عودة_للأنتقام

13

#عودة_للأنتقام 13
(غسـق) Misho mohammed
•
•
•
•
•
•
•
•
•
في الاستراحه
ديجور خش متعصب سرفق الباب وقعمز ف وسط الظلام مغلول
ديجور بعصبيه و غل: هادي شن تحسابني
رن تلفونه بـ رقم من جماعة الجنوب
ديجور قفله وحطه ع الطاولة بقوة
ديجور اتكى ع الصالون ويشوف لسقف ف الظلام المكان: انا توا كيف نتعامل معاه المصيب لجبتها لعمري
ومانقدرش نديرلها شي عشان مايقولوش ديجور يتمرجل ع الانتايات ولانه انا مانبي ندير شي هي مفكرتني خايف منها
نطق باب الاستراحه وفتح ديجور لقي قدامه جابر وصاحبه عماد خشو
ديجور ساكت
جابر: شن قصة حبستك ف المنطقه علاش مانعينك تطلع !!
ديجور شاف عماد وسكت
عماد: لو انت مش فاضي حني مش حانقعدو عشانك وبسبب مشاكلك ف حاجات اهم منك نخدمها
ديجور بهزوه شافله ورخي عيونه: الباب يطلع جمل برا من شادك
مشاء ﷲ داير روحك راجل وجو بنمشي خلاص برا بدوني انا مش ضروري هادي خدمتكم.. قاطعه جابر بعصبيه
ديجور قاطعه عيط ع عماد: لو ناسي انا لنتكلم بدلكم وانا لنحمي فيكم وانا لنحدد ف المكان والوقت لخدمتكم
مع ان الحشيش خدمتك وخدمته بس انا لنظم ف كل شي وانت وهو مستحيل تسترجل وتخطي خطوة بدوني مع انك تقدر تمشي
عماد تعصب: كل شي ادير فيه تقبض عليه
ديجور راخي عيونه ويشوفله: اكيد مش ماشي ع سواد عيونك يعني
جابر بيتكلم
ديجور قاطعه قام صبعه بتهديد: تاني شي انا مش جابر ولا يوسف عشان تتكلم معاي هكي
جابر عيط ع ديجور: خلاااص
عماد كان متعصب من داخل بس يتظاهر بـ انه هادي: انا دمي محروق ع البضاعة حاتعطل
ديجور شاف جابر: نحل مشكلتي ونفضى ونكلمهم نحدادو موعد تاني
عماد: كم تبي عشان تحل مشكلتك
ديجور شافله: بتحلها معاي؟ بطل تحشي روحك ف حاجات تخصني... قاطعه
جابر: خلاااص (شاف ديجور) وين ايمن ومراد مش شرطى كلمهم
ديجور: انا بنطلع نوض جابر خود لمعاك وروح
جابر شاف عماد
ديجور شاف جابر: ومعاش تجيبلي حد هني الف مره نقول فها
عماد ناض طلع
جابر تعصب: هدا جوك انت
ديجور: انا هكي خوي مانبيش حد يخش استراحتي عندك عندي حاجه دافع فها معاي
جابر طلع وسرفق الباب
ديجور مقعمز حط رجله ع الطاولة لقدامه فوق بعض واتكى: توا انا منين بنجيه التيس متع المحل وين ****
فتح تلفونه واتصل
ديجور: ايواه مراد
مراد يسوق مروح من خدمته: اهاا حب
ديجور: نبي خدمه
مراد: ادلل
ديجور: اوينه انا ممنوع نطلع برا المنطقه وفي واحد لو شدوه ونتكلم حانقدر نطلع وتنحل مشكلتي
مراد: باه بلغ فيه ويشدوه الشرطى ساهله
ديجور: مراد حبي افتحلي الدلو لـ بين كتافك وافهم الراجل هدا هارب من حوشه ومحله مصكره
مراد ضحك: اهاا لو مش داير شي ره مهربش
ديجور تنهد: مراد ماتجلطنيش بذكائك وخيا تربح
مراد يضحك: شن اسمه باه
ديجور: مشعارف كيف محقق انت بذكاء هدا مشاءﷲ البلاد في ايادي امينه
مراد: كخكخك لا امينه لا سميره شن اسم الراجل
ديجور: منعرفاش شن اسمه غضوا نعرفلك
مراد: متصل بيا عشان تحكيلي قصته وماتعرفش اسمه اتحفتني صراحه
ديجور غمض عيونه تعصب: مراد
مراد ضحك: تم تم ابعتلي اسمه امتى ماتبي ومنطقته وحوشه ومحله
ديجور: تمام تمام
مراد: سلام.. وصكر الخط
ديجور تنهد تنهيده طويله وبعد شعره بعنف للخلف ووقف فاصل: الله ياخدني..طلع وقرب الباب
.
