عودة_للأنتقام

10

#عودة_للأنتقام 10
(غسـق) Misho mohammed
•
•
•
•
•
•
•
•
اول شي الله يرحم كل الموتا في شرق ليبيا وربي يتقبلهم برحمته يارب
ويرجع المفقودين بسلامه يارب
امس الجو كئيب الصراحه مجاش من قلبي انزل ونكتب والناس قاعده تموت 💔
بس مافي اليد حيله غير الدعاء ❤️‍🩹
لا حول ولا قوة الا با ﷲ العلي العظيم
ياريت حملة استغفار الاستغفار يرفع البلاء ربي يرفع البلاء ع البلاد استغفروا رجاء خاص
أستغفر الله العظيم وإتوب إليه
وادعو لـ بلادكم 🇱🇾❤️‍🩹
.
.
.
ديجور مصدوم قربله الشرطي وطلع بروحه قعد ف الممر
قعد مع الشرطي وقت لعند وصلت دنيا واسماء ووردة
الشرطي قربلهم: للو سمحتو نبي حد نتناقش معاه
اسماء شافت دنيا: خشي انتي وجداك
دنيا خشت وهي لم شافت ديجور ماشي ف عقلها ان يوسف هدا صاحب الصيداليه
واسماء برضو مفكراته صاحب الصيداليه يوسف لانهم نسخه من بعض
فكراته واقف عنده مريض هني وبس
الشرطي: قعدت نستنى لعند مايجي حد من عيلة البنت لداخل عشان نعرف لو بتقدومو شكوى او لا
اسماء كانت حاتقدم شكوى بس
بس دنيا قالت لـ سهى ان امها برا مع الشرطى
سهى طلعت: ماما
اسماء تلفتت
سهى شافت الشرطي: مافي حد ضربني تقدر تمشي انت
اسماء خشت متعصبه
الشرطي هز راسه ونزل
سهى قربت ببطيء لديجور: مش ساد لصار فيا قاعد ماد وجهك؟
ديجور تعصب: انا مفهمتش علاش جايك اصلا
سهى تشوفله بشمزاز
ديجور: بس باين القصة فيها اسمي
شي كبير سببتهولك يخليك تتحسبي فيا !!
سهى بهزوه: انا بمنظري هدا ومش شي كبير؟
ديجور بدي يفهم سكت تواني يفهم : انا ... غير اصبري قصدك انا .... انا ليا يد بلخدوش هادي؟
سهى تشوفله بهزوه: حسبي الله فيكم الخمسه ماعندي شي نقوله .. وخشت وصكرت الباب قعدت تبكي
ديجور قارن حواحبه يحاول يفهمم لفهمه ان ليه دخل بحالتها
سهى قعدت تبكي
اسماء قربتلها: اشكي فيه اشكي
سهى تبكي ومطبسه مش قادره توقف ع حيلها: ضربني وانا مش هكي انا مش هكي.. انا مش هكي.. مش هكي
.
.
امجد خش قعمز: انت داير فالطه ف ماكلتك
يوسف: فكني من الماكله السمراء والشوفان والماكله بدون طعم لكاتبه ربي بيصير
امجد شاف شاهين: عمي قاسم عنده سكر ولا
شاهين: اي وماكلته منظمه مش اي شي ياكله عادي
مراد: المرض غريب ربي يشفي مرضاه
ايمن ضحك: مراد حبي انت الغريب والله حسستني انكم عيلة شاربه ديتول ماتمرضوش
مراد: الحمدالله عفانا الله
شاهين: اختي اخصائية تغدية وهي منظمتله ماكلته وتقيسله ف السكر ف دمه ومهتمه بنظام ماكلته
امجد: كويس .. باه اطلع ديلها اتصال شوف شن الحاجات لياخدها والحاجات لنبعدوه عليها
يوسف: مش صغير انا حتى انا نعرف مصلحتي مش لهدرجه
شاهين قام تلفونه وشافله: اسكت انت
شاهين طلع رن ع شهد وقاللها صاحبه مريض بس معرفش ان يوسف هو المريض
شهد: كيف يعني شن تبي انت شي توا ياكله او عشي او فطور؟
شاهين: كله ز بوي ديريله جدول
