كرونيك أنتِ لي ( باللهجة الجزائرية )

البارت الرابع و الستون

كانت واقفة عند الباب وتعدل في روحها قبل متدخل جبدت المراية من صاكها و بدات تشوف مع روحها و تتبسم و في نفس الوقت حاسة روحها خايفة دخلت المراية في صاكها وحطت يدها على صدرها تنفست شهيق زفير تحاول تكالمي روحها دارت خطوة لقدام و دخلت لقات ڨاع الخدامين يشوفوا فيها و يخزروا معاها حست بالتوتر بصح كملت الخطوات تاوعها بثقة و دخلت لاسونسار و طلعت الفوق مين وصلت راحت تمشي حتى وصلت للبيروا لقات سكرتيرة مجمعة عند البيروا تاعها و تخرب فالميكروا قدامها

إيمان : سلام عليكم ...

طلعت ميليسا راسها و شافت فيها مطلعتها و مهبطتها من راسها لرجليها ...

ميليسا : و عليكم السلام ... تفضلي واش تسحقي ..

إيمان : جيت صباح و حطيت دوسي تاعي عندكم و بغيت نعرف ادا قبلتوني و لالا ...

ميليسا : راكي منيتك نتي !!

إيمان : علاه ...

ميليسا : حطيتي دوسيك صباح و تقارعي يعيطولك دروك !!

إيمان : المدير رآه هنا ؟

ميليسا : هدري معايا أنا مشي المدير ...

إيمان : راني باغية نشوف المدير ...

ميليسا : المدير هو لي دارني هنا باش نلقا الناس لي كيما نتيا ...

إيمان : و هو تاني لي قالك تهدري معاهم هكا ؟

ناضت ميليسا وقفت من بلاصتها و راحت جبهة إيمان و قربت عندها ...

ميليسا : من لاخر نتي واش خصك ...

إيمان : الهدرة مشي معاك مع المدير تاعك ...

ميليسا : أنا لي نحكم هنا بعد المدير ...

عوجت إيمان فمها بسخرية و طلعت حاجبها في جيهة و هي تشوف فيها ....

إيمان : و شكون نتي باش تحكمي هنا ...

ميليسا : أنا اليد اليمنى لموسيو مراد و قريبة ليه كتر ماتتصوري ...

إيمان : ههههه باينة على حساب موسيو هادي قريبة ليه ...

ميليسا : خرجي من الشركة دروك و لا نعيط للحراس يخرجوك ...

إيمان : يلا نتي مرا خربي فيا ...

ميليسا : يا أنا يا نتي في هاد الشركة ...

إيمان : و نتي قلتيها ..