اسطوره النسل (أبناء الجارحي)

13- فـول مـغـمـس

صلي على من بكي شوقا لرؤيتنا 🧡
آسيا قامت من مكانها وطلعت مكان ما اسيل راحت ولقيتها قاعده على السطح
'' ايه رايك حضنه حلو مش كده ''
اسيل بذهول: ده معرفش يفرق بيني وبينك
آسيا ابتسامتها اختفت وقالت بغيظ: ده هو اللي لفت انتباهك ثم انتي مكملتيش دقيقه في حضنه وقومتي
اسيل: مش عارفه كنت خايفه ليكشفني
آسيا: انتي هبله يا بت ده ابوكي
ليث جيه وقال: بس حلوه الفكره عجبتني عرفتي تقلدي اسلوب آسيا كويس اوي
اسيل بصتله كتير: عرفت ازاي
ليث :مش عارف بصراحة حاسس انكم مختلفين شويه عن بعض معرفش ازاي
ليث قرب من اسيل وقال: ينفع اخد حضن من اختي
اسيل: ما اختك اهي وراك
ليث: وانتي مش اختي مثلا
اسيل: انتي شايف ايه
ليث حضنها جامد: انتوا الاتنين اخواتي
اسيل رفعت ايديها ببطء وضمته حست نفس الشعور اللي بتحسه مع آسيا
آسيا بتذمر: ايه ده وانا اختكم برضو علفكره
التلاته حضنوا بعض واسيل نوعا ما حست بدفا العيله حست اني ليها سند فعلا بأخواتها ومن بعيد كانت بتراقبهم شمس وهي مبسوطه اني اسيل اتقبلت ليث ومصدتوش زي ما عملت معاها فخرجت تليفونها واخدت ليهم صوره لاني اللحظه دي مهمه اوي
ورد من وراها: منظرهم مؤثر بصراحة
شمس بصت وراها: انتي....
ورد: متزعليش من اسيل
شمس: وازعل منها ليه
ورد: اسيل كلامها دبش وبيزعل احيانا بس اعذريها اسيل واحده عاشت ومرت بظروف وحشه اوي طبيعي الزمن يخليها كده بس هي طيبه والله حاولي تكسبيها انا عارفه بصراحه انه صعب اوي بس حاولي
شمس بصتلها: انتي مين
ورد بغموض: مش مهم انا مين المهم انتي مستسلميش
           ~~~~~~~~~~~~~~~~
الله اكبر..... الله اكبر
وها ذا الصوت الذي يكاد يبكي الجميع من أجله في نهايه النهار في شهر رمضان انه آذان المغرب ويكون جميع العرب بدون استثناء في منازلهم ليتناولوا الإفطار مع من يحبون في جو عائلي لطيف ودافئ
نروح بقى في البيت الكبير كان الرجاله قاعدين في مكان والبنات في مكان نظرا لاني العدد كبير اوي وده اللي احنا بنعمله في عزومات رمضان وطبعا وزي اي صائم في الصيف بيشرب مياه كتيو لحد ما معدته تبقى عايزه تديه بالقلم
وبعد الإفطار كان الكل بيروح واحد وراء التاني الحمام علشان يغسلوا ايديهم والكل كان قاعدين في الصاله بعد ما معده الكل بقيت كلها مياه + عصير
طيف: ااااه ااااه يا بطني يا لهوي مش عارفه اتنفس
رحيل: انا استاهل ضرب الجذمه اني فضلت اشرب مياه وعصير حاسه معدتي هتفرقع
غيث: حد يفتح يا جدعان التلفزيون عايز اعرف مسلسلات رمضان السنه دي عن أي
شغف: وده ايه ده أن شاء الله اومال مين اللي هيغسل المواعين اللي جوا دي
البنات بصوا على بعض وقالت غرام: صلوا على النبي كده بما اني شهر رمضان طويل احنا هناخدها بالحروف الأبجدية اشطا يلا بقى البنت اللي حرفها يبدأ بألف تقوم
الكل بص على آسيا واسيل لأنهم البنتين الوحيدين اللي بحرف الألف
آسيا: على فكره أنا مش ألف عاديه
حلا: عاديه ولا صناعيه اسمها ألف في الآخر
آسيا: لحظه بس كده مش انا بس ألف اسيل برضو
اسيل بصتلها بضيق: انتي هتخليني اغسل المواعين بجد
آسيا: ايه يعني مش شايفه عيب في الموضوع
ورد: بلاش تتخانقوا وشوفوا ايه الحرف اللي يسبق الأول في اسمكم واللي يقع عليها الاختيار هي اللي هتغسل المواعين
آسيا واسيل في نفس الصوت: حرف السين
ليث: طب اللي بعده طيب
آسيا واسيل في نفس الصوت: حرف الياء
فجر: لا كده كتير طب اللي بعده