شهد: صاحبك كم نسبة السكر ف دمه؟
شاهين خش والهاتف ع وذنه: يوسف كم نسبة السكر ف دمك؟
شهد نصدمت
ايمن ضحك: يوسف مولي ز السكر وحني ملتمين عليه ز النمل
يوسف: مش عارف يا شاهين معاش قست.. صكر صكر مانبيش لا ماكله سكر لا نفخ
شاهين: قالك مانعرفش وهو جعان شن ياكل؟
شهد: باه هدا مرات يكون سكره منخفض ومحتاج شي حلو ومرات سكره مرتفع ومحتاج شي يمتص السكر كيف بنقولك انا
شاهين: اياه هي هكي
شهد: اسأله حاسس بصداع او دوخه او غبش ف عيونه قولي شن يحس؟
شاهين شاف يوسف: مصدع او دايخ او فيك شي؟
يوسف شافله وسكت
امجد: يوسف الموضوع جديات ره لو عدلت سكر ف دمك ممكن تشفى ماتكونش مستهتر
يوسف تعصب: مافيا شي طبيعي
شاهين: قالك مافي شي
امجد: شن الاحاجات الممنوع عليه ياخدها
شاهين: شن الحاجات ممنوعه عليه؟
شهد: مشروبات غازية ممنوع وخبزتنا البيضاء ورز الابيض والعسل والعصاير
شاهين: حتى عصاير الطبيعيه ممنوع
شهد: عصاير الطبيعيه شن طعمتها هي اميه وسكر وفؤاد الفاكه كلها مشت
بدل مايشرب عصير طبيعي ياكل الفاكهة عادي بدون عصر
بس ممنوع دلاع واناناس وتوت العادي متع الحوش
شاهين شاف يوسف: هلبا حاجات ممنوعه
يوسف سكت
شاهين: باه شن يتغدى توا؟
شهد: شاهين ضروري يهتم ويقيس نسبة السكر ف دمه
بس لو مش حاسس بدوخه وضباب ف عيونه وصداع يعني اموره تمام مؤقتا
بس خليه يتغدى شربة عدس مع خبزة سمراء ونص تفاحه بس نصها بس شاهين
شاهين ضحك: التفاحه بروحها معاش تقدر تاكلها
ايمن: ماتتكنطاش يوسف هدا توفير
شاهين: تمام ماشي.. وصكر الخط
شاهين قعمز: شوف قالتلك ممنوع مشروبات غازية
يوسف: شن حالك شاهين قتلي انا عايش ع المشروب الغازيه وطاقة خطاني با الله عليك
امجد: بلاش **** تو يجي ديجور هداكا يعرف طبك
مراد: كول ز الناس تربح امبارح دخت بس وكلنا خشينا ف بعضنا ماشيين اربعه سيارات وراى بعض
امجد ضحك: خافو عليك الحماعه مبارح حقا
يوسف ضحك: مبردكم نوضو روحو معندكمش خدمه انتم ولا شني راني انا مانحبش نهدرز زيكم من بكري لوكلك لوكلك لوكلك
ديجور خش وصكر الباب
مراد: جاك
يوسف تنهد: ياسر كبدتي انتفخت السكر شيط عندي نوضو روحو
ديجور خش: ماتقولوليش من بكري مادين وجوهكم قدامه
يوسف: يزيدو يمرضو
ديجور: مافيش خدمه ايمن مافيش خدمه ف المركز شاهين كملت الكورس متعك
مراد مافيش تحقيق خنبه ضربه حاجه
نوضو اخدمو ع روسكم
شاهين: الكروس الساعه 5ونص
مراد: ماعنديش شي قاعدله
ايمن: عدوى الراحه انت برا اخدم انت خيرك
ديجور قعمز: انا مايمشيش معاي جو الخدمه جو يجي واحد يدير روحه مدير عليا
امجد: عقليك انت بروحك
ديجور: عندي كافي عندي شقة ايجار عندي محل ايجار ومخطط بندير صالة افراح ايجار برضو علاش بنخدم ع منو بنصرف؟
ايمن: خود عروسه تشفط القريشات ف دقيقه ع مكياج ولبس وماركات
ديجور: خودها انت مايمشيش معاي انا جو ناخد وحده تمد ف ايدها
