عودة_للأنتقام

9

#عودة_للأنتقام 9
(غسـق) Misho mohammed
•
•
•
•
•
•
•
•
•
كل شخص ينتقم
امجد لـ رجع عشان ينتقم قدام عيون البنت لبعاته وف الوقت لـ كان هو يتعب عشانها هي كانت تفكر ف غيره ومخططه تتزوج وفعلا تزوجت 💔

ديجور لـ ينتقم من عيلة ال كريم لسبب مجهول ؟!!

يوسف شن سبب كرهه لبوه وخوه وعيلة ال كريم ؟!!سبب هجرانه لبوه وخوه الكبير ؟!!

البنت سندها الاول ف الحياة هو بوها ❤
بس سهى محستش بمعنى الابوه واختارت انها تنتقم بنجاحاتها ❤️‍🩹

الغموض 🤌⬇️..
ديجور صكر الباب وسيب ايمن برا خش وشاف مراد لكان واقف ف الصالة يستنى فيه قرب وقعمز
ديجور: ضاقت الدنيا صح؟ معاش لقيت وين تحب و****... قاطعه
مراد بعصبيه: انت صاحبي خدمتني ف اي شي نبيه اي وخدمتك ف اي شي تبيه برضو اي بس انك تدخل ف حياتي هادي لا
ديجور: يعني ماتلعبش؟ تبها رسمي؟
مراد: حني مش جونا اللعب
ديجور حط رجله ع ركبته ونسند ع الصالون: انا لـ مش مسيب فرصه (تغيرت نبرة لصراخ) نفرقهم ونكسرهم ونعيشهم عيشة مايتحملوهاش الحيوانات تطلعلي انت وبنتهم... قاطعه
مراد بعصبيه: ماتذكرهاش البنت
ديجور تنهد لف رقبته ورجع شافله: انا بنتحمل البرانيه ولا بنتحمل صحابي؟
(وقف ويتكلم بنبره حاده) ولو قتلك انا مش حانخليك تاخدها
مراد بستغراب وسكت
ديجور قام ايده: فوتها
مراد متعصب: نبي نفهم شن بينك وبينهم وماتقوليش... قاطعها
ديجور خبطه ع كثفه: حاتفوتها واضم فمك سامع والا يامراد مانبداش ديجور لو مانفضحش بها ونخليها قصة لـ كل البلاد قصة تقعد لاجد جدها ****هادي
مراد بعصبيه دفه: وانا مش حانسكتلك ياديجور وقبل مايحاسبك نادر وحسين حاتلقاني قدامك وقبلهم
ديجور تراجع للخلف بصدمه وضحك بهزوه: هي شوفلك هي
(يعد ع اصابعه) شوفلي جاي وافتح وذانك حسين ونادر وزياد وبناتهم الزوز ومرت حسين هادم التلاته حقهم رصاصه رصاصه ومش حايكلفني سعر الرصاصات حتى 100دينار شوف الرخص
وانا نكمل حياتي محبوس معدوم اي شي كله ز بعض ولا فارقه عندي
مراد عيط عليه: نبي نعرف علااااش
بدي باب الاستراحه يطق
يوسف: ديجور
ديجور فتح
خشو شاهين وايمن ويوسف
مراد: خلاص مافي شي
شاهين شاف مراد: فرخ مراد من امتى ف اسرار بينا حني علاش تسكت فيه
مراد بهزوه: اي حني ماندسو ف شي عليكم لكن ولاد حمدي اهم بالك عمرهم وتقو فينا ولا حكولنا ولا عبرونا
يوسف تعصب: شن داسين عليك ولاد حمدي؟
ديجور قعمز: انا قاعد مانبيش ندير فالطه وننددم
مراد بعصبيه وصوت عالي: لا نوض دير
ايمن: موليين معاش تنطاقو كلكم برسمي
شاهين قعمز جنب مراد: خيرك شن في مراد شن دسو عليك يوسف وديجور
مراد شاف يوسف: نبي نعرف شن بين عيلة حمدي وعيلة ال كريم
يوسف شاف ديجور
ديجور: شي مايعنيكش ومش حايعنيك ز مايعنيني
يوسف: مافي شي يخليني نتحشم نقولك... قاطعه
ديجور بعصبيه: مافي شي يحشم ومش ضروري تعرف شي مايخصكش
مراد شاف ديجور وسكت
شاهين: حتى انا شي مايخصنيش؟
ديجور: الخلاصه انا مشكله بيني وبينهم
يوسف تنهد
شاهين وقف: بدينا ف جو النفاق
انا مايمشيش معاي نقعمز مع حد ونحكي ومدايره خوي وهو داس اسرار وقصص يعني. القصة تقه مش واتق فينا الاستاد ديجور
ديجور طلع تلفونه ومتجاهلهم
ايمن: مشكلتك معاهم بدون مانعرفوها من اربعه سنين وانتم مش صافيين ووقفنا معاك بدون مانعرف السبب وف الاخير تطلع مع هدا كله وواقفين معاك ظالم او مظلوم تجي وبلا بساطه تقول مانبيش نقوللكم
يوسف بيتكلم
شاهين وقف: اي جعلك لا قلت
ايمن تعصب: معاش يهم نعرفو يكفي عرفنا معدنك وعرفت معدنا
ديجور تعصب خبط الطاولة لقدامه حشي فها رجله ووقف: انا مش منافق بس القصة تمسني انا بسس
يوسف كان مش واخد حبة اليوم بدي يحس بدوخه قعمز
وستكو وهما يشوفو لبعض
يوسف مدي نفس: في وفات امي... قاطعه
ديجور: انت قلت انك مش حاتدخل ولا خلاص مش مشكلتك اسكت
يوسف وقف وهو يصرخ: مشكلتك؟ لـ ماتت يومها امي ز ماهي امك بس الفرق هو انك انت لينقالك تصدقه انت صدقت شن قالك بوك بدون اي ادله ضدهم
ديجور صرخ عليه: لو كان كلام بوك كدب ماكانوش عرفو بلحادث
يوسف سكت
ديجور بعصبيه وصوت عالي: ف الوقت لكنت فيه انت متقبل موتها انا مشيت لعندهم ولم مشيت وانا نازل ف نادر ضرب زياد قالي حني مدخلناش بحادث امك
وقتها الحادث مافي حد سامع بيه ف المنطق
شن عرف زياد العيل لـ حتى ف الشارع مايطلع وقتها
يوسف سكت
مراد وشاهين وايمن يحاولو يفهمو
.
.
دنيا ناضت جمعت شوية شيتات
سهى شافتلها
دنيا: غضوا راجعه للكليا
سهى: ايواه باش مهندس دنيا
دنيا ضحكت بهدؤ وسكتت
.
.
سجى مقعمزه ع سريرها وتبكي 💔
ان حتى لو هي رضت
بوها مستحيل يرضى
سجى كانت دلوعة بوها لانها هي الصغيره وهي الوحيده لقعده وعندها اخت متزوجه
سجى تبكي وخشمها احمر وعيونه حمر: ياربي 💔
قامت تلفون بعتتله رساله (انا نحبك بس انا مانقدرش نكسر كلمة بوي صدقني لو يقولي موتي نموت كل شي نوقف ضده الا بوي يامراد )
.
.
ديجور شافلها: اظن كل شخص فهم القصة الخُلاصه ف الليلة السوداء لتوفت فها امي كانت دايره حادث مع بوي وقتها لو مذكرين الحادث لـ قلنا عليه قضاء وقدر كان مخططله من عيلة ل كريم
امي توفت ليلتها بسبب عيله كلهم ع بعضهم ماحد يسواي ظفر رجلها
مراد نصدم: امك؟
ديجور بعصبيه نفجر فيه: انا بكل سهوله ناخد حقي من العيلة الزبالة هادي وحالف انا نوريهم الموت ومايموتو وانت جايني وتقولي بناسبهم
مراد: موتت امك بسببهم؟
شاهين: 4سنين ساكت ع موت امك؟... قاطعه
ديجور تنهد تنهيده طويله: اااه انا هدا الكلام لـ ماكنتش نبي نسمعه هدااا