اسيل بانتصار: حرف اللام وانتي ألف يلا بقى على المواعين
آسيا وقفت بتذمر: بقى انا الامبراطوره اروح اغسل مواعين حسبي الله ونعم الوكيل
شمس: متولوليش اوي كده هما مش كتير
(وطبعا زي اي بنت مصريه امها تقولها كده بتروح تلاقي جبل مواعين مستنيها )
آسيا فتحت بوقها بذهول: دول مش كتير اومال لو كتير هيبقى ايه يارب اطلع حيه
آسيا لبست مريول المطبخ وبدأت تغسل جبل المواعين بس سمعت صوت من وراها
'' تؤ تؤ تؤ بقى الامبراطوره على آخر الزمن تغسل المواعين ''
آسيا بغيظ: جاي تشمت فيا يا كينج
مصطفى ضحك وقرب منها وحط ايديه على الرخامة وآسيا اتحاصرت ما بينه وبين الرخامة
آسيا: ايه عايز ايه
مصطفى: عايز احلى
آسيا: شمس شايله الحلو بس مش عارفه فين
مصطفى همس قدام شفايفها: لا انا عايز حلو من نوع تاني
آسيا رجعت رأسها لوراء: مصطفي انت بتعمل ايه حد يدخل علينا
مصطفى ثبت رأسها: ما اللي يدخل يدخل هخاف مثلا انا..... اااااااه
جين ضربته على رأسه من وراء: طب احترم نفسك واطلع برا وبطل قله ادب شويه
مصطفى: جيتي ليه دلوقتي كنتي اتاخرتي لحد ما ابوس
جين: وانتي يا اختي سيباه كده
آسيا: اومال اعمل ايه
شغف: اديه في القاضيه خليه يتلم شويه
مصطفى بفزع: تديني فين لا سلام عليكم انا
           ~~~~~~~~~~~~~~~~
أما برا كان الكل مركزين في المسلسل اللي بادئ وقال ريان
'' بس هي البت دي هتبقى عقربه المسلسل خلصت ''
حلا: واطيه بقى بتخدع صاحبتها اتفوخس
فجر: احذر من عدوك مره ومن صديقك الف مره
رعد/ فعلا
فجر: ايه انت اتخانت ولا ايه
رعد: ايه لا طبعا
حلا: ايه يا جدعان اومال الحلو فين
رسيل خرجت وهي شايله طبق كنافه والبنات شايلين اطباق حلويات
'' اهو يا ام بطن ''
عمار: ايوه كده ايوه كله خلوا الواحد يحس انه رمضان فعلا
ليث وشمس بصوا لبعضهم بحسره وقال سيف بتحذير
'' اقسم بالله واحد فيكم يمد ايده على اي طبق من دول والله لاضربه سامع يا ليث ''
ليث بتذمر: ايه الظلم ده يرضى مين ده ها
شمس: معلش يا ابني ربنا على الظالم والمفتري
سيف: انا خايف عليكم انتوا بتقّلوا في الأكل وبتتعبوا
ورد باستغراب وهي بتاكل: ليه مالهم
حياه: عندهم السكر هما الاتنين
رحيل: يا حرام
ليث: اه وربنا حرام انا مالي انا اخد السكر وراثه منك ليه
شمس ضربته على قفاه: يعني هو كان بأيدي وبعدين ما انت اخدت لون عيوني وغمازاتي جات على السكر يعني
ليث بحسره: حرام هما ياكلوا الحلويات دي كلها واحنا نتفرج
آسيا: ده احسن ما تتعبوا
شمس حطت ايدها على كتف ليث: تعالي يا ابني ناكل البسكوت بتاعنا ولا الحوجه للناس المعفنه دي
ليث بدهشه: انتي جبتي منه تاني
شمس: اه طبعا اومال خليت رحيم يجيب 4 كراتين انت كرتونتين وانا كرتونتين
شمس وليث مشيوا وقالت ورد
'' هما مش عادي يعني لو أكلوا حاجة بسيطه ''
احمد: اديكي قولتي حاجة بسيطة اما هما مش بياكلوا حاجة بسيطه خصوصا ليث الجذمه ده
سيف اتنهد: ملك هاتي طبق بس متحطيش فيه كتير
مروان: طب لازمته ايه الكلام اللي بتقوله لو في الآخر هتروح ليها بطبق حلويات
سيف اخد الطبق وطلع لفوق: مش بقدر اكسر بخاطرها
ورد فكرت شويه: طب وليث ومأخدش له طبق ليه
آسيا: علشان ليث كده كده هياكل في الآخر حتى لو من ورانا
           ~~~~~~~~~~~~~~~~
شمس كانت قاعده في الدور التاني وبتدور على البسكوت اللي كانت مخبياها بس سمعت صوت سيف من وراها
'' شمس ''
شمس لفت وربعت ايديها: عايز ايه مش مرضت...