يوسف سيبهم وناض خش لدار لانه منحها الفكره من راسه ومايحبش موضوع الزواج
شاهين لاحظ يوسف
امجد: ديجور انت بذات رد بالك تعطي نصيحه لحدد عقليتك تمرض اسكت
بدل ماتقول اي ناخدها ونخلها مش محتاج تمد ايدها بـ انك تكون موفرلها متطلباتها
ديجور شافله ع جنب: امجد واكلها ياجماعه شكله
ايمن ضحك ضرب مراد ع كتفها: عندنا عرس يامراد
امجد ضحك وسكت
شاهين: مش اي بنت ز ماانت متخيل ف بنات يسيبو قرايتهم بسبب اماليهم انهم معاش يبو يرفعو وهدا اكبر سبب يخليها تمد ايدها ليك
يعني كل وحده وظروفها وهي اكيد مش حاتكون فرحانه وهي تمد ف ايدها حتى لوكان راجلها
امجد شاف شاهين: اسمع كلام الاستاذ
يوسف من الدار نادى ع مراد
مراد ناض وخشله
يوسف صكر شباك الدار لـ كان واقف ويشوف منه وقربله: كلمت ديجور ع قصة بنت حسين
قالي حايكلمك انه انا وهو مش حانتدخلو بحياتك لو تباها خودها
ديجور خش: شجو مراد
مراد شافله: تمام
يوسف شاف ديجور: انا قتله
ديجور شاف مراد: بس لو نعرف يامراد ان وصلو فيك او سمعوك كلام عليا مش حانسكت حطها ف راسك
مراد: انا حاندير لـ عليا نخطبها ولو وافقو مبروك ولو ماوافقوش والبنت برضو رفضت حانخليها تشوف حياتها بس لو هما رفضو والبنت موافقه وقتها... قاطعه
ديجور ضحك: ايوواه حني حب وحركات
يوسف اكتفي يشوفله: تموتو ف المشاكل سبحان الله
ديجور خبط مراد: تربايتي
مراد ضحك وطلع
ديجور شاف يوسف: علاش قالب وجهك انت؟ ماتبيهمش برسمي نرزهم ره؟
يوسف طلع: انا ماشي لشقتي
في الصالة
شاهين بنبره حاده: يوسف
يوسف شافله
شاهين: ياسرنا امبارح خليك هني حتى لو صار شي يكون بعلمنا
ديجور طلع: شن بصير؟
شاهين: مرات يتعرض لنوبة او دوخه وهو بروحه ف الشقه
ديجور: المرض هدا يدوخ هكي ديما
امجد: يدخل حتى ف غيبوبة هازي عليه
يوسف: مش حايصير شي
ايمن: خليك ياراجل
يوسف تعصب: خلاااص مش عيل ره متعلم ونعرف الواحد يندم لقاللكم مريض****... وطلع
ديجور: انا مانعرف شي ع مرض السكر ره شن قصته
شاهين طلع متعصب لحقه
ف الجنان
شاهين قربله: بنمشي معاك
يوسف شافله وتنهد:****
شاهين: بلا سبان وهدي بنمشي نشرو الحاجات لتناسب السكر
يوسف: انا تو نشري انت ارجع
شاهين: باه بنمشي معاك النم وانت تلز
يوسف طلع ومشي معاه شاهين مشو بسيارة يوسف
يوسف يسوق
.
.
سهى: لو انا شكيت فيه شن بنقول؟ بنقول ان راجلك يحكي بشرفي وضاربني؟ وقتها ننفضح والكل حايكون داعمه والكل حايقولو حسام الصح
اسماء: حسبي الله ونعم الوكيل فيهم
دنيا: ياريته ميت
سهى: انا علاش مانقدرش نروح؟ الوجع لفي جسمي كله قاعد مدروليش حل غير ضمادتا بس علاش قعدتي هني نبي نفهم؟
اسماء: اليوم خليك تحت الملاحظه ز مقالو واسكتي
سهى: باه حد فيكم يروح يقعد مع حنينه حرام قعدت بروحها
دنيا: انا قلقت وبنروح اساسا عندي شوية قراية
اسماء: نعطيك المفتاح وتخليك شاده يمينك وتسوقي شوي شوي
دنيا: هاتي .. خدت المفتاح وطلعت
.
.