.
طبعا في المركز
قعد محبوس حسام وسند وسليمان وامير بسبب اعتدائهم ع سهى
والباهي طلعو
سهى كانت ف مكتبها روحت لقت سيارة قدام حوشهم خشت ونصدمة بـ نادية وسليمه(جداها ام حسام) مقعمزين ف الجنان يستنو حد يجي لانه اسماء ووردة كانو ف المصحة
سهى قربت لسيارة شافت فيها زياد كان هو موصلهم قربتلهم
سهى: من انتم؟
ناديه بعصبيه وحاقده علها: حني مني ياسا*قطه
سهى قامت حواجبها: كبر بلا فايده فعلا
سليمه كانت عزوز كبيره منفخه: هكي اديري ف بوك ياناكرة الخير ياقليلة... قاطعتهم
سهى: اسمعي انتي وهيا كويس لاني مش حانعاود كلامي ونختصر عليكم الموضوع انا مانبي حد لا تتغوطو ليا
ولا تترجوني ولا نبي كفاله
وز حسام وز سليمان ولادك الزوز مش حايطلعو (ابتسمت بمكر) لو تنقزو وتهبلو الزوز مش حاتحركو شعره من راسي.. وسيبتهم يتعايطو علها ويلعنو فها وخشت وصكرت الباب
خشت غيرت ملابسها وهي تسمع ف صريخهم مع ان الوقت كان غروب والدنيا مغرب
سهى غيرت ملابسها لبسة عباية سمائية نفس الوشاح وكندره بيضا وشنطة بيضا وطلعت لقتهم قاعدين ودموعهم ع وجوهم
سهى سرحت فيهم: مزال الخير لقدام(كان الباب مفتوح وزياد مقابلها) ومزال بنعرف من لضرب اختي بسيارة
(شافت جداها) متذكره لم تقولي لـ ولدك تقوليله بناتك مش حاينفعو ف شي
ليوم بنت تاخد ف حقها بروحها وبدون مايكون راجل وراها
بنت ولدك انا لحنخلي الكلام لنقال عليا قبل بهزوه نخلي ولدك وهو محبوس يهلوس بيه
سهى طلعت
زياد نزل قربلها ف الشارع: سهى
سهى تلفتت وساكته
زياد: كيف حال دنيا؟
سهى ابتسمت مع انها كانت شاده بكيتها: في غيبوبه دنيا.. ومشت
وركبت مع التاكسي متع البنت لقاعده متستنيتها ومشت وهما دموعهم ع وجوهم
سهى كانت تركب مع البنت من الكرسي الامامي بس المره هادي ركبت ف الخلفي مجرد ماركبت دموعها نزلو 💔
الوضع لـ هي فيه مش حلو وانك دون الناس بدل ماتكون عيلتك سند الاول ف الحياة
هي كانت عيلتها السبب ف خراب حياتهم 💔
ومجرد مطلعت سهى نادية وسليمه روحو
سهى دنوعها ينزلو وهي مش مخليه نفسيتها ترتاح بدموعها شاده دمعتها ومش مخليتها تنزل
وصلت للمستشفى وتبادلو روحو اسماء ووردة وقعدت سهى
وفي الوقت لنزلت فيه سهى من تاكسي كانت مراقبه بعيون شخص متمني يخنقها لانها تستفز فيه
ديجور كان متعصب ومدرس سيارة لـ مش ليه عشان ماحد يعرفه كانت سيارة ايجار نفسها لمشي لحق بيها نادر
ديجور متعصب بس لم نزلت من السيارة سهى قعد يتابع فها بعيونه ومقدرش ينزل لانه لتاكسي قعدت تاكد انها بتطلع بس دقايق ونزلو امها وجداها روحو
ديجور ف سيارته اتكى ع الكرسي وتنهد: لو بننزل شن بنقوللها حاسس روحي نتغوطلها
كان شعور ديجور اعجاب بشخصيتها القوية بس هو شاف الجانب الاقوى لـ حتى امها ماتعلمش بيه مع انها محاميه وفارض نفسها مع هدا تشتغل ف خدمة ف تنظيف وغسل ز العامله مش عيب خدمتها بلعكس قوة انها تتعب عشان مايتجمل علها حد وماحد يسمع بيها محتاجه ولا عليها ديون
شخصيتها تخليك تفكري انه وراها الف راجل ومستقويا بيهم
وزاد اعجابه انها تستحق تكون مغرورة فعلا
بنت ضعيفه من داخلها تتظاهر بلقوى من برا ومشاعرها ز المنديل 🥹
بدون سند من حد خدت لغة وعندها شهادة برمجة وتسويق واشتغلت ف شركة مع نادر ومحاميه وعاملة نظافة ف معمل وبزيادة مصورة افراح ❤
دقايق من تفكير ديجور قعد متعصب ويبي يفرغ عصبيتها فيها بس معنداش كلام يتقدم بيه
في الدقايق هادي وصلت سيارة نادر ونزل وخش
ديجور كان بينزل بس تذكر الكلام لمطلعينه عليها بسببه رجع لسيارة: هي قد نفسها نسيت روحي ان تهزبت الف مره منها وتهزمني ف نقاشاتها
.