سيف قاطعها وحط صباع الكنافه في بوقها
'' بلاش كلام انتي عارفه كويس اني خايف تتعبي''
شمس بلعت بالعافيه ولسه هتتكلم لقيت صباع تاني
'' اممممممم ''
سيف: اممم ايه عايزه ايه
شمس مضغت بصعوبه: انت بتزغط بطه براحه
سيف بغمزه: احلى بطه دي ولا ايه
شمس بمرح: كبرت خلاص يا سيف علي الغمزات دي
سيف رفع حاجبه: كبرت طب تيجي اثبتلك اني لسه بصحتي يا شيطان
(عيب يا سيف ده انت داخل على 55 سنه عيب يا راجل )
           ~~~~~~~~~~~~~~~~
أما على السطح كان ليث قاعد على سور البلكونه ومستني شمس تيجي بالبسكوت
(معلش يا ليث يا ضنايا شمس مشغوله دلوقتي هبعتلك حد احسن )
ليث لقي حد قعد جنبه ودي ما كانت الا ورد اللي مدت ايدها بطبق فين كام حته حلو
'' ايه ده؟!!!''
ورد: ايه بسبوسه وكنافه
ليث: ايوه جيباهم ليه
ورد: طب تصدق انا غلطانه
ليث: لا مش غلطانه هاتي هاتي
ليث اخد الشوكه وبدأ ياكل وورد ابتسمت عليه
ليث: ايه يا بت متبصليش كده هزور في الأكل
ورد بصتله بقرف: انتي هتزور فعلا بس علشان بتتكلم وانت بتاكل
ليث خلص الطبق: شكرا
ورد: العفو
ليث: احم ممكن أسألك سؤال
ورد: عايز ايه
ليث: هو انتي جبتي الطبق ليه
ورد رفعت كتافها: مش عارفه يمكن علشان عارفه شعور اني الواحد يكون محروم من حاجة بيحبها
ليث: قصدك على حساسيتك من القرفه
ورد بشرود: لأ
سمع الاتنين صوت عالي من تحت وقالت ورد باستغراب
'' ايه الصوت ده ''
ليث: مش عارف تقريبا حد بيتخانق تحت
نزل الاتنين وكمان نزل شمس وسيف ولقيوا مصطفى وآسيا بيتخانقوا تعالوا بقى احكيلكم ايه سبب الخناقة
Flash back
مصطفى كان قاعد بياكل في طبق الحلويات وآسيا كانت بتراقبه بس قامت فجأه كده ومسكت جاكيت مصطفى وبعدته شويه وفتحت عيونها بصدمه وغضب
'' ايه ده ''
مصطفى بعدم فهم: ايه فيه ايه
آسيا: في روج على قميصك يا مصطفى
مصطفى بص على قميصه واللي كان لونه ازرق داكن بس مش قوي
'' اااه يا اروبه شوفتيها ازاي دي ''
آسيا بغضب: انت هتهزر يا مصطفى مين صاحبه الروج دي انت بتخوني
فجر: بتخونها يا لهوي وجالك قلب تعمل كده
مصطفى: بخونها ايه انتي كمان هتولعي الدنيا والله ما بخونك يا اسيا
آسيا بغضب: اومال ايه دي ها ايه دي اوعي تقولي كانت هتقع ولحقتها ومعرفش ايه
مصطفى بغباء: ما هو ده اللي حصل فعلا
لين: شغل روايات مفقوسه ده يا درش
عمار: أخص عليك يا درش بقى حد يخون آسيا
مصطفى رمي عليه الوساده: كله بسببك يا حيوان انت جايب رقاصه مش عارضه
آسيا: وانت رقاصة ولا عارضه تخليها تحضنك ليه
مصطفى: انتي مكبره الموضوع علفكره قولتلك غصب عني كانت هتقع
آسيا: يا سلام يعني انت لو جيت في يوم وشميت ريحة بارفيوم رجالي مني وقولتلك شخص وقع عليا هل هتسكت
جين بلطم: يا لهوي اسكتي الله يخربيتك حد يمسكه
مروان وعمار بسرعه مسكوا مصطفى ومصطفى بص لآسيا بغضب يكاد يحرقها فإذا كان مصطفى غضبه شديد فغيرته أشد
