الوصيه

38

البارت الثامن والثلاثون

ياحزن غني
وجيس الصواب
تانيتهم حد ماغفه الباب
.
.
.
ناصر البدري
.
.
.
وجد
.
.
گعدت الصبح باوعت شفت فهد گبال وجهي

بس شافني گعدت دنج باس خدي و حجه

- صباح الخير يا احلى صباح اشوفه

ابتسمت و جاوبته

- صباح النور

مد ايديه حظني لصدره باس جتفي باوعت ع الساعه ب ١١

گمت ع حيلي

- هم يله نتحظر

جرني عليه حظني

- خلينه هيج

- خطيه هسه تلگاهم منتظرينيه خلي انروحلهم

بالگوه گمت من يمه رحت سبحت و طلعت امشط بين ما هو طب سبح و بدل

خلصنه و رحنه اتريگنه و طلعنه للبيت

استقبلونه بالهلاهل و الجكليت جرتني امي باستني و اتباركلنه

وراهه كلهم جروني صرت من ايد لأيد

لحد ما صرت بحظن ابوي باسني و حجه

- مبروك بنيتي ان شاء الله اتشوفين بس الخير

- الله يبارك بيك

سلم عليه فهد

طبينه جوه اتغدينه و صعدنه فوگ

حتى العشا هم صعدوه فوگ ابوي ما رضى ننزل جيف الگرايب كلهه موجوده

لحد ثاني يوم اكثر الموجودين راحوا

نزلت جوه اباوع على امي ترگض هيج و ترگض هيج اتنظف انقهرت كفيت ارداناتي و گعدت انظف وياهه

رحت اول شي للديوانية نظفتهه و هي اجت شافتني گامت تحجي

- مني عاتب عليج و گايلج اتنظفين؟ وخررري

جرت المكناسه من ايدي و گامت تحجي و انه اجر وهي اتجر

- يمه شكو قابل اول مره انظف؟ و بعدين انتي وحدج

- لا مو وحدي امي وياي و انتي بعدج عروس مختلفه السالفه هسه

جرتني و دفعتني برا و هي تحجي

- امشي صعدي لزلمتج كلشي ما اريدن منج

عقجت وجهي

- هسه شني السالفه شمسويه حتى هيج اتضوجين؟

- دوولي صعدي

- ما اريدن اصعد اريدن اكل

ذبت كلشي من ايدهه و گالت

- روحي گعدي فهد و هسه اسويلكم غدا

راحت اتحمي و انه صعدت اگعد فهد