حتى كايحس بالتليفون كايصوني هزو وركز شاف شكون من بعد جاوب فلبلاصة
يوسف : ألو حيدر .....

#التتمة غدا إن شاء الله
خليييو توقعاتكم وتفاعلوووو
تباتو فراحة الله 🤍