'' وربنا يا آسيا لو حصل لاقتلك واقتل اي حد يفكر يقرب بس منك ''
Back
سيف: فيه ايه
آسيا بغضب: فيه اني مصطفى بيخوني
مصطفي: برضو بتقول بيخوني وربنا ما خونتك
آسيا: وانت تعين واحده رقاصه عندك ليه
ليث شهق: هاااااا رقاصه يا درش طب كنت قولتلي طيب
سيف بغيظ: يقولك ايه انت كمان
شمس: فيه ايه انا مش فاهمه حاجة
اسيل بهدوء: علامه روج على قميص مصطفى هوب مسكوا في خناق بعض
شمس: والروج ده جيه منين
مصطفى: الزفته الجديده وقعت عليا
ورد: علفكره شغل الروايات اوي يعني عارضة عايزه تغوي جوزك بس هو صدها
ليث: اسمعوا من العاقلة
ورد كملت: او مصدهاش يمكن تجاوب معاها
ليث: يخربيتك هتولعي الدنيا
آسيا بتذمر: انا مش هروح معاك يا مصطفى
مصطفى: متخليش الموضوع يوسع يا آسيا
آسيا وقفت جنب سيف: ابا انا مروحه معاك النهارده
ليث: والله هو البيت جنب البيت مش هتفرق
مصطفى بص لآسيا بذهول: ده كله علشان الروج اومال لو قفشتيني مع واحده هتعملي ايه
آسيا بصتله بغضب: وأنت لو... اممممم
اسيل كتمت بوقها: بس يا اخي بقى بس
حسن: طب يلا كله كده على الجامع علشان نصلي التراويح
فجر بصدمه: ايه تروايح يا لهوي ده انا بتعب وانا بصلي صلاه الجمعه انت عايزني اصلي 10 ركعات مره واحده واكتر كمان
ريان: اااه ضهري رجلي يا اختاي يا اختاي يا اختاي
حسن: محدش هيهرب برضو يلا يا جذمه منك ليه قدامي
           ~~~~~~~~~~~~~~~~~~
بعد كام ساعه
في بيت سيف وبالتحديد في اوضه ليث كان قاعد هو وآسيا واسيل وورد اللي أصرت اسيل انها تيجي معاها
ليث: مش فاهم برضو انتي جيتي هنا ليه
آسيا رفعت حاجبها: بيت ابويا يا ليث واجي وقت ما انا عايزه
ليث ضرب وشه: يا لهوي مش قصدي كده قصدي يعني الخناقة مش مستاهله الافوره اللي حصلت دي كلها
آسيا سكتت: هو انا كنت اوفر
اسيل: بصراحة اه كبرتي الموضوع زياده
آسيا' اممم خلاص ابقي اصالحه بعدين
ليث بص لورد اللي كانت نايمه على رجل اسيل وقال
'' ملاك وهي نايمه بس أعوذ بالله منها وهي صاحيه ''
ورد اتعدلت مره واحده: ليه ببقي جن ولا حاجة
ليث: بسم الله الرحمن الرحيم انتي صحيتي مره واحده كده ازاي يا بت
ورد: بته اما تبتك
اسيل ضربت كف على كف: لا حول ولا قوة الا بالله هو انتوا دايما ماسكين في خناق بعض كده
آسيا بضحك: واتلم تنتون على تنتن واحده نتن والتاني انتن
ليث شم هدومه: نتن ايه معلش ريحتي حلوه مش وحشه
سمع الكل صوت جاي من تحت فقالت ورد: هو فيه حرامي في البيت ولا ايه
آسيا: لا ده تلاقيه بابا في المطبخ
ورد بصت للساعه: وابوكي بيعمل ايه في المطبخ الساعه 2 بالليل
ليث: هو بغض النظر عن اني فاضل ساعه على السحور الا اني دي عاده عندنا في عيله الجارحي بنصحي بالليل علشان نعمل حاجه نشربها
ورد: ايه ده بجد يعني اسيل زيكم
آسيا وليث ابتسامتهم وسعت وبقيت من الودن دي للودن دي
اسيل بعدم فهم للابتسامه دي: ايه؟؟!!
