دخلت لبيتها راحت لدوش و حلت الما بلا ماتنحي قشها و قعدت تحته تبكي و تندب ، بين نهار و ليلة حياتها تنڨلب ، كانت دايرة بزااف أحلام في راسها تحققهم مع حب حياتها و بعد ماريڨلت كلشي تخرجلها هاد الحكاية ، درك كي غادي دير ، تعرف عايلتها مليح و بالأخص يماها ماغاديش تحوس تعرف هي شاراهي باغية غير باش ماتخصرش علاقتها مع ختها ، عندها لافامي أهم حتى من بنتها لي جابتها من كرشها ، قعدت تبكي حتى سمعت طبطيب في الباب تاع الدوش
ايناس : إيمان
ناضت من بلاصتها و حلت الباب تلاقاتها إيناس واقفة تشوف فيها و الدموع في عينيها ، حتى ختها راهي حاسة بيها و بمعاناتها ، عنقتها و رجعت تبكي و إيناس طبطب على ظهرها
إيمان :(بالبكا) إيناس عاونيني بقيتيلي غير نتي و أمين ، مارانيش قابلاتوا
ايناس : ششش أنا راني معاك
إيمان :( بالبكا) وليد شاراح نقوله درك اااه ؟ نقوله أنا خدعتك ، نقوله رايحة نتزوج وليد خالتي و الثقة لي درتها فيا أنا مانستاهلهاش ، قوليلي شانڨوله ؟
ايناس : رتاحي درك راكي عيانة ، من بعد و نهدروا
إيمان : ماراحش نرتاح حتى نسمع بلي هاد الزواج مكاش منه ، أنا نحب وليد و حابة نكمل حياتي معاه
ايناس : راح نلقاو حل
إيمان : و زيد ماما ماراهيش تحوس عليا يلا أنا راني حابة و لالا ، هادي ضرتني و جرحتني ، إسلام راني عارفاته تاع صوالحه ، بصح ماما ماقارعتهاش منها
ايناس : علاه إسلام واش من مصلحة عنده ؟
إيمان : ( بسخرية ) رآه ضاربها عشقة في جنان ، و يحوس أنا يسهل بيا الطريق باش هاداك لي مايتسماش يعطيهاله
ايناس : ممم علابيها رآه من صباح يهدر
إيمان : رآه غير يشكل مسكين ، درك تشوفي شاراح ندير فيه ، يحوس يلعبلي بحياتي علاجال مصلحته .
سمعوا طبطيب في الباب ، راحت حلاته ايناس و تلاقاته أمين
أمين : إيمان بابا رآه لتحت و رآه يعيطلك
غير سمعت هدرته ناضت باغية تروح شدتها إيناس و قاتلها بدلي قشك قبل رآه مشمخ بالما ، راح أمين هبط لتحت و هي دخلت لدوش بدلت قشها و هبطت لتحت مع ايناس ، غير دخلت لصالون ، قابلها باباها مريح و حداه إسلام و منال ، دخلت قالت سلام عليكم و سلمت على راسه و ريحت حدا أمين ساكتة حتى سمعت باباها يهدر
سليم : إيمان ، سمعت كلشي و عرفت بلي خالتك خطباتك لوليدهاو نتي تعرفي خالتك و حنا نعرفوها و بانلي مكان حتى مشكل
أمين : بابا ، إيمان ....
سليم : راني نهدر مع إيمان
إيمان :( بالبكا ) أنا مارانيش قابلة بابا
أنت تقرأ
كرونيك أنتِ لي ( باللهجة الجزائرية )
Romansa" يا منحبكش ماتفهمش ؟" " غادي تحبيني بالسيف عليك و يلا ماحبيتينيش حبي وحده يكفي " هو يحبها و هي تحب وحداخر ، كيفاش غادي تكون نهاية قصتهم ؟ # حب من طرف واحد # زواج إجباري #تملك #
