عودة_للأنتقام

28

#عودة_للأنتقام 28
(غسـق) Misho mohammed
•
•
•
•
•
•
•
•
•
•
•
•
•

القاضي قرب للمايك عشان يسمع الحكم لبرا: حكمة المحكمه بتاريخ ******* حكمة المحكمه 18 سنه بسبب ادعائات كاذبه ومخالفة القوانين والتجاره المخالفه للقانون للمتهمين فرج ***** و صديقة عماد ***** والافراج واخلاء سبيل ع المتهم يزيد حمدي ****

برا
مجرد مطلع صوت المايك وقبل ماينطق القاضي
يوسف وشاهين طلعو من السيار بفزع
وسمعو لنقال
شاهين خبط السيارة بيده: تمت
يوسف ضحك وبس ❤🥹

داخل
ديجور شاف لـ فرج: هادي نهاية لبيلعب من وراي ويضحك ف وجهي نتلاقو بعد 18 سنه
سهى جمعت بعضها وطلعت
وطلع القاضي ورفعو عماد وفرج
ديجور قاعد مكلبش طلع مع الشرطى شاف سهى تفتح ف طاسة اميه
ديجور شاف الشرطي: خلاص فك عليا
الشرطي: مش بتمشي لزنزانتك تاخد اغراضك
ديجور بلهفه: بعدين بعدين
فكه الشرطي
قرب لسهى
ديجور قربلها وساكت
سهى فتحت الطاسة وشافتله ابتسمت: الحمد الله ع سلامتك
ديجور: كيف نكافيك؟ فهميني
سهى ابتسمت حساته فرحان: اطلع لخوك صار فيه هلبا وكنت نقدر نقول لصار ليوسف برضو ف المحكمه بس محبيتش نتكلم بدون اذن خوك
ديجور فرحان: تعرفي شن ضريبته لدرتيه؟
سهى تشوفله: شنو؟
ديجور بيتكلم
سهى قاطعاته: انت طيب بزياده بطل توتق بسرعه تمام ونقولهالك عشان نريح نضميرك انا لولا وقفاتك معاي ماكنتش وقفتلك ليوم تمام
ديجور ابتسم: سهى لو تخفي شوفت النفس هادي وتدوي ز الناس
سهى شربت وضحكت : مش من حقي نشوف روحي؟ نبصر عليك بس نحكي جديات يعني و
لولا مساعدتك.. قاطعها
ديجور: ساعدتك ف شنو حصلتي ضرب و سعفوك مصار فيك خير من وراي فشنو ساعدتك ؟
سهى: ساعدتني نرد سيارتي وامير يصلحها مثلا
ديجوربيتكلم قاطعه
صوت العاب نارية برا
سهى ابتسمت: اطلع لصحابك انا مش مركزه معاك اصلا ودايخه وحالتي حاله.. لوحت الطاسة ف السلة وطلعت قبله عشان مايطلعوش مع بعض
ديجور تنهد وطلع

.
.

سهى قعدت مقعمزه ف سيارتها بس متحركتش لانه فيها دوخه
ديجور طلع ويسلم ويحضن ف اصحابه وكل شوية يشوف سيارتها
شاف يوسف
ديجور: جبت هاتفي؟
يوسف ضحك بهدوء: من بطمن عليك
ديجور ضحك
وركبو ومشو وبرضو سهى ولعت ومشت