.
في حوش ايمن
كانو العيلة متعشيين مع بعض
عيلة خواته المتزوجات
ايمن مقعمز وقايم بنت اخته ف حجره
وزهرة وايناس وابتسام و اصاله يقرمو ف نسباتهم
صغارهم يلعبو قدامهم محوسين الدنيا
مريم ف المطبخ تجهز ف العشي بروحها
ايمن يشوف ف الحوش: ستلاف مره مقايل معاش تجيبي العابهم معاهم
ابتسام: هما يجيبو
ايمن شاف صغار اخته: لبينى لعبه مايجيش يوم تاني يقول وينها لبينى الاعاب ولا بنلقى حد داس العابه هني بنلوحهم اللهم ان بلغت
زهرة خشت المطبخ: مزال؟
مريم ف حوستها: دقايق بس
زهرة: ابدي ف غسل الحوسه وخلي الطنجره ع النار
مريم: حاظر
ايمن خش
مريم عدلت وشاحها
ايمن بهدوء: يام مايجيش خلي بناتك يخشو يعاونها شوية
زهرة: اي كان بيعاونها علاش ندفعلها ف الفلوس انا
ايمن نحرجج شاف مريم
مريم لفت تظم ف الماعين المتسخه ف الحوض
ايمن طلع بصوت واطي: ايناس نوضي عاوني البنت
ابتسام شدت ايناس: خلي نكممللها شن صار
ايناس تضحك
ايمن شاف اصاله: مايجيش انتم مقعمزات وهي بروحها
ابتسام شافتله: شن رايك تقعمزها تهدرز معانا وحني انوضو نغسلو ونطيبو
ايمن فنص فها: نقصي صوتك
اصاله حطت بنتها لـ كان قايمه ايمن وناضت: انا تو نعاونها
ايمن قعمز ساكت ويسمع ف هدرزة ايناس وابتسام يضحكو
ايمن شافلهم: هادم لتحكو عليهم وتضحكو ع لبسهم وكلامهم تبدي قدامهم ز الكلبة تضحكي وتاكلي ماهو يامنافقه وبعدين تجي بهدرزتك الفاسده وتعلمي ف ايناس
ابتسام تعصبت وسكتت
ايمن: شن تشوفيلي نفاق هدا اسمه
ابتسام علت صوتها: هدا كله عشان منظفتش مع الخدامه
ايمن: ضمي فمك ونقصي صوتك تعالي ف ظفرها الخدامه
ابتسام: انا تقارني بـ مريم؟
ايمن قربلها بعصبيه والغصار يشوفوله فنص فها: نقصي صوتك
اصالة طلعت قربتلهم: بلا عارر
ابتسام: اصاله شفتي قارني بـ العامله
اصاله: خلاص
ايمن: جربي علي صوتك مره تانيه
ابتسام سكتت وتغلي
زهرة قربتلهم: خيرك تصادع عليهم
ايمن: شي ... وطلع
وجدي قابله ع الباب: وين بنتعشو
ايمن تلفت شاف ف خواته: ماعنديش نيه
وجدي: باه متاكلش اقعد وريني وجهك لـ مانشوفش فيه غير وانت ماشي للخدمه خش قعمز
ايمن تعفلق خش
مريم بدت اطلع ف العشي ع الطاولة الطعام
وايمن عيونه ف هاتفه
وابتسام عيونها تلاحق ف مريم
واصاله تعاون ف مريم
ناضو كلهم لسفرة بصغارهم
وجدي قعمز شاف مريم: يعطيك الصحة بنتي
مريم ابتسمت: عوافي... مريم مشت للمدخل تلبس ف جاكيتها الشتوي وقفت ع المرايا تعدل ف حجابها ❤
ايمن قاعد ع الهاتف ف الصالون
زهرة من طاولة الاكل شافتله: نوض ايمن
ايمن ناض: ماعنديش نيه بنطلع.. وطلع
