دفتر مذكرات

دفتر مذكرات..صفحة ١٧و١٨

الصفحة السابعة عشر

دفتر مذكرات،،

بقلم حنان الموسوي *

،،،،،،

وقفت بنات أحمد آمال ومحاسن وولاء مشدوهات لقول ابيهن

وعن ايّ كنز مدفون في بيت شامية يتحدث؟!

ودّع أحمد الفتيات وخرج لعمله، وبقين بناته ملتفّات حول بسمة

ليعرفن من دفن الكنز وأين، فقالت آمال :

**_ بسمة.. أول مرّة نشوف أبونا يضحك ومنطلق.. وعلى يا

ذهب يروح يحفر.. شنو الموضوع..؟!!

**_ ماكو شي بنات.. أمي الله يرحمها مخليه ذهبها ببيت بيبي

بسّ لأن خافت لا يبوگه المخفي سعيد.. خلته بقوطيه ودفنته..

فقالت ولاء :

**_ وأبونا شنو دوره بالموضوع..؟! 

**_ المفاتيح مال بيت بيبي عنده.. وگال من يرجع يروح يطلع 

الذهب.. المشكلة أني ناسيه بالضبط وين دفنته أمي..چان اني 

رحت طلعتهن..؟ 

فقالت محاسن :

**_ هيچ راح تصيرين أغنى وحده بالمنطقة.. بالعافية عليچ 

بسمة.. 

**_ الذهب مدفون صار له أكثر من سبع سنوات.. ويا عالم هسّه 

شگد قيمته.. و أمي ما تشتري إلاّ الذهب الثقيل عيار واحد 

وعشرين.. 

فقالت آمال :

**_ أيي.. أذكرها من تجي تاخذچ.. الله يرحمها الذهب تارس 

ايديها ورگبتها.. أكيد هذي عين وصابتها.. الله يرحمها.. ؟! 

**_ ويرحم امواتكم.. 

فقالت آمال :

**_ يلله بنات.. خلّي نخلص شغلنا حتى نروح للسوگ.. بسمة 

إنتِ تسوين الغدا ويّه محاسن.. واني ولولو ننظف.. تمام.. كون ساعة عشرة احنه مكملين.. 

**_ تمام.. 

انهمكت الفتيات بتنظيف البيت وترتيبه وإعداد طعام الغداء 

وعند العاشرة اجتمعت الفتيات في الصالة فقالت آمال :

**_ وحدة منكم يا محاسن وولاء تبقى بالبيت.. 

فقالت محاسن :

**_ أني أروح.. أريد أشتري لوازم مدرسية.. 

**_ زين لعد ولاء تبقين وراح اخلي أحمد يمچ حتى ما يشلع 

گلبي ونتأخر.. 

**_ ماشي.. بسّ مو تنسون تشترون لي شي وياكم..؟ 

**_ إن شاء الله.. يلله محاسن بدلي .. تعالي بسمة خلّ نرهم لچ