ف الاستراحه
مراد: جو ليوم للارض
ايمن يدخن وسرحان وساكت
شاهين: ايام وليالي ندورولك ف محامي
يوسف شاف خوه: اي وين محاميك انت؟
ديجور ضحك وسكت
امجد خش شاف ديجور ضحك: كملت ياحاج.. سلمو ع بعض
ديجور: وين؟
امجد: حصلت ف حوشي بعد تىاته سنين اول مره نمشي نشوفه
ديجور ضحك: ليه صاحبه الحوش ولا غير هكي ديكور حتى انت ز يوسف
امجد ضحك: شكلي بننقزها المره هادي منكم
مراد اشر ع ايمن: اي كنا ف مريض واحد نبدو ف زوز
امجد: مش الكل ز بعض في لتنكد عليك وتبدا للاسوء وفي لـ تصلح فيك حاجات انت غافل علها
ايمن طفى الدخان ووقف: هي مالا انسو بعض
ديجور شافله: ويين؟
ايمن: طالع تبي شي
ديجور: طالبين من المطعم قعمز تغدا معانا وبرا
ايمن: صحتين.. وكان بيطلع
ديجور وقف وطلع وراه
ف الجنان
ديجور خبط كثفه وغمزله: خيرك ادوي النم تقول ارمل وعندك سبعه صغار ادوي خيرك
ايمن: خيرني؟
ديجور سكت
ايمن: معاش عندي خلوق للقعدات وهدرزه بجد
ديجور: انت شايف روحك كيف مولي؟ وجهك معظم وريحتك دخان انت قبل عرسك حتى الدخان ماتحب تشمه حارمهم داخل يدخنو جنبك
ايمن: خليني نروح مافيني شي.. وطلع
ديجور قعد واقف
شاهين طلع: خيره شن قال
ديجور: قصدك المراة لو نكدت ز مقال امجد هكي يصير
شاهين شاف ديجور: شنو دخلك انت بالك بتتزوج
ديجور شافله تنرفز: لالا بنقعد فاتحلكم حضانه ونرعى فيكم شن رايك انت؟
شاهين ضحك: انت وامجد لاعبينها مزبوط وقول شاهين قال
ديجور: شاهين قال لانه صح اصلا
ووخشو
ديجور قعمز خدي رشفه من قهوته: شن صار من وراي
يوسف صدهم عشان ماحد يحكي: شي شن بيصير
ديجور: تهجمو عليك وسكتت صح
و**** جابر هرب لبنغازي واضحه
وبوي ف دار المسنين.. قاطعه
يوسف تنرفز: قالولي ماتقدرش اطلعه شن ندير نخطفه!
ديجور تعصب: كان فصلت ف وجها وخبطت ولعلعت ره عطوهولك
يوسف: انا مش زيك
ديجور تعصب: عمرك ماتكون زيي اصلا اقل من شهر نحبست صار فيك العار لو متت كيف مالا
ايمن خش وصكر الباب
ديجور شافله بعصبيه: وانت خيرك
ايمن: وليت ماعنديش خلوق نروح.. قعمز
ديجور شاف يوسف
يوسف تعصب: يخافو منك لانك مريض ومتهور را مش حاجه مليحه وفرحانه بها
ايمن اتكى ع الصالون: بدينا
ديجور: اي اي خليك ساكت انت
شاهين: ساكت شنو تي امبارح شاد عماد وفرج وكلهم قتلهم قتل فراق الوالدين وحرق السيارة الزوز ماتشوفش فيهم ليوم جايين بتاكسي
مراد: احلف
امجد: كدبه يوسف مايديرهاش
يوسف: لم ننظلم نديرها وندير بها
ديجور ضحك: حرقهم حرقهم تفحمو يعني؟
يوسف ضحك: واااك مغلى عليك للمصايب غر اشي كيف فرح
مراد اتكى ع راس ايمن: حُب
ايمن حول راسه ناض قعمز: حبك برص يامريض حول من عليا لا تمسني لا تقربني حول هاا قتلك
مراد اتكى: المهم خديته لمكان برا ارقد هي
ايمن قعمز: ياصبيه
امجد: ايمن متحسن
مراد ضحك: مراد للعلاج النفسي
امجد شاف يوسف: خديت ادويتك انت ولا غير مقعمز
يوسف شافله: خديتهم
ايمن ضرب امجد برجله: مولي ز الامهات انت راك مدخلكش بيه
مراد ضحك ضحكه لسقف
ايمن شاف مراد بقرف: ضحكت عنزة ع باب المسلخ ان شاءالله
امجد ضحك: لا جديات متحسن
ايمن سكت وولع دخان
ديجور شاف يوسف: وين نقالي؟
يوسف: ف شقتي
ديجور: نوض خت فت جيبه
يوسف: والله
ديجور بـ اصرار: غر نووض ولا عطيني المفتاح
يوسف: نبصر داخل ملوح ف الكومدينه
ديجور ناض خش
مراد بصوت واطي: ماشي بيطمن ع الحب
ديجور بحركات سريعه طلع الهاتف علقه ف الشحن وشغله ومجرد مافتح الهاتف اتصل بـ سهى