يوسف حاسس براسه ثقيلللل مش قادر حتى يتكلم يسمع فيهم يتعاركو وبس
ايمن: لو انا من ليلتك حرقتهم وحرقت صغار صغارهم بدون مانفكر دقيقه
ديجور قعمز متعصب ويهز ف رجله: مانبيهمش يموتو ويرتاحو مني
حانكون كابوس كل مايشوفوني يستعوذو من الشيطان الف مره
4سنين مقصرتش ف ولا شي
مراد قعمز بحيل مهدود ويفكر
شاهين جت عينه ع يوسف لـ كان مقعمز وجسمه مرخي ز القماشه دايخ قربله: يوسف
ديجور تلفتت
وهني وشاهين يهز ف يوسف نصدم ان فاتح عيونه ومايتحركش
مراد نض بصدمه: داخ داخ
ايمن خش جاب اميه ومافي حد عرف يتصرف مع مريض سكري 💔
قاموه وسعفوه 💔
.
.
الساعه 4الفجر
ف المستشفى
ديجور وامجد وشاهين ومراد وايمن ويوسف راقد وباقي الشباب ف الممر
الدكتور: كيف ماحد قدر يسعفه بشي حلو
امجد: هو كويس؟
الدكتور: ان شاءالله... ومشي
امجد تعصب شافلهم: 4تيوس معاه كيف داخ كيف ماحد عطاه شكلاطه او شي حلو بس
ديجور كان مقعمز بعيييدددد وحاط جاكيته جنبه وقاعد بنص كم سوداء ف عز لشتي ومطبس براسه ويهز ف رجله 🔥
شاهين: تعاركنا ولم جت عيني عليه لقيته دايخ
امجد بعصبيه:***** قريب طلعت رغوة من فمه ياحميرر ****
ايمن متعصب: فرص باش تسبنا انت خلاص فهمنا انك دكتور وتعرف شن يصير ف الحالات هادي
امجد متعصب: دكتور شني ماتهبلنيش هني انت هادي معلومه عامه حتى الحمير تعرفها ضم فمك ماتخلينيش نستجرم فيكم هني... ومشي لـ ديجور قعمز جنبه
امجد: هدي انت حالته تمام
ديجور ساكت وع وضعه مقعمز ع الكرسي وبنص كم ومطبس براسه ونازله ع وجها كم خصله ويهز برجله
امجد ناض رجع يفهم من شاهين شن صار
.
.
تاني يوم
ف وقت لـ مفروض سهى تنزل وتاخد تاكسي ز العاده وتمشي للتدريب جي عمها واجبرها تركب بعنف غصبها ومعاه سند
دنيا مشت كليتها ووصلتها اسماء بسيارة
سهى متعصبه: خاطفني انت لعلمك
سليمان يسوق وسند شادها وساكت
لعند وصلو ونزلت سهى غصب ويجبدو فها جبد دخلوها لحوش بوها لـ هو نفس الشي حوش جدها
سهى شافت بوها مقعمز ف الجنان مع امير: شن مزال تبي مني؟
حسام وقف وقربعها كف بكل قوته: انا مافيش بنت تنزل راسي
بديت كلبة عند ولاد حمدي ****
سهى ايدها ف مكان الكف شافتله
وبين سليمان وامير وسند وحسام نجبدت سهى داخل الحوش ومافيش واحد من الاربعه هادم ممدش ايده علها
بعد ما كل واحد شفي غليله بركلات ع بطن سهى وضرب ع راسها وجسمها ووشاحها ملوح ع جنب وملوحه ز الجثه 💔💔
بسبب شنو 💔
بسبب انهم فكروها متعاونه مع ديجور لانه لاصق فيهم فكروها سبب ف شي هدا وانه ياخد ف حقها 💔
ماحد يعرف انها هي برغم من كل شي شفاته من بوها هي وقفت ضد ديجور وهداداته بـ انه لو قرب من بوه او خوتها حاتحبسه لانه عليه تهم نصب 💔
ف الوقت لـ سالم شجع مدربته سهى تنسى انتقامها من بوها من وقتها مافرقوهاش المشاكل 💔