اطباع ضباع
"البارت الرابع"
حِـين يتعلق قلبـك بدُعاء ، ويفاجُــؤك الله بِـالفـرج من حيـثُ لا تـحتسب 🍀
حاوطت جود وجها بين يديها بـ ابتسامة واسعة رتسمت علي مبسمها مع دموعها لقعده تدرف من عيونها بـ فرحة ، فرحة انه طلقها ، طلقها بـ التلاته ، ولت تحرم عليه ، ولت حره منه .
طقات خفيفه علي باب الحمام خلتها تنزل يديها علي فمها كاتمه صوت ضحكتها لـ طالعة من اعماق قلبها وهيا تسمع في صوت اسلام : جود
خدت جود نفسها ماسحة دموعها بزفير طلعت معاه صوتها المبحوح: اهