كرونيك أنتِ لي ( باللهجة الجزائرية )

البارت الثاني و الستون

طلعت راسها بالشوية تشوف في شكون اصطدمت حتى لقاته هو قدامها بشحمه و لحمه ... الوجه لي عذبها ليالي طويلة و طول هاد الخمس سنين ماراحش من بالها ... العينين لي تمنات يعاودو يشوفو فيها بحب كيما كانو قبل و لا كتر ... توقف الزمن للحظة وهوما مازال يشوفو في بعضهم ... عينيهم متقابلين في عينين بعضهم ... الذكريات لي عندهم خمس سنين ولاو يروحو و يجو في راسهم  مراد معقد حواجبه و باين فيه مصدوم و إيمان توترت من النظرات تاوعه و بدات تلعب بيديها ...
ساد الصمت بيناتهم و حتى واحد فيهم ماحكى كلمة
حاولت إيمان تنطق و تهدر معاه بصح شفافها خانوها
و انعقدو و ماقدرتش تنطق و لا تخرج الكلام من فمها .. طول الطريق و هي تدير فالشجاعة و الكوراج لروحها باش تعاود تشوفه بصح مين جات فالصح عينيها ماقدرتش تحطهم في عينيه ... حطت راسها مربوثة من شوفاته لي وتروها ... في هاد الوقت وصل ياسين و إيناس عندهم لقاوهم على هاد الحالة ... دور مراد راسه و شاف فيه بنظرات مايتفسروش ... ياسين غير شافه يخزر معاه هكا فهم بلي  رايح يطرطق في أي لحظة عليه ... دخل بيناتهم و حاول يلطف الجو شوية ...

ياسين : مراد ... واش راك صاحبي ...

مراد : كي شفتك ماوليتش مليح ...

ياسين : هههه نعتبره مدح هادا ؟

مراد : يبانلي نقص فالضحك تاعك شوية علاخاطر ماراهش فالمكان الصحيح ...

ياسين : هههه خلاص مالا ... قولي عماد جبته معاك ؟

على سيرة عماد رفعت إيمان راسها بلخف و شافت في مراد تستنى فالجواب تاعه ... دور عندها غير بالشوية و شاف فيها لقا لمعة تاع دموع في عينيها لي كانو مهزوزين من اللهفة ...

مراد : خليته فالطونوبيل ...

ياسين : مادام هكا خلينا نروحوا عنده مع بعض ...

مراد : واش تقصد مع بعض ...

ياسين : أنا و إيناس و إيمان ...

مراد : ياسين ... ماتقعدش تهدر غير لي جابهالك راسك ... علابالك مليح بلي عماد مايلقاش الناس لي غريبة عليه ...

إيناس : أيواااا نتا والله غير فضحت ... طفح الكيل معاك ... كيفاش هادي غرباء عليه ...

ياسين : إيناس سكتينا و مادخليش روحك ...

مراد : لوكان قلتولي من قبل كاين ضيف معاكم مانجيش و نتعب روحي حتى لهنا ...

عضت إيمان على شفافها على كلامه لي يجرح ... معنتها هي ولات وحدة غريبة بالنسبة ليه ...ماعندها حتى معنى في حياته ... بداو دموعها ينزلو على خدها و ماقدرتش تزيد توقف قدامهم ... تنفست بصعوبة و دارت شهيق زفير و طلعت راسها و شافت فيه ...

إيمان : جيت نشوف عماد و نروح ...

مراد : ههه عماد ... شكون عماد هادا !! ... واقيلا حبيبك ...