في المستشفى دنيا وسهى فقط
سهى معلقه سيروم ف ايدها: الو نعم
ديجور: انا ديجور لو فاضيه بنكلمك
سهى شافت دنيا: تفضل نسمع فيك
ديجور يسمع ف صوت اطهزة ودوشة: صوت دوشه جنبك مشغوله؟ لو مشغوله مش غصب
سهى: لا ماعنديش دوشه هدا الصوت من برا
ديجور تذكر ايدها: ف المستشفى انتي؟
سهى: اي اتم التغدية ونطلع
ديجور: سُهى
سهى: تفضل تكلم نسمع فيك
ديجور سكت بتوتر: نبي نقابلك عادي نجي؟
سهى: لا بنطلع انا اصلا قريب تكمل وطالعه.. رن هاتفها ورقم خش ع الخط
سهى: يزيد تقريبا رقم البواب تبي مكتبي يتصل صكر دقيقه نكلمه
ديجور: تمام تو نعاودلك.. وصكر
سهى اتصلت برقم البواب: نعم
البواب من جنسيه تانيه مش ليبي: مدام ف هلباا نفر موجود يبغى انت
سهى: اي وانا مش موجوده كلمهم بُكرى يلقوني
سليمان جبد الهاتف من البواب: وينك ياعمي
سهى: من معاي؟
سليمان: انا عمك سليمان ف الحوش مش موجوده وف العمل مش موجوده وين ادوحي
سهى تعصبت: اول شي لاعمي لا خالي تشحط روحك وتتكلم ز الخلق خير منخليك مع خوك وولده
سليمان: ياريتنا خنقناك من صغرك وارتحنا
سهى ابتسمت: ياريت اقل شي نموت نرتاح من اشكال زيكم تحت مسمى عيله
سليمان سكت
امير يكشخ ع البواب
سهى تعصبت: الشيباني لتكشخو عليه لو يصيرله شي او ينخدش بس خدش... قاطعها
سليمان بيتكلم جبد سند الهاتف منه:**** انتي شن دخلك ف ديجور **** اطلعي فيه من قربك ولا مسك علاش تتلصقي عليه تعرفي ياسهى يابنت الخامرة ياانا ياانتي ف الدنيا هادي سامعه ****
سهى ابتسمت: حتى العيل دار لسان برا خود عمك وروح ولعلمك قبل ماتتحمس وتهددني صوتك والمكالمه مسجل تمام
اضم فمك زيك ز الكلاب لمعاك وتطلع ز الشاطر هي ولو الحارس نحسه متعكر او مضايق بس ياويلك.. وصكرت الخط
سهى عاودت اتصلت بديجور: ايوه انت التاني شن تبي؟
ديجور: نعم؟
سهى تنهدت: انا ملوحه ف المستشفى وعمي وخوتي ماشيين يتهجمو ع الحارس لحاطاته لمكتبي كيف متوقعني نتكلم
ديجور: حارسك شن دخله بيك باش يجوه
سهى: ماهو تابع ليا ويخدم عندي
ديجور وقف: ماشيله ماشيله
سهى قعمزت بفزع: لاا وين ماشي شن دخلك اصلا
ديجور: مدخليش لكن الراجل بروحه ماشيله
سهى: عمي غادي حايفكرو ان انا بعتك لااا انا مسجل المكالمه ولو صار شي حانصرف معاهم
ديجور طلع من داره: يعني نخلي الراجل بروحه بعقلك مرات يخشو داخل يخربو لمكان
شاهين ضيق عيونه وشافله
ايمن عقد حواجبه: مكان من لبيخربوه
ديجور شافلهم: انا ماشي.. وطلع بسرعه
ايمن ومراد وشاهين لحقوه
امجد: اقعد انت وياه مش لازم
يوسف: خليهم معاه اقل ينحبسو مع بعض اكثر وحدين دوشتهم هلباا برو برو معاه الحقوه
طلعو معاه
ديجور صكر الخط تلفت شافلهم بعصبيه: وين مش حرب ماشي مشوار وجاي
ايمن: مشوار وطالع مفزوع بنمشي انا
مراد: حتني اقل شي معاك شرطى
شاهين: انا عشان ماتصيرش عركه
ديجور تنهد: مشكله صغيرة تخصني ارجعو مش ناقص
ايمن قرب لسيارته: كساد اصلا هيا مراد ركب مع ايمن وشاهين ركب مع ديجور ومشو
وصلو وهما ونزلو مع بعض
ديجور يسمع ف تخبيط لم قرب لقي امير يضرب ف القفل تبع المكتب: شدير انت
امير نخلع تلفت: بسم الله
سند شافله وسكت
سليمان شاد الحارس
شاهين: مش متعلمين ان حاجه مش ليكم ماتمسوهاش
ايمن: خنبة ف عزز الظهر عيني عينك
سليمان قرب لديجور: نحبس هاا
ديجور ابتسم: اي شفت وله بس شوف للجانب التاني ان اصحاب الشكوة خدو الحكم عليا
امير بهزوه: سلم بنتنا لولاها راك قاعد داخل وبدل ال18 خخديت 20
