في فحمة الليل

بارت 43

بقلم NabaaAlZubaydi

# في فحمة الليل

بارت _ 43 _

‌‏⠀
بعيوني أريدك تجي لو بس حلم عابر
انطيني نسمة هوى وبراحتك سافر
من دونك اني ترا متلعثم وحاير
لو گلبي لو خاطري ماأعرف شكاسر!

| إيهاب المالكي

صابرين _ مريم اليوم عدنا سهره شلون لازم تجين

مريم _ صبو فدوه ترى كلش تعبانة ابد مو مال اطلع اليوم

صابرين _ منو يعوض مكانج؟؟

مريم _ البنات موجودات ماكدر سني ديوجعني وراسي حينفجر ..

فرح _ خليها صبو ديوجعها سنها احنه ابدالها

صابرين _ مو كتلج سووي السنج خوما يوميه هيج يوجعج وضاربة الشغل

مريم _ ترى مصار اسبوع من وجعني وداخذ مسكنات.. مابيه احجي كافي فدوه

باوعت عليه مراضيه وطلعت

تقى _ هاج هذا قرنقل خلي عليه

فرح _ مديفيد بيها نطيتها بخاخ وكبسول ولا ديأثر هذا التهبت اللثه

تقى _ كله من وراها كم مره أكلها لتشربين شي بارد وحار ... اذا هيّ تشرب حليب حار منا وتشرب مي بارد فوكا شتريدين يصير بسنها

مريم _ سديت حلكي واشرلهن يطلعن موتني بس يلومن بيه والمشكله انا اخاف من الإبر مااتحمل

عسل _ ايييي ايييي رح نطلع برا نبدل يم ايتن والبنات لتظلين تونين فوك روسنا

طلعنا وانا ائن من الوجع والبط مثل السمجه ... كلشي ولا وجع السن يذبح يموت يضرب على الأذن والرأس والأسنان الفوك كلها دكوم تصل عليه

اااااااه يااابه عيني وينك حموووووت من الوجع

انفتحت الباب مادري منو لان عاصره نفسي بالمخده من الوجع

تقى _ مريم شلون اتركج وحدج

اشرتلها بأيدي روحي وانا ابجي

تقى _ خوما تبقين وحدج اخاف يصير بيج شي

مريم _ تقى روحي كوه داحجي من احجي يفوت هوا روحي صبو هساع تحجي عليج .

تقى _ والله بالي يمج

اشرتلها تروح مابيه حيل كلمه تطلع مني

تقى _ ماشي حروح بس أمانة اذا صارلج شي او حسيتي بشي اتصلي عليه

هزيت راسي وطلعت .. طلعوا كلهم وانا الوجع زاد عليه حتى كلبي احسها ضاق النفس بيّ

ابجي واون من الوجع تقريبآ ساعتين وانا بالويل

اندك الجرس بس مابيه اكوم افتح الباب مره مرتين استمر الجرس والباب يندك سوه