دخل أحمد البيت ، استقبلته بسمة ببسمة وقالت ::
**_ الله يساعدك .. شو تأخرت .. ضلّ بالنا علیک ..
فيان هنا تريد تسلّم عليك ..
**_ وعليكم السلام ..
خرجت فيان ورحبت به ::
**_ الله يساعدك خويه .. ما تشوف شر .. ربي يتم
عليك الصحة والعافية بجاه النبي ..
**_ الله يسلمچ خويه .. شلونچ وشلون بحر ..؟!
**_ الحمد لله على كل حال .. بحر يخصّك بالسلام ..
ودائما يذكر مناقبك ويتنومس بيك ..
**_ بحر خوش بحر .. ربي يحفظه ويبارك بيه ..
ديري بالج على بيته و أولاده ..
**_ ان شاء الله ..
دخل أحمد الإستقبال ، فدخلت عليه بسمة تحمل درق
الماء وسكبت له في قدح قائلة ::
**_ أخذت دواك ..؟!
شرب الماء ثم قال ::
**_ أگعدي أسولف لچ شصار بالسوگ ..
**_ خير .. شصار ..؟!!
**_ سعد ..
**_ ياا سعد ..؟!
**_ سعد ..
و أوما برأسه ، ففهمت أنه يقصد سعد الد.جال ،فقالت
مشمئزة من إسمه وذكراه ::
**_ أعوذ بالله أعوذ بالله .. شبيه ..؟!
**_ من وصلت للسوگ .. شفت الناس مخبوصین
وملتمّین یمّ مصلخ الدجاج والريحة العفنه تطرّ
الراس .. ريحة عطّآب علی زناخه علی لحم خایس
محروگ ولحم دجاج منشوی ومعطّب ..؟!!
سألت شکو .. جيراني بالمحل عباس النجار أبو سدّ
گال ...
هذا سعد .. چان شایل بستوگه و مدري شبیها ..
و‌رجالات السوگ فزعت .. نرید نکضّه ونعرف لیش
رجع بعد غیبه طويله .. بسّ هو انرعب وفزع من عدنا
وانهزم .. عثران مدري واگع والبستوگه مفجور.ه
بیه .. بحيث صاهرته بمکانه .. ومحروگه شکم عربانه مال دجاج یمه .. والحمد لله محد من الناس اللي
بالسوگ متأذي .. لأن بداية ما فتّح السوگ ۔۔
ورایدین يشيلوه من الصبح وما گاردین .. حتی الشرطة ما عرفت شتسوي ویاه ..
عاد گلت لهم جیبو شَفل یشیله هو والگاع النایم علیها ..
وصدگ جابوا شَفل وشالوه .. بسّ شنو .. أعوذ بالله منه
اشلائه بدت توگع وتتگطع شي من وره شي ..؟؟!!!!
**_ إن ربك لبالمرصاد .. سبحان الله .. ربك رجّعه
لنفس الولايه إللي عاث بيها الفساد وغاب عنها .. حتى
الناس تشهد هلاكه .. ومن گدّ ما ظلم ناس .. رب
العالمين مزّقه إلى أشلاء .. ويمكرون ويمكر الله
والله خير الماكرين ..صدق الله العظيم ..
**_ ونعم بالله .. والحمد لله شفت مصرعه هالنجس..
**_ عوفك منه خلّي يولّي ..
**_ اگول شمسويه عشا .. جوعان ..؟
**_ خير من الله .. كبة حلب ولوبیا وتبسي طماطة ..
وفيان مسوية طرشي وجايبة وياها ..