ليث وآسيا شدوا اسيل بسرعه: تعالي ننزل
اسيل ملحقتش تستوعب اي حاجة غير وهي قريبه من المطبخ فقالت بفزع
'' لا لا لا لا انا مش عايزه اشرب حاجة''
ليث شدها: تعالي بس
آسيا بمرح لسيف اللي كان بيعمل عصير نظرا لاني الجو حر وكان مديهم ضهره
'' مسا مسا عليك يا بوب ''
سيف لف: مساء ال....
سيف بص لاسيل اللي كانت في النص ما بين ليث وآسيا
'' ااسيل ''
اسيل بصتله وملامح سيف اتحولت لابتسامة حنونه
'' تعالوا كنت فاكر مش هتنزلوا علشان رمضان ''
آسيا شدت اسيل: لا عيب عليك عملت ايه بقى
سيف صب العصير وقال بهدوء: عصير برتقال
ليث نكز اسيل علشان تتكلم وهي قالت بتوتر كأنها في مقابله عمل مهمه وليست سهره عائليه في المطبخ
'' ههـ هو انت بتحب عصير البرتقال ''
سيف ابتسم بفرحه لأنها اول مره تبدأ الكلام
'' ايوه بحبه اصبلك كوبايه ''
اسيل: احم ماشي
ليث وآسيا بصوا لبعض فها هي اسيل على أول درجات الوصول إلى دفء العائله
وطبعا كانت شمس مراقبه ليهم من بعيد بس ورد قالت كالعاده من غير استئذان
'' وانتي هتفضلي بعيد كده ما تشاركي معاهم  ''
شمس بخضه: يخربيتك انتي بتظهري مره واحده كده ازاي
ورد: ايه اللي ازاي عادي يعني المهم ادخلي كده شاركي وحضري السحور وكده يعني
شمس: لا بلاش أفسد عليهم انا اللحظه دي
ورد رفعت حاجبها: ليه وانتي مش من ضمن العيله ولا ايه
شمس اتنهدت: من ضمن العيله بس
ورد شدتها: مفيش بس يلا يا وليه انا اصلا جعانه
ورد: احم احم معلش يا جدعان هنقطع عليكم اللحظات دي علشان جوعانين
سيف بابتسامه: ها يا شمس ايه السحور
شمس: احم اللي انتوا عايزينه
ليث بحماس: تعالوا نعمله كلنا
ورد ببراءه: هو انا مش ضيفه هتشغلوني معاكم
ليث بصلها بقرف: مش لايق عليكي البراءه دي خالص
ورد بصتله بغضب كأنها تحولت: انا بقول برضو انك مش وش هدنه
ورد نطت عليه ومسكته من شعره وشدته من شعره
'' تعالالي بقى بشعرك ده لانه معصبني''
شمس بصتلهم بذهول: مش فاهمه الاتنين دول كأنهم مولدين فوق بعض كل شويه خناق
سيف بصلها وابتسم: ما محبه الا بعد عدواه
شمس رفعت حاجبها: طب روح فكهم
آسيا وسيف راحوا يفكوا ليث وورد اما اسيل قربت من شمس وقالت
'' اسفه على الكلام اللي قولته ليكي كان جارح اوي''
شمس ابتسمت ليها: ولا يهمك انتي زي ليث وآسيا عندي
اسيل سكتت لأنها مش عايزه تقول كلام تاني يجرحها ففضلت السكوت
           ~~~~~~~~~~~~~~~~
في بلكونه فجر والبنات كانت قاعده في البلكونه وهي بتاكل او بمعنى بتخزن علشان تاني يوم بس سمعت صوت ضحك من البلكونه اللي جنبها
'' كفايه اكل هتنفجري ''
فجر بصت على الصوت ولقيته رعد فقالت وهي بتاكل