ايمن ولع السيارة ومريم طلعت وقفت ف نفس المكان وقعدت تتصل ف ارقام تاكاسي لعندها النسائية
ايمن وخر سيارته فتح الشباك: اركبي نوصلك
مريم شاده هاتفها: شكرا اهو تو نتصل
ايمن: اركبي ماشيين لنفس الطريق
مريم قربت وركبت
وطلعو
ايمن يسوق: بننزل للمطعم ناخد شي عشان نتعشى شن ناخدلك معاي؟
مريم: لا شكرا عندي خالتي سورية مقيمه ف مصر جايه وقعده عندنا لفترة هادي ومجهزة العشى
ايمن: قاعد عندك تواصل مع خالاتك برغم من امك متوفيه حلوو
مريم ابتسمت: اي طيوبين خالاتي ودايرين العشى كبة مقلية
ايمن ضحك ضحكه خفيفه انها بسهولة حكتله قصة حياتها: حلوو
مريم ابتسمت شافتله: شن رايك ماتطلبش من المطعم ونتصل ع خالتي عشان تجهزلك اقراص كبة من تحت ايديها
ايمن ضحك: لا صحتين
مريم اتصلت بخالتها: مرحبا خالتو ... بدي عزبك اضبيلي كم ئرص ع جنب ... اي بدي ذوق شخص اكلاتك ... يسلموو باي... وصكرت
ايمن ضحك: وووااك حسيت روحي مركب معاي حد من باب الحارة
مريم ضحكت: انت كثير قصدي انت هلبا مهووس بـ باب الحارة
ايمن: اللهجة تجذب
مريم: بلعكس لهجتكم حلوة بس خالتي المسكينه ماتفهم شوية كلمات طول اليل بنسهر وعم احكيلى ع تقاليدكم وتراتكم
ايمن: مريم من مواليد ليبيا انتي صح؟
مريم: اي
ايمن: شن عجبك ف تقاليدنا؟
مريم ابتسمت: اللبس الرجالي الزبون قصدي هدا اول شي وتاني شي اللبس البودري تبع العرائس نشوف فيهم ف الصور ع النت
ايمن يسوق: حلوو
مريم: في شي انتو محرومين منه ف ليبيا خالاتي لم يجو ليبيا ضروري يجيبو لي منه وهو التوت البري
ايمن: اهاا تحبي التوت الازرق يعني صح مش متوفر هلبا عندنا
وقعدو يهدرزو ونسجمو لعند وصلت مريم
مريم تشوفله بترجي: خليك حانجيب لك حصتك
ايمن: مستعجل صحتين
مريم ميلت راسها: لا خمسة دقايق
ايمن ضحك ع ميلة راسها: لا بجد صحيتي ماشي
مريم سكتت
ايمن: امشي هي عشان يقعد ضي السيارة ع طريقك
مريم: تمام براحتك باي... ومشت
قعد ايمن والعلها ضي السيارة لعند اختفت ومشي ❤
.
.
دقايق
ديجور عبق السيارة بريحة الدخان ونشغل علاش مانزلش نادر
دقايق ونزل
ديجور قعد يشوفله لعند ماوصل لسيارة وضبط ع سيارته وركب وقربع الباب
ديجور بعفوية حسه نازل متعصب ضحك: مش راحمه حد
.
.
.
تتبع
الحلقات الجايه فيها شوية حركات 🥹❤
نبي تفاعل لانه الرواية تستحق اكثر بجد التفاعل ميت قاعده نكتب ونضيع ف وقتها ومانحصدش ف تعبي ؟
لو وقفتها ماحد يلومني ولو وقفتها حانحدف الحلقات كلها عشان ماحد يقراها ويلقاها مش كامله
اقل شي وصلوها لـ 200 🤌