كرونيك أنتِ لي ( باللهجة الجزائرية )

الفصل الخامس و العشرون

خرجت جنان من عند إيمان و رجعت للدار وصلت تلاقات يماها و باباها هدرت معاهم شوية و طلعت لبيتها باش تبدل قشها غير دخلت تلاقات جيهان متكسلة فوق الفراش على ظهرها و غايسة و تخمم ووجها حمر باينة بلي كانت تبكي ... حطت صاكها و راحت ليها

جنان : مالكي نتي وجهك مڨلوب

جيهان : والوا

جنان : والله غير تهدري ... واقيلا عاود مراد هدر معاك

جيهان : لا ماشي مراد

جنان : ايواا شكون

جيهان : هاداك الحمار تاع ياسين

جنان : علاش كان هنا ؟!

جيهان : ايه كان هنا

جنان : اياا نتي على هادي راكي ڨالبة وجهك

جيهان : ....

جنان : نتي الحمارة مشي هو ... السيد عايش حياته و ماشي حتى مقيمك و نتي غير تشوفيه تتبدلي تقول عندك جنازة

جيهان : مارانيش قادرة ننسى الله غالب

جنان : باسكوا ماعندكش كرامة

جيهان : جنااان

جنان : خلي عندك نيف شوية ... ماشي لي يجي تجري من موراه

جيهان : غير ياسين لي مانقدرش ننساه و يجيني الف واحد

جنان : تقعدي كيما هاك جايحة و ماتتبدليش

جيهان : خطيني من هاد الهدرة و حكيلي شادرتي فيها

جنان : شادرت ؟ مادرت والوا ... حاجة ماقدرت نجيبها ... بصح راني متأكدة من حاجة وحدة إيمان إيمان ماتحبش مراد و ماشي عاجبها

جيهان : حمبوك شايعجبها فيه ... واحد مسيطر و يمشي الناس في يده كي الخاتم في صبعه ... أنا وحدة من الناس راهي شافتني كيفاش راح تكمل حياتها معاه ... أنا في بلاصتها نهرب و مانتزوجش بيه

جنان : ششش هدري بالشوية لوكان يسمعنا

جيهان : خليه يسمع أنا اصلا ماراه يهمني والوا بعد الطريحة لي كليتها من عنده

جنان : نتي جبتيها لروحك باسكوا ماتدوريش نيشان

جيهان : راني حاسة ماما الزاوجة راهي قدامي ماشي التوأم تاعي 

جنان : علاش أنا نفوت التوأم تاعي ... هادي جامي الا تصرا

قربت جنان عند جيهان و بدات تدغدغ فيها من كرشها و جيهان شادتها و تضحك

جيهان : جنااااان

جنان : مانروحش منا حتى نضحكك

جيهان : ههههه خلاص بعديني