مُقيده بأصفادِ الثأرِ

البارت-24-

جوريه..

رجعت ولميت ابني بوسط روحي اخاف عليه من الهوا
دورت على شغل واشتغلت فراشه بعياده مال دكاتره
اخذه وياي واكعده يمي لحضه مااغفل عليه واعوفه

اشتغلت خاطر اعيش ابني ماخلي يعتاز لاحد
اخلي يكمل ويدرس ويرفع راسي

رجعت من العياده وياي ابني نتمشى ونسولف انه وياه
طبيت جانت الوجوه مكلبه ماهتميت طبيت سبحت واكلت انه وابني وفرشتله يمي ونمت

ثاني يوم هم الوجوه ماتسر
انه دوامي بالعياده جان ساعه 3الضهر
سالت امي شبيج يمه صاير شيء مضايككم

-لا يمه ماكو شيء بس عوايلنه وجهالنه هواي
والبيت مايلحك

-فتهمت قصدهه وعرفت علتهم
شافوني شتغلت وابني يمي صرت عليهم ثكيله
وحسبو حساب للكمتي

كمت وطلعت من جزداني عشره

-يمه هاي عشره مال اكلي وشربي ومنامي
اني وابني يمكم هم ميصير اثكل عليكم
واني راح انطيج يوميه 5لان تدرين راتبي مايكفي انطيج يوميه عشره يخلص هو كله 300

اخذتهه مني وكالت يي نعمه والله اني خوانج يضغطون عليه يكولون احنه عوايلنه كوه مدبريهه نوب بزره خواتنه

-يي يمه حقج

"بني ادم عضمه ثكيل على روحه نوبات تردي مايثكل على اهله "

-كفخات من كل جهه تجي عليه
نوب المحامي هم لازم انطي
كلت اسوي سلفه واسدده من الباقي الي من الراتب
بس هيج ماراح يضلي مصرف واني عندي ولد
يريد لبسه اكله شربه

شغلت ابني يم الاسواق الي يم العياده وينطي يوميه عشره

كمت اخذ العشره واضمهه واصرفله مني
سويت سلفه خاطر انطي اتعاب المحامي
وضليت اجاهد واتعب وانتضر الفرج من صاحب الفرج
________

يسر ...

كرهت حسام لدرجه صرت ماطيق اسمع اسمه
وجوده ينرفزني وياي بنفس الغرفه

حيل حقير واناني
يسحبني للفراش شوكت ميريد ويروح يخابر بالبنات
وكدامي واشكال الحجي والغزل اسمع باذني

كلشي اتحمل واصبر واسكت بس احس انهان
وانداس واني اسمعه يحجي وي غيري كدامي

المره حته لو جانت تكره زوجهه بس متقبل تشوفه يروح لغيرهه
صعبه عليهه وشعورهه وكرامتهه

اني انداسيت
والحمل تعبني ورضا متعب هم مينام بس يبجي

استنزفت كل طاقتي واني عقلي يفكر ويحجي
ويتذكر كل لحضه وكل كلمه
واني انوم برضا ماقبل ينام واني منهاره احس بركان وانفجرت لزمت رضا وضربته

هو طفل متجاوز عمره الاشهر
بس مو بايدي
بهاللحضه رضا فرفح بجي رجفت ايدي وبجيت حيل وعيطت عياط طلعت كل المكبوت بداخلي على صيغه عياط