كرونيك أنتِ لي ( باللهجة الجزائرية )

البارت الأول

شومبرة صغيرة ألوانها وردية في قصر كبير باين بلي مولاه عنده الدراهم و تاعب عليه ، دخلت الشمس من تاقة و تغلغلت في شعرها الطويل لي طايح على عينيها و ما مبين والوا في وجها حلت عينيها ميتة بالنعاس و بدات تزڨي " يااا الخر##ية تاع إناس بلعي تاقة و لااا غاضي نوضلك " .
ردت عليها هاديك لي تسڨم في روحها عند المراية و باينة بلي خارجة .
إناس : حوجي مالكي خلعتيني نايضة على صباح ربي تزڨي
إيمان : لو كان بلعتي تاقة البارح فليل منزڨيش عليك ، بن عمي ما تخلوش ڨاع الواحد يرڨد في غرضه .
إناس : ياختي تباتي دايرة رايك فليل في تليفون و دروك تڨوليلي منخلوكش ترڨدي ، و ديجا نوضي راح الحال على الجامعة باش نروحوا كيف كيف .
إيمان : مممممم😴😴😴
إناس : نوضي ولا نعيط لماما تعرفيها يلا جات و تلاقاتك راڨدة ليوم ميفوتش على خير .
إيمان : صاي غي بلعي راني نايضة .
إناس : نتي حمبوك كي تزوجي كي غادي ديري ، ترڨعدي حتى العصر واقيلا.
إيمان : أنا ندي لي يخليني نرڨد مشي حتى لعصر حتى للمغرب ، واحد كيما وليد مثلا 🥰.
إناس : يااا ختي لحب شايدير ، خلاك تشعري على الصباح .
إيمان : مازال ماسييتيش الشعور علابيها راكي ديري هاك ، مشي لا تشعري تحسي روحك طايرة في سما .
إناس:
لا يا ختي مسييتش و مارانيش حابة نسيي ، و لوكان يسمعك بابا و لا أمين و لا إسلام يديرولك سعدك في يديك .
إيمان :
مين غادي يعرفوا كون مايڨلهمش كاش واحد
إناس : صحا نوضي و خليني مل مشاعر تاوعك ، راح لحال هياا.

ناضت إيمان دخلت salle de bain توضات و خرجت صلات و راحت توجد روحا لبست حجاب طويل ( متحجبة) بقالها غي خيمارها راحت تسڨمه ڨدام المراية تلاقات ختها إناس مازال تسڨم في خيمارها .
إيمان : مخلوعة غي في روحك و ديجا بعدي خليني نسڨم خيماري
دمرتها و جات في بلاصتها
إناس : غيارة
دارتلها إيمان بوجها 😑😑
هودت إناس تحت و بعد ماكملت إيمان لحڨتها ، تلاقاو ڨاع العايلة مجموعين يتقهواو في جاردان تاع القصر ، يماهم منال و باباهم سليم و خوتهم أمين و إسلام
إيمان و إناس : صباح الخير
العايلة : صباح النور
سلموا على باباهم و يماهم و جمعوا في طابلة يشربوا في القهوة، نطق إسلام
إسلام : واش أمونة تاعنا راهي نايضة بكري اليوم على غير العادة
إيمان : أنا دايما نوض بكري هادي مشي الخطرة لولة و ديجا لها في قهوتك خيرلك .
أمين : خلاص إسلام بركا ماديرونجيلي في صغرونتي و لا ماغاديش نطلڨك ليوم بالخدمة .
إناس : واه باينة غي هي صغرونتك و أنا مكاش لي يحوس عليا ☹️
إسلام : نتي صغرونتي أنا و ديجا هادوا زوج مايغلبوناش
ودار إسلام لإيمان 😏
منال يماهم : خلاص بديتوا تقرقيج تاعكم على صباح ربي ، و هيا نتوما راح الحال على القراية .
إيمان و إناس : صحا ماما .
ناض أمين و إسلام رايحين للخدمة فالشركة تاع باباهم .
ناضت إيمان و إناس و دعوهم و جاو خارجين ، صونا تليفون تاع إيمان عند الباب .
إيمان : آلوا وي يا لالة وين راكي
شراز : نتي لي وين راكي أنا راني عند الباب تاع الجامعة
إيمان : أيااا صحا أنا راني في الطريق
نطقت إناس حداها : شا تكدبي هاداوين راكي خارجة ، الشيرة مسكينة عندها ماتقارع .
إيمان : ششش خما نخيطهلك ، لوكان مڨلتلهاش هكا متقارعليش .
إناس : 😑😑
خرجت إناس و إيمان تلاقاو شوفير يقارعلهم عند الباب ركبوا و قلعوا متجهين للجامعة .

