كرونيك أنتِ لي ( باللهجة الجزائرية )

البارت الخمسون

أولا حبيت نعتذر منكم على لي طولت عليكم راني مشغولة سمحولي بصح راح نعوضكم إن شاء الله ودرك نبدو فالبارت
..................
كانت ايمان في لاشومبر تاعها مجمعة فوق سريرها و تلعب بيديها خايفة ادا كان صرات حاجة لجنان ولا جبدت تيليفونها و هي تشوف فيه تخمم ادا تعيط لزهرة و لا كاش واحد فيهم يطمنها بصح تفكرت مراد لي رآه معاهم ادا عرف بتيليفون لي عندها يصرولها مشاكل و ينحيهلها و ماتزيدش تهدر مع وليد ، قعدت على هاد الحالة تشوف فيه حتى لي سمعت صوت طبطيب فالباب ناضت من بلاصتها و راحت فتحت حتى لقات منال في وجهها ، من الصدمة ماعرفتش واش تقول و لا واش تهدر و لي زاد كمل عليها النظرات تاع منال ليها ..

ايمان : ماما هادي نتي واش راكي تديري هنا ..

منال : مازال وجهك صحيح و تقوليلي ماما لا حيا لا حشمة ..

جات ايمان تهدر معاها و تحاول تفهم منها حتى شافت اسلام طالع مع الدروج و جاي عندهم ، تصنمت في بلاصتها من الصدمة و لسانها تعقد ، خزرت في منال لي كانوا عينيها عليها من لي فتحت عليها الباب مانحاتهمش ، غير وصل اسلام عندهم جبد ايمان من يدها و جرها وراه داخل لشومبرتها و هي مازالت مصدومة و رماها على السرير و منال لحقاته و غلقت الباب وراها ، ناضت ايمان من بلاصتها ووقفت لإسلام في وجهه ..

ايمان ( بالعياط ) : تعاود تحط يدك عليا نقطعهالك يا وحد ال ...

قبل ماتكمل ايمان هدرتها حست بكف هبط على وجهها من منال لي جبدتها عندها ، حطت يدها على خدها تتحسس فالضربة بيديها ، طلعت راسها و شافت في منال لي كانت واقفة قدامها بينها و بين اسلام لي كان غير ساكت و ماقال حتى كلمة ...

منال : ماتحشميش ياوحد الفاسدة ..

اسلام : لسانك مازال طويل كيما بكري ... مافهمتش علاش ماحبيتيش تتربي ..

ايمان : هههه وليت فاسدة درك ... روحي ربي ولدك لي هو أكبر فاسد في هاد الدنيا و من بعد حاسبيني

شدت منال ايمان من دراعها و قربتها عندها و حطت وجها في وجه ايمان لي كانوا عينيها حمرين و الدمعة محجرة فيهم ..

منال : نقتلك و نشرب من دمك ادا لقيتك تهدري مع هادا لي سموه وليد ..

غير سمعت ايمان اسم وليد بداو دموعها يطيحو و تفكرت مين زوجوها بمراد بالسيف عليها و هي تكرهو و ماتحملوش ، بلعت الغصة لي في قلبها و هدرت بهدوء ...

ايمان : وليد هو الإنسان لي نحبو و حابة نكمل حياتي معاه ..

منال ( بالعياط ) : ايماااااان ... نغضب عليك ليوم الدين لوكان تزيدي تهدري معاه ...

ايمان ( بالبكا ) : فهميني أنا نحبو من بكري و جامي يلا حبيت واحد غيرو علاش ماراكمش قادرين تفهموني ...