دفتر مذكرات

الصفحة السادسة،،
دفتر مذكرات،،
بقلم حنان الموسوي *
،،،،،،،
توجهت بسمة إلى جدتها وقد وضعت أمامها كسرة خبز ولبن
رائب للفطور قائلة :
**_ بيبي.. يمكن اليوم لو باچر أبو عهد يجيب طبيب يشوف
أمي.. تتوقعين راح يگدرالطبيب يعالجها وترجع لوعيها..؟؟

ردّت شامية بتثاقل، وكأن مرضاً ما ألمّ بها، فقد كانت شديدة
التعامل مع فراسة، مما أدى إلى شعورها بالارهاق والمرض :

**_ على ربّچ ماكو شي مستحيل.. يگول للشيء كن فيكون..
.. بسّ احنه ما لازم نتأمل شي فوگ قدرتنا.. يمكن علاجها
يطوّل ويحتاج فلوس.. واحنه هلّ داتشوفين.. السما والگاع..

كانت شامية تحاول أن تطعم فراسة، شيئاً من اللبن، لكن فراسة
لا تستجيب، كانت خاملة، ذابلة، بعد ليلة من الصراخ والتوتر
والهيجان.
شعرت بسمة بسوء حالة جدتها، فأحتضنتها قائلة :
**_ بيبي.. تعبانة.. يوجعچ شي.. دا اشوفچ مو علی بعضچ..؟!!

فأجابت وهي تختنق :
**_ يدّة صدري يوجعني.. وجسمي منملّ.. لمّي الزاد.. وخلّيني
أنام يمّ بتّي.. وأنتِ.. صيري سبّاعيّة... الله يتولاچ برحمته..

بدأت بسمة تختنق بعبراتها وتتوتر خائفة على جدتها، فقالت :
**_ بيبي شجاي تحچين.. أروح أصيح أم هاشم..؟!

رفعت شامية كفها بكل ما لديها من أواخر قوة وقالت :
**_ لا.. خلّينا ننام انه وبتّي...

جلست بسمة القرفصاء وهي تشاهد جدتها تحتضن أمها على
مهل، وتذرف الدمع بصمت ولا حول أو قوة إلى أن غالبها النعاس
فغطّت في نوم عميق عند قدمي أمها وجدتها.
،،
،،،
.. تنهد أحمد وراح يستغفر ويحولل وهو يجيب على سؤال أسعد وقال :
**_ البيوت أسرار.. لكن اللي نعرفه عن فراسه هي چانت متزوجة
بالأول من راضي أبو بنتها الوحيدة بسمة.. چانو اثنينهم موظفين
بدائرة التموين.. وعين الله عليهم.. يرحون ويجون بدربهم ومالهم شغلة بأحد.. أصلا هي الموظفة الوحيدة بالمنطقة .. وچان عندهم بيت بوحدهم نهاية المحلة.. بسّ أمها شامية چانت جيرانا وبيتها على بُعد شكم بيت من يمنا.. وبسمة ربَت ويّ بناتي..
گبل أكثر من سبع سنين.. راضي فجأة توفى..! وهي مجرد ما خلصت عدتها أخذها... أعوذ بالله منه.. ما أريد انجس لساني بإسمه.. واحد حيوان .. ما طوّلت شهر ونشوفها رجعت گدعت يمّ أمها.. يقولون باعت بيتها.. ويوميه صياح وعياط ومعارك ويّاه... ؟!!
وورة كم يوم احترگ بيت أمها..ورَجْلها كاسر رِجِلها.. وهي عقلها شطّ.. والعار زوجها اختفى وما له أثر من يوم الحادث..؟!!

**_ هذا أكيد متزوجها عن طَمع.. بيّعها بيتها وأخذ الفلوس وشرد
ما ينراد لها تحليل..!

**_ أبو ميس.. ياريت بسّ ماخذ الفلوس وعايفهن لحالهن ..
شنو السبب اللي خلاه يحرگ عليهن البيت هي وأمها.. الله ستر
بنتها بسمة چانت بالمدرسة.. رجعت لگت بيت جدتها تأكله النار
وأمها مشمورة بالشارع طالع عظم رجِلها اليسرة وماخذها الدم
وبيبيتها لافّين عليها بطانية مختنقة ولايحه ظهرها النار..؟!!
أنوب خفنا لا يصير على الطفلة شي.. أم عهد سحبتها لبيتنا..