ايمن شاف شاهين: بنتهم؟
ديجور: وانا جاي عشان مكتب بنتكم شن رايك وراه مش محتاج نوسخ ايديا بحدد فيكم بس جاي نقول شي وماشي وانتم احرار
سليمان شاف سند
ديجور اشر ع المكتب: جاي ناخد الحارس معاي بس
ولمكتب بين ايديكم بس انا مانكونش ديجور لو منكسرش عظامك عظمه عظمه لو نعرف ان حد خش للمكتب
ايمن شاف الكاميرات اشر عليهم: الكاميرا فوقكم ماتتحمسوش
امير بهزوه: بنتنا مش مقصره مع حد فيكم ها؟
ديجور قربله وجه لوجه خبطه ع خشمه ومن الخبطه خبط راسه ف باب المكتب من الخلف
سليمان وسند تجمعو ع امير
ديجور: المره هاادي مشي خشمك
سليمان عيط عليه: تكلم ع اخته انت شن دخلك شننن دخلككك
ديجور: محاميتي لبيجبدها بحرف سوء شكر او العكس مش حايشوف حد غيري قدامه سامع يعني حتى بين بعض ماتحبدوهاش وصلت
امير شاد خشمه لينزف ع الارض ومتعصب: ياكلب سُ... قاطعه
ديجور طبسله
مراد قرب جبد ديجور: خلاص خشمه مشي فها
ايمن طبس لـ امير: انا منعرفكش بس ف الجديد كل ماتشوف خشمك المتورم المكسور هدا اذكر معاش ادخله ف حياة الناس
شاهين جبد اايمن: اطلع تهديد ديجور سادهم
ايمن ضربه برجله وطلع
ديجور قرب للحارس: تعال معاي انت
الحارس مشي معاه ومرعووب
وصلو للاستراحه
كلهم خشو
ديجور شاف الحارس: جبتك عشان ماحد يتفشش فيك تتغدى معانا ونرجعك تمام؟
الحارس: انت من؟
يوسف طلع متعصب بعد معرف بلصار من اشباب لخشو: انت مصكرتش ساعاتين برا الحبس
ديجور تعصب: نسكتتتت؟ شن نديرر
يوسف: ااتصال وكلام بس
ديجور: كلام وشلابيخ باش يعرفو ان انا قاعدلهم
يوسف شاف الحارس: ااي ومن هدا
ديجور: مدخلكش بيه.. وخش ومعاه الحارس
وتغدو وضحك وهدرزه وانسجام بين مراد وايمن مع الحارس ويتكلم بنفس طريقة كلامه
ايمن ضحك: انت نفر ميا ميا انت تاكل وربي يعطي صحة وعافيه تمام 👌
الحارس ميل راسه: تمام
مراد شاف ديجور: مليه عندنا تربح
امجد: مش لعبه ياعيل
ايمن ناض من الغدي غسل ايديه وقعمز يضحك: جو وربي برسمي خلوه
ديجور متكي وسرحان
ايمن قربلهم لانه الباقي قعدين يتغدو: شن قصة بنتهم انت شن داير من فالطه؟
ديجور: المحاميه هي نفسها اخت التيس لروح بلا خشم
ايمن: البنت هكي تكافئها ع وقفتها معاك
ديجور قعمز كويس: كان تخليني ف همي ياايمن وتسكت
الحارس يتغدا معاهم اشر ع ديجور: هدا نفر صديق استادة سُهى... قاطعه
ديجور ناض بفزع: رزيني فيك شن تحكيلهم
شاهين طاح جنب ميت ضحككك
مراد: ايوواه سُهى
يوسف ضحك: سهى صار ها
ديجور تنهد شاف الحارس: انا شن جيبني فيك بس
ديجور شافلهم اشر ع امجد: يا دنيا اسكت انت
امجد تعصب: انا شن درتتت
ديجور اشر ع شاهين: رغد حرف لا
ديجور اشر ع مراد: سجى كول واسكت لا تسويك لا شي
ديجور: وهكي العددل
امجد تعصب: شن دخلي انا خوك هو لتكلم
ديجور بدون تفكير: حتى هو شهد.. وسكت جاته لحظة ادراك
يوسف اختفت ضحكته شاف لشاهين
شاهين شافله بشك
طبعا ماحد يعرف اسم اخت شاهين شهد غير يوسف بس
شاهين حس بلغدره ناض بهدو بدون مايحسس حد خش للمغسله غسل ايديه وطلع وساكت
يوسف فنص ف ديجور
ديجور ندم
يوسف ناض غسل ايديه وطلع جري وراه
بس ماحد حس ايمن متمت ويضحك
يوسف وقف قدام سيارة شاهين: استنى استنى شاهين نزلها فاصل دفه بخبط:****
يوسف بهدوء: مش ز ماانت مفكر بكل هو يحكي ع قبل قبل مش توا
شاهين: قبل ها؟ ولم سألتك انا قداش ليكم مع بعض قتلي خمسه سنيننن
يوسف سكت