يوسف وشاهين ف المول
شاهين وصلاته رساله من شهد للحاجات المهم لمرض السكر
يوسف شافله يشوف للهاتف ويدور:شن ادور؟
شاهين مدله الهاتف: شوف هادم الحاجات المهمه
يوسف تجاهل الرساله وجي عيونه ع الاسم شهد سكت وبعد: فوتها الماكله السامطه تربح
شاهين: ماتقعدش تنق عندي كورس بنمشيله
يوسف نفخ:****
خدو كل شي مكتوب ف المسج من شهد🤎
يوسف وصل شاهين للاستراحه
وشاهين انطلق للحوش وغير ومشي للكورس لميعرف شاهين يعطي ف كورس لغة انجليزيه كورس لغة مش دراسه يعني مش صف محدد الكورس عشان المشتركين يكسبوها اللغه نتمنى فهمتو 🤎
.
.
يوسف خش حدف الكياس ف زواية الشقة بعنف مش عاجبه الشفقه ونظرات صحابه بنظرت انه شخص ضعيف ومش بقوته ز قبل صح كان يوسف عكس ديجور بس يوسف كان شخص كاتم جدا عكس ديجور يعني يوسف لو يتعصب وينحرق من داخل مستحيل يوضح ولا يحسس حد حتى لو كان مضايق
شخص بعيد ع البصاره والهدرزه والفضفاضه
والناس واخدين عليه فكره انه هادي ورايق ❤️‍🩹
بعكس ديجور لو تعصب يقلب الدنيا ولـ يخطر ف باله يديره يعيط يصرخ يكسر اي شي
شخص شايف روحه شي كبير وكتلة من الغرور ويصتصغر بـ الناس يعني لو شخص يغلط معاه ميهماش لا كبير ولا صغير قلبه ميت ودافنه
.
.
دنيا تسوق ف امان الله حست بـ سيارة وراها من اول ماطلعت و تتقرب منها
.
.
شاهين خش للقاعه كانت قاعه بجميع الاعمار من 18 وفوق
شاهين شافلهم وصكر الباب:
Hello
ف اشخاص ردو ف اشخاص ساكتين
شاهين قرب حط المذكره ع الطاولة شافلهم:
How are you today
(كيف حالكم اليوم؟)
الردود كانت: good. fine. Thank God
شاهين لبس نظراته:
Are there new people?
(في اشخاص جدد)
قاطعه الباب نفتح
شاهين شافلها: وين لتوا؟
رغد ف فمها مستكه وروج ولبس ماركه كانت لبستها بينك: اسفه
شاهين استفزه منظرها والمستكه: لوحي لفي فمك تفضلي
الموجودين منهم ضحكو
شاهين شافلهم: شنو ليضحك؟
رغد خشت وقالبه وجها فيه قعمزت
شاهين شافلها: introduce yourself
(عرفينا بيك)
رغد سكتت
الكل شافلها مستنيه تتكلم
شاهين لمنع للاحراج: عرفينا بيك يعني
رغد: اهاا My name is Raghad. I am 23 years old. I was studying at the University of Languages, but I did not complete my studies
(اسمي رغد. عمري 23سنه. كنت نقرا ف كلية اللغات لكن ماكملتش)
شاهين: good luck (موفقه)
رغد هزت راسها
وكمل شاهين كورسه عادي
.
.
الساعة 6ونص
بزبط صارت الكارثة الاكبر لحكيتلكم علها ف الاعلان ان دنيا بيصير لها شي 💔
السيارة لقعدت اضايق فها مامشتش لعند خلت تندي تقلب السيارة في بداية الكوبري 💔
وفعلا نقلب السيارة 💔
.
.
امجد كان خاش للمستشفى لقي دكتور وممرض يتعاركو
امجد قربلهم: دكتور خيركم
دكتور زهير كان شخص خمسيني: في حادث السواق الاسعاف مجاش والاسعافات مافي غير هادي وماحد وكلمت هدا رفض يسوقها
الممرض شافله: مش خدمتي هادي.. وخش
امجد: انا نمشي عطيني العنوان بالتفصيل وشن درجة الاصابة
زهير نفخ: اووف الحادث قالو مراة في كوبري **** دايره حادث والاصابات كبيرة وتنزف ومش معروف لو ميته او حيا قالو مراة تنزف بس
امجد: تمام.. خدي المفتاح منه ومشت معاه ممرضه ودكتور زهير
ومشو
كانت سيارة دنيا جايه ف نص الطريق مقلوبه وقاعده ف قلب السيارة وجها مغطي دم ناس تشوف من بعيد وبس 💔