'' وانت مالك يا رخم انت''
رعد: مبدئيا كده مفهمتش ولا كلمه
فجر بلعت الاكل: قولت وانت مالك
رعد: والله مش لوحدك اللي بتلغّي انا جايب الاكل علشان آكل اهو
فجر: بصرف نظر عن الكلمه اللي مفهمتهاش دي بس ما الحال من بعضه اهو اومال بتتريق ليه
رعد: مش قصدي اتريق
فجر وقفت: طب شكلك واحد فاضي وانا رايحه انام سلام
رعد: اممم سلام
فجر عدت من جنب السور اللي كان بيفصل ما بينها وبين رعد بس شمت ريحه الاكل هي مش عارفه ايه الريحه بس عجبتها
فجر: بقولك هو الاكل ده اسمه ايه
رعد باستغراب: فول مدمس
فجر ابتسمت باتساع: وده بيتعمل ازاي
رعد: لا ده احنا بنشتريه من عند بتاع الفول اول الشارع
فجر بحماس طفولي: هاروح اجيب منه حالا
رعد بسرعه: خدي يا بت هنا
فجر رجعت: عايز ايه
رعد: مينفعش تخرجي في الوقت ده خلاص الفجر قرب يأذن
فجر بتذمر: بس انا عايزه من المغمس
رعد كتم ضحكته: مغمس ايه اسمه مدمس
فجر: ما علينا
رعد: طب استني هديكي شويه منه انا جايب كتير
فجر :بجد
رعد: اه والله لحظه بس اجيب طبق احطلك فيه
رعد غاب دقيقتين ولما رجع لقى فجر بتاكل في الطبق بتاعه
'' يخربيتك ده الطبق بتاعي ''
فجر وهي بتاكل: هدفعلك حقه يا عم بس تصدق طعمه حلو
رعد: اومال طبعا ده الاكل المصري لا يقاوم
فجر: هو اه لا يقاوم بس بيجيب تلبك معوي
رعد: ده علشان انتي معنديكيش معده المصريين أصله المصريين معدتهم حديد وعندنا مشاء الله مناعه شديده جدا
فجر نفطت ايديها: طب يا رجوله شكرا على المغمس
رعد: يا بنتي اسمه مدمس اقولك قولي فول عادي
فجر: فول خلاص ماشي تصبح على خير بقى او صباح الخير مش عارفه بصراحه هيتقال في الوقت ده
رعد بضحك: وانتي من اهله يا اختي روحي
(حاسه اني فيه قصه حب هنا سيكا )
           ~~~~~~~~~~~~~~~~
عدي يومين ولم يخلوا اليومين دول من عراك ورد وليث المستمر 25 ساعه في 24 ساعه واسيل بدأت تتقالم على الوضع شويه بشويه وداليدا بدأت تتوتر من نظرات فارس ليها هي مش متعوده انه حد يراقبها كده بس مش بتبين اي شيء من التوتر غير انها دايما هاديه اما ثنائي المفاجيع رعد وفجر فعملوا البلكونه قعده اكل قبل الفجر ورعد بيجيب كل يوم صنف مختلف واللي في كل مره تنبهر به فجر اما الباقي زي ما هما
نروح بقى قبل الفطار بساعتين كده وكان الكل قاعدين ومستنين الوقت يعدي بس دخل كذا شخص كده استغرب ليهم رحيل والبنات وبالنسبه للأشخاص دول قال واحد منهم بمرح وصوت عالي
'' ابو الخوالد حمد الله على السلامة يا راجل ''
خالد بص بصدمه وقال بضحك: عمر الجارحي يخرب عقلك
           ~~~~~~~~~~~~~~~~

Sabreen 🧡