شاهين بعصبيه: انا الحيوان لمدخلك حوشي انا لنعامل فيك ع نياتي وانت عينك... قاطعه
يوسف: تمام تمام انا ناخدها حانخدها
شاهين بعصبيه: من قالك بنعطيك انا مش مستني رايك
يوسف: انا نباها اي ومش كدب بس حط ف راسك الخامر انا مافيش بيني وبين اختك حتى حرف لا نعرفها لا تعرفني تمام؟
وتاني شي انا لكنت نبعد ف قصتها من قدام وانت لقربتها ليا بقصة ماكلتي بقصة اكلي الصحي وابصر شني انا هدا شي الوحيد لخلاني نبيها بس سامع انت العاطل مش انا
شاهين سكت
ديجور طلع
شاهين شافله: اخرتها اختي ضاقت معاش لقيتو بمن تلعبو
ديجور: حني مانلعبوش ز ماانت تحب طالبه عندك و هي قدام انظارك انا خوي ارجل منك بستين مره سامع ومانكدبوش عبعض ونديرو فيلم توا هو خطبها ولم مرض انسحب لمصلحتها هي وبسسس وانت عارف
ولعند توا قاعد يباها هي نفسها برغم من انها متزوجه.... قاطعه يوسف
يوسف: خخلاص (شاف شاهين) انا حاكيله ان انا حانرجع ونخطبها من الاول وهدا السبب لخلاه يقول اسمها
شاهين سكت
ديجور ابتسم لانه عارف شاهين صحبة عمر ومتفهم ويحب يوسف اصلا وقراب لبعض اكثر من الباقي
شاهين تعصب شاف يوسف: خلاص فات لفات البنت عندها صغار حرام حتى تفكر فها
يوسف: مش حرام نفمر فها هي مش ع ذمت حد توا
شاهين تعصب عيط عليه: ماتنرفزنيش لتتكلم علها اختي را اضم فمك وتسكت.. ومشي ركب سيارته ومشي
يوسف شاف ديجور: نورتنا بطلعتك من بدايتها مشاكل مصايب ايام حرف ع راسي انا... وركب سيارته ومشي ديجور تنهد ركب سيارته ولحق شاهين
ووقفت سيارة شاهين للحوش وخش بيطربقق
يوسف وقف بعد بدقايق ونزل عطول وصل ديجور وخش يوسف وديجور مع بعض
يوسف تعصب: شن مزال جاي شن بتخرب تاني ؟ياسر تعبتت انا مرضتوني ياعيلة
ديجور: نبي نشوف عمي قاسم
يوسف: تروح ديجور خير مانطحنك هنيديجور قرب للباب طق طق بقوة
قاسم كان يبخبخ ع سيارته ف الجنان قرب فتح وابتسم بفرح: ننورت يامتع المشاكل
ديجورضحك: منور بيك عمي قاسم
قاسم: بدل ماانا نجي نتحمد بسلامتك انت جايني
يوسف متمني الارض تنشق وتبلعه
قاسم: تفضلو تفضلو خشو
ديجور خش وخش وراه يوسف عطول قربله
يوسف بصوت واطي: اضم فمك حرف لا
ديجور: خليني ف حالي
وخش المربوعه
قاسم يتحمدله بسلامته وينصح فيه وكذا وخش قاسم بيطلب من عيلعيلته ضيافه وكذا
يوسف ناض وقف قدام ديجور: لو تنطق حرف عليا ندفنك هني يزيد
ديجور شافله: ششن مسكتك لين يجي سيدك واحد تاني وياخدها يامتخلف ياجبان كان ماتتكلمش توا وانت تطلبها مانكونش ديجور خوك وشق تؤام لو مانخطبهالك
يوسف تنهد شد راسه: ان شاء الله تنشق الارض وتبلعني
ديجور: وتبلعني لانه حتني عييت منك ز ماانت عييت مني
يوسف سند ظهره ع الصالون:ياريتك ماطلعت
ديجور: ياريت انت لكنت دابحك روحك ع طلعتي
قاسم خش وحط عصير وشكلاطه: نورت عمتك تتحمدلك بسلامتك
ديجور: الله يسلمها
يوسف: وين شاهين عمي قاسم
قاسم: خش يدوش توا كيف وصل
يوسف عدل تقعميزته: عمي قاسم انت متذكر اليوم لكنت بنطلب فيه من عندك
قاسم: خير ان شاء ﷲ اي متذكر
يوسف: انا ولمجرم ومتع المحبسه هدا جايين لنفس السبب
قاسم سكت
ديجور ابتسم: وانت ز عمه ياعمي راه اقبل ولا ارفض ليريحك نوض حتى لزه حقك
قاسم: شن نلزه كل شي نصيب هو بس انا مانتدخلش ف قصص بنتي وحاضر طلبك وصل نسألها ونرد عليك
يوسف توترر
شاهين خش بنفس ملابسه مش مدوش: خير؟
ديجور: جايين اناسبوكم
يوسف فنص ف خوه: لو تسكت انت سكاتك بركه
شاهين: خير ان شاء الله اي كملو توا شن عندكم .. وطلع