############################

نخلوا بطلتنا و نروحوا لبلاصة وحدخرا في فيلا أقل ما يقال عليها فخمة ، في وحدة من شنابر تاع الفيلا نلقوا شومبرة لونها كحل كلي راهي تعكس في شخصية مولاها ، راڨد بشورت برك و مالابس والوا ملفوڨ ، حتى صونا تليفون رفد و هو منارفي
مراد : آلواا
السكرتير : صباح الخير monsieur مراد اليوم عندنا إجتماع مع شركة بريطانية على 8:30 .
مراد : مشي كان على 9:00
السكرتير بخوف : المم موعد تبدد دل فجأة ماعلاباليش علاه .
مراد : الموعد تبدل و لا نتوما ماراكمش تخدموا خدمتكم ، يليقلي ڨاع نصفي جدكم باش تترباو ، وجد للإجتماع راني جاي .
السكرتير : حاضر monsieur م
قبل مايكمل هدرته كوبا عليه و ناض دخل salle de bain توضا و صلا صلاته و راح لبس قشه شوميز بيض مع سروال و دار بارفان تاعه لي تطيح الشيرات مين يشموها و بلا ماينسى ساعته و خرج هود تحت صاب ڨاع العايلة مجمعين يتقهواو و العنقود تالي تاع الدار جنان و جهان دايرين الحس و يزعقوا جنان هاربة و جهان تجري موراها حتى زدمت في حاجة يابسة كي الحيط طلعت راسها تلاقاته خوها الكبير مراد بعدت و حطت راسها مل خوف .
شاف فيها مراد هي و جنان متحت للفوڨ تلاقاهم لابسين سروال مع ليكات و دايرين في زوج خيمارات ، كانوا خارجين رايحين للجامعة .
مراد : متكبريش ڨاع نتي وياها ، و ديجا شايالا هاد لبسة نتي وياها ، طلعوا بدلوا و لبسوا حاجة طويلة .
جنان : مراد أناا والله ..
قبل ماتكمل هدرتها نطقت يماهم زهرة لي كانت تشوف فيهم و عارفة عقلية ولدها .
زهرة : خلاص مراد كانوا رايحين يقروا و ديجا لبستهم مابيها والوا .
مراد : صباح الخير .
الجماعة : صباح النور .
قبل مايدخل يجمع فوق الطابلة تاع القهوة دار ليهم و نطق .
مراد : روحي نتي وياها تقروا و حرزوا برك راني نعس فيكم في هاديك الجامعة تغلطوا غلطة و علابالكم شايالا تخلصوها غالية .
ودار دخل جمع في الطابلة و بدا يتقهوا ، وهوما مازالوا واڨفين و الدمعة متحجرة في عينيهم، دارت ليهم يماهم تغمز فيهم بلي عقليت خوكم راكم تعرفوها ، حطوا رسانهم و جاو خارجين رايحين يقروا للجامعة .
جمع مراد في طابلة لي كان مترأسها جده الكبير عزيز ، كانوا ڨاع ساكتين حتى نطقت زهرة .
زهرة : مراد عينيا ولدي الوحيد رانا حابين نهدرو معاك في موضوع تناقشناه أنا و باباك وجدك البارح ...
مراد : راني عارف هاد الموضوع لي بي تهدري فيه غي نسيه يما .
زهرة : وليدي حابة نفرح بيك و نشوف ولادك إيلا ختك صغيرة عليك راهي مخطوبة و قريب تتزوج و نتا ....
ماجات تكمل هدرتها حتى ناض و ڨالهم
مراد : أيااا منبعد إنشاء الله عندي إجتماع و راح عليا الحال .
سلم على راس يماه و خرج ركب في لوطوتوا و قلع متجه للشركة...