كرونيك أنتِ لي ( باللهجة الجزائرية )

البارت السابع و الستون

راقدة في بلاصتها على سرير و تشوف فالسقف و دموعها راسمين طريق على خدها تتفكر في هدرته و خزراته ليها حابة علاقتهم ترجع خير من لي كانت بصح بعد لي شافته اليوم فقدت الأمل ومحال يعاودو يرجعو ينجمعو تحت سقف واحد ...الجرح تاع مراد مازال مايبرا و الخيانة تاعها مازالت قدام عينيه ... ماعرفتش واش تدير باش ترجعه ليها في كل مرة هي تبادر و تتنازل و تحاول معاه بصح للأسف هو يصدها و يسمعها كلام يجرح و يطعنها في شرفها بهدرته القاسية ... هبطو دموعها مين تفكرت عماد ولدها لي متمنية يجي نهار و ضمه لصدرها و تشم ريحته ... تخمم كيفاش رايحة تكون ردة الفعل تاعه مين يعرف بلي هي أمه ... خايفة مايتقبلهاش و تجي مرا وحدوخرة و تديه عليها تنهدت بالصوت من الأفكار لي يجوها في راسها حتى سمعت صوت الباب لي تفتح دورت راسها لقات إيناس واقفة و تشوف فيها ...

إيناس : واش راكي ديري ...

إيمان : نتي لي واش راكي ديري هنا مشي من المفروض تكوني في دارك ...

إيناس : واش نفهم من هاد الهدرة ... راكي تحاوزي فيا !! و أنا لي جاية هنا غير علاجالك ...

إيمان : ماقتلكش رواحي علاجالي ... و ماتقعديش تشوفي فيا هاد الشوفات تاع راني غايضاتك تعرفيني بلي نكرههم ...

دورت إيمان راسها  و رجعت شافت في السقف ... غلقت إيناس الباب و قربت عندها و جمعت حداها

إيناس : علاه راكي ديري كيما هاك ...

إيمان : خرجي و خليني وحدي ...

إيناس : إيمان ...

إيمان : قتلك خرجي ...

إيناس : ياسين عرف وين القبر ...

قفزت إيمان من بلاصتها و شدتها من كتفها مصدومة
و في نفس الوقت فرحانة ...

إيمان : تحكي صح ؟

إيناس : إيه و ادا حبيتي تروحي غدوة يديك ياسين ليه بصح ماتهدريش قدام مراد و لا رايح يزعف من ياسين و يدير حالة ...

إيمان : لهاد الدرجة حاب يعاقبني حتى قبر ولدي منعرفش وين ...

إيناس : نهار لي دفنه حتى ياسين و ماقالهش وين خاف لايهدر قدامي و انا نقولك ...

إيمان : قصدك يبعد عليا الحي و الميت هكا ؟

إيناس : مراد كان مجروح هاداك الوقت ماكانش في عقله و كل شي داره أنا لوكان جيت في بلاصته ندير نفس شي ...

إيمان : توقعتك تقولي هكا ... أصلا نتي أكثر وحدة فالدار كنتي تحفزي فيا باش نتزوجه و نتي علابالكي منحبوش ...

إيناس : واش نفهم من هاد الهدرة ... يعني مازلتي متحبيهش هكا ؟

إيمان : لا مانيش نقصد هكا ...درك كل شي تبدل هاد الهدرة كانت قبل خمس سنين ...أصلا درك لوكان جيت صح منحبوش و معنديش مشاعر من جيهته منروحش عنده نخدم ...