.
.

روح ايمن لحوشه
وصل وخش ويسمع ف بكي وشهقات داخل
ايمن بستغراب: ريانن
مريم طلعتله بعصبيه ودموعها ع وجها: حسبي الله فيك ياحقير انت بني ادم انت ؟ماتستاهلش حتى يكون عندك صغار ياحقير
ايمن: شن درت علاش؟
مريم بعبرتها: ولدك مات ياحيوان
ايمن بستغراب: شن صار كيف مات امتى؟
مريم شافتله بعصبيه: البرود لعندك مش طبيعي تسمع فيا شن نقولك ؟قتلك ولدك ولدك مات
ايمن تعصب: ويمووت شن بنديره مثلا؟
مريم طربقاته كف: موسخك
ايمن حط ايده ع خده ولعت فيه نار شافلها بعصبيه
مريم دموعها ينزلو: كانت راقده مرتك ياحيوان ياعديم الضمير ناضت تنزف واتصلت الف مره بيك مقفل مقفلل قعدت تتعذب لين جي بوها رفعها ولدك لهفتك وفرحتك الاول مات
ايمن عيط ف وجها:بطلي تقوليلي ولدك ولدها هي المسؤوله عليه ف رقبتها بروحها الولد لمات ارتاح من عمره مش مني
انا عديم الضمير عشان الملائكه لمات ليوم عشانه هو وماحد غيره تزوجتها وضميت فمي وسكتت عشانه هو بسس

تتبع
اسفه ع ان ماكنتش قد كلمتي 💔
اقسم بالله العظيم ان النت فاصل عندي من العصر وربي يشهد عليا فصل 💔
وشفرتي مافيهاش رصيد

النهايات بدت 🔥
فرحت قد الدنيا امس ع حماسكم وتفاعلكم ورسائلكم لتجننن زيكم عبو حتى هدا كومنتات حلوة عشان نسرععع اكثرررر
ليا ساعه منزلتها ونقول خيره التفاعل ضعيف بكل طلعت منزلتها ف ايميلي 🤦🏻‍♀️