🖤🥂 الــغـرام الـفـاســد 🥂🖤
فكرة وإشراف : ندى علامي
بقلم : شيماء عمراوي
الجزء 4
طلع النهار و شرقات الشمس وهوما مزال ناعسين .. حتا دخلات عليهم سعيدة كاتغوت وتصفق بيديها ..
سعيدة : أفييقو أش هاد لخمرة شفتكم مزال ناعسين يالاه .. ليوم عندكم النهار عامر..
بداو كايفيقو وحدة ب وحدة متابعين وهوما كيتاوبو مانعسوش مزيان خصوصا أميمة لي مانعسات حتا قرب يصبح صباح عقلها غاينفاجر بالتفكير فختها لي غاتخلي وراها وتمشي... فاقت خاسرة والشمس ضاربة فوجها بانو ملامح التعب و انكساار مغطيين زينها ..
خرجو من لبيت وتوجهو للحمامات مفرقين ترمحوو و كمدو عضامهم جهد كثر من ساعة وهوما تما تقول كانو مرقدين فلغيس عاد خرجوا طايح عليهم السر تنقاو مزيان گاع لي فيها شي حاجة خلاتها تما .. لقاو حوايج جداد محطوطين لكل وحدة فيهم وسعيدة فإنتظارهم
سعيدة : دابا غادي تلبسو و دوزو تفطرو حيت من بعد خاصنا نمشيو لبلاصة أخرى غاتزيدو تجهزو فيها وهي فاش غاتبداو الخدمة نيت (شافت فأميمة) قبل ما نمشيو غادوزي تشوفي ختك وديري عقلك ها ودني منك.
هزات أميمة راسها بواخا وبدات كاتلبس عليها بحال لبنات ... لبسات اونصومبل سپور ودارت فرجليها سبرديلة فلون الأبيض وجمعات شعرها بطريقة مبعترة على شكل سفنجة .. دازت جلسات تفطر حتى مابغا يدوز ليها والو وناضت خارجة غادية لعند ختها ماشي بزاف حتى دخلات للداخل وبدات كتقلب بعينيها عليها حتى لقاتها واقفة مع لبنات .. بقات كاتشوف فيها شحال .. عاد تنهدات وغوتات عليها , ختها غير سمعات سميتها وشافتها جات لعندها وهي كتبسم ليها حتى وصلات
ملاك وهي كاطلعها وتنزلها بإعجاب : هاي هاي هاي أش هاد الزين هادشي جديد عليا ... و مالك مابتيش ففراشك فقت فلليل مالقيتكش
ردات عليها : راكي عارفة الروينة لي كاتجبد لينا سعيدة كيف ديما وصافي نعسنا تماك.. راني زربانة لبنات ونعمة كايتسناو .. بغيت نقول ليك شي حاجة
ملاك : كيفاش زربانة وشناهيا هاد الحاجة ؟؟
أميمة : سعيدة لقات لينا واحد لخدمة وفيها السكن بحال هنا (غمضات عينيها ورجعات حلاتهم وكملات) وخاصني نمشي حيت غانبداو..
ملاك بصدمة : لاااا ماتقوليهاش واش غاتمشي من هنا فمرة ولا شنو
تنهدات : أه خاص نمشي يالاه نيت نبدا نجمع شويا دلفلوس بين ماتخرجي من هنا تلقايني كريت الدار ودرت فين نكونوا بزوج.. ولكن غانبقى نجي نشوفك ضروري مرة ف سيمانة..
ملاك ماعرفات مادير ولا تقول من غير تنزل دموعها فصمت خلات أميمة تجرها ليها وضمها لصدرها ... مدة وهي حاضنة ليها راسها لعندها كاتحاول تسكتها عاد قابلاتها معاها كتمسح ليها فدميعاتها ..
أميمة : شش باركة ماتبكي قلبي كايتقطع وانا كانشوف دموعك.. مابغيتكش تسالي جهدك فلبكا..
بصوت باكي وهي كاتشوف فيها : صعيبة عليا (كتشهق) صافي الله يعاونك تهلاي فراسك.. ياربي غير مايطولش الوقت ونتجمعو بزوج فدار كيف كنا كنحلمو..
داز شويا ديال الوقت حتى كتسمع صوت نعمة كاتغوت عليها مور ضهرها ... ضارت لعندها بمعنى نعام ونطقات نعمة
- سيفطاتني ليك سعيدة.. قالت ليك يالاه خاصنا نمشيو (ميلات راسها ل ملاك لي كان باين فيها باكية) وانا ماغتسلميش عليا ... وزايداها بلبكا راحنا غير حداك غانبقاو نجيو عندك حتى تصلح الأمور
شافت أميمة فملاك : سمعتي نعمة أش قالت .... يالاه دابا خصني نمشي ... وكلمة وحدة تقال إن شاء الله غانتجمعو وديك الساع ماغاتفارقني معاك غير الموت
هزات راسها بلإيجاب و عنقاتهم بزووج بلكشايف باش طلقاتهم يمشيو وحتى هوما كذلك عاد عطاوها بالضهر خارجين وأميمة لغمّة شادة قلبها ودموعها فطرف عينيها..
#يتبع
الاراء ألبنات
أنت تقرأ
الغرام الفاسد🖤مكتملة🖤
Romansa💎مكتملة💎 🖤🥂#الــــغــــــــرام_الـــفـــــــــاســـــد 🥂🖤 ✧ فـــكــرة و إشـــراف : نـــدى عـــلامــي ✧ بـــقــــلــــم : سكينــــة البــقالــي ____________ •̀ نعـتـها بما ليس فـيـها ، ف ردت عليه بابتسامة ماكرة قائلة : أنَا التِي هزّت كِ...
