كرونيك أنتِ لي ( باللهجة الجزائرية )

البارت الثامن و الخمسون

يبس مراد في بلاصته و حس لرض دارت بيه في هاديك الدقيقة ... كان يستنا فيهم على أحر من الجمر و موجدلهم غرفة معمرة بالألعاب و فرحان علاخاطر رايح يولي أب بصح مين عرف بلي واحد فيهم مات الفرحة تاعه ماكملتش ...رجع خطوة لور و تكا على الحيط لي موراه مصدوم من الهدرة لي سمعها ...

منال : نقدروا نشوفوا إيمان ..

الطبيب : دروك لا حتى تفطن من تأثير المخدر تقدروا تشوفوها ...

مراد : نقدر نشوف البيبي ؟

الطبيب : البيبي رآه فالحضانة تقدره تشوفه ...

مراد : لا قصدي لي مات ...

منال : مراد خلاص هادا ملايكة و ربي ماكتبهش علاه تشوفه حتى قلبك يزيد يضرك ...

جنان : مراد ... خالتي عندها الحق ...

عينين مراد ولاو حمرين كيما الدم والحزن باين فيهم
حتى منال و جنان انخلعوا فيه علاخاطر كان دايما ثابت و حتى حاجة ماتهزه بصح اليوم كان يبان ضعيف و مهزوز كأنه رايح ينفجر في أي لحظة ...راح الطبيب و خلاهم واقفين تما حتى لي شافوا زهرة و محمد جايين عندهم ... غير وصلت زهرة و شافت وجه مراد و حالته كي كانت دايرة بالدم راحت تجري عنده ...

زهرة : مراد واش هاد الدم لي رآه فيك ... كاش ماصرالك ...

جنان : لا ماما مراد رآه بخير هادا دم إيمان ...

زهرة : ولدت و لا مازال ...

جنان : ولدت بصح ...

زهرة : بصح واش ...

جنان : واحد من التوأم مات ...

طلعت زهرة راسها و شافت مع مراد لقاته متجنب عينيها و مدور راسه باش مايشوفش فيها ... شداته من وجهه و دوراته عندها ...

زهرة : مراد لازم تكون قوي ولدي ... هادا مكتوب ربي ...

هز مراد راسه بإيه و شدلها يديها لي حاكمينه من وجهه ...

مراد : إيلا كيراهي ...

زهرة : الحمد لله ولدت بخير و جابت ولد ..

جنان ( بصدمة ) : كيفاش ولد هي فالأساس عندها بنت ...

زهرة : معلاباليش حتى حنا و انصدمنا غير هاداك المسخوط لي مابانش عليه مخلوع ...

جنان : أنا كنت معاها مين عرفنا بلي عندها بنت كيفاش يطلع ولد هادي لي تخليك تحير ...

زهرة : بالاك الطبيبة غلطت ...

جنان : إيه بالاك ...

مراد : ولد و لا بنت غير كيفكيف المهم هي راهي مليحة ...

زهرة : شفت البيبي و لامازال ...

مراد : لا مازال ...

زهرة : هيا نروحوا نشوفوه مع بعض ...