كرونيك أنتِ لي ( باللهجة الجزائرية )

البارت التاسع

اليوم الحالة مخلطة ، ليوم يرفدوا لميس من دار بوها ، كانوا ڨاع البنات موجدين رواحهم و قاعدين قدام لميس لي لابسة لاغوب و تقارع في الكورتاج و دموعها على عينيها مابغاوش يحبسوا و تعنق في ختها ملاك ، حتى سمعوا طلاكسون و القرقابوا مقلب الحالا برا عرفوا بلي الكورتاج وصل ، دخلت يمات العريس خرجت لميس بالزغاريت ، داروا نسا خيماراتهم و جاو خارجين يركبوا في الطونوبيلات ، جات زهرة يمات مراد عند إيمان تجري
زهرة : إيمان بنتي
إيمان : وي خالتوا
زهرة : وين رايحة تركبي ؟
إيمان : مع إسلام خويا
زهرة : علاه ماتجيش تركبي معانا ؟
إيمان : إيه خالتي فكرة مليحة ، بصح البلاص مايقدش في طوموبيل .
زهرة : إيه عندك الحق
إيمان : واش رايك خالتي تخلي جنان تركب مع إسلام و أنا نجي نركب معاكم .
زهرة : وحدها ؟
إيمان : لا ماتخافيش خالتي راح تكون معاهم إيناس غير ماتتقلقيش .
زهرة : لا بنتي مارانيش متقلقة من خوك ، هاداك ولد ختي و نعرفه غاية ، بصح مراد مايبغيش لوكان يعرف بلي ركبت وحدها معاه .
إيمان : لا متتقلقيش خالتي .
زهرة : هيا نروحوا .
إيمان : نتي سبقيني خالتي راني جاية موراك .
زهرة : صحا بنتي
راحت إيمان عند إناس تلاقاتها رايحة تركب مع أمين ، حكمتها من يدها تهدر معاها
إيمان : إيناس ماتركبيش مع أمين
إيناس : و علاش ؟
إيمان : ديري كيما راح نقلك ، ركبي مع إسلام و جنان بنت خالتي زهرة ، مين يحبس الكورتاج في الطريق باش يتصوروا هبطي و ركبي مع أمين
إيناس : و علاش ندير كيما هاك ؟
إيمان : ديري كيما راني نقلك و خلاص .
إيناس : أوكي
راحت إيمان باش تركب مع خالتها زهرة مين وصلت تلاقات خالتها و بناتها ركبوا مع مراد و جنان واقفة تقارع
إيمان : جنان ياك قاتلك خالتي ، روحي ركبي مع إسلام و إيناس .
جنان : إيه راني رايحة
بعد ماراحت جنان ركبت إيمان في الطونوبيل معاهم من رول حدا جهان و إيلا و خالتها زهرة من القدام حدا مراد لي هبلاته إيمان بزينها و مقدرش يڨلع عينيه عليها ، دور المراية تاع القدام و دارها مقابلة لإيمان باش يشوفها مين يسوڨ ، و إيمان لاهية في تيليفون تخرب فيه و تضحك معاه و ماعلابالها بوالوا و مراد لي كل ما شاف ضحكتها يتبسم بلا مايعبى بروحه .

______________________________________

جنان بعد ماقالولها روحي تركبي مع إناس و إسلام راحت تمشي تحوس على طوموبيل تاعهم حتى تلاقات إيناس تريشلها من البعيد و إسلام واقف حداها ، راحت عندهم
جنان : إيناس رايحة نركب معاك
إيناس : إيه علابالي
جنان و إناس كانوا يهدروا حتى حست جنان بعينين يشوفوا فيها طلعت راسها تلاقات إسلام يشوف فيها و يتبسم ، حشمت و حطت راسها .
إيناس : جنان نعرفك إسلام خويا
إسلام : متشرفين
جنان : الله يسلمك 😍
ركبوا في الطونوبيل إناس من القدام حدا إسلام و جنان من رول ، قلع الكورتاج للصالة تاع الأعراس .
بعد وصلوا في نص الطريق حبس الكورتاج باش يتصوروا ، هبطت إيناس و قاتلهم راني جاية بلخف ، و إسلام فهمها بلي خطة دارتهاله إيمان
نزلت إيناس و راحت ركبت مع خوها أمين ، و من بعد قلع الكورتاج و جا إسلام مقلع حتى هدرت جنان .
جنان : مارايحينش نقارعوا إيناس
إسلام : لا ، بالاك تكون ركبت مع أمين ، رواحي ركبي حدايا في بلاصتها
جنان : بصح ....
إسلام : نورمال نتي بنت خالتي
جنان بعد ماسمعت هدرت إسلام ، هبطت و راحت ركبت معاه ، و قلع إسلام مع الكورتاج و خطرة على خطرة و يشوف في جنان .
إسلام : راكي شابة ليوم
جنان حمارت من الحشمة و منبعد ردت عليه
جنان : الله يسلمك
إسلام : تقري ؟
جنان : إيه في الجامعة
إسلام : و شحال باقيلك باش تكملي ؟
جنان : عامين
إسلام : عندك واحد تحبيه ؟
جنان : ....
جنان تقلقت من الأسئلة تاع إسلام لي تشبه للتحقيق.
إسلام : ماتقلقيش من هدرتي غادي نصارحك ، أنا شفتك البارح و عجبتيني و بغيت ندي نيميروا تاعك باش نتعرف عليك كثر
جنان : أنا ماشي من هاد البنات
إسلام : ماتخافيش مني ، حتى أنا علابالي بلي نتي مشي من هاد الشيرات و ديجا راكي بنت خالتي .
جنان : سمحلي بصح مانقدرش .
إسلام : أنا مارانيش مقلق ، غادي نعطيلك وقت تخمي و ترديلي خبر .
سكتت جنان و حطت راسها و كملوا طريقهم و هوما ساكتين .
______________________________________

من جهة وحدخرا في الطوموبيل تاع مراد كان قاعد غير يشوف في إيمان من المراية و هي تهدر مع إيلا و تضحك حتى هدرت يماه زهرة
زهرة : إيمان بنتي ، شحال باقيلك تكملي الجامعة .
إيمان : هاد العام خالتي ، بقالي 3 شهر .
زهرة : ربي ينجحك بنتي
إيمان : آمين خالتوا
زهرة : ماراهش في راسك الزواج ؟و لا كاين واحد في راسك ؟
في هاديك اللحظة تفكرت إيمان وليد و تبسمت .
مراد بعد ماسمع كلام يماه فرينا على غفلية حتى إيمان راسها تخبط مع الكرسي تاع الطونوبيل القدامي .
زهرة : بسم الله الرحمن الرحيم ، بالعقل وليدي .
مراد مكانش يضوي ، غير يتخيل فكرة إيمان مع وحداخر يبغي يهبل من راسه .
إيمان رفدت راسها و قعدت تحك في جبينها ، حتى هدرت معاها خالتها زهرة
زهرة : إيمان بنتي راكي مليحة ؟
إيمان : إيه خالتي مكان والوا غير خبطة صغيرة .
كملوا طريقهم للصالا حتى وصلوا هبطت إيمان مع خالتها و بنات خالتها و مراد يشوف فيها في طروفيزور تاع الطونوبيل .
دخلوا ڨاع للصالا مع العروس ، حتى شافت إيمان إيناس ختها راحت عندها .
إيمان : درتي كيما قتلك
إيناس : وي
إيمان : مليح
إيناس : مالكي غير تحكي في جبهتك
إيمان : داك المسوفج تاع ولد خالتي زهرة شعرة و يطرطقلي راسي ، و زيد يشوف فيا شوفة تقولي قتلتله بوه .
إيناس : ههههه تستاهلي
إيمان : كلبة ماتحشميش
كملت إيمان طريقها هي و إيناس دخلوا لصالا تلاقاو يماهم تقارعلهم جمعوا في طابلة ، تعشاو ومن بعد جا تبراز تاع العروس ، بدلوا لبنات معاها القش كل ماتبدل حتى لي قطعت البياسمونتي مع العريس و خرجت هي و راجلها للأوتال ، و لبنات رجعوا مع العايلة و لافامي للدار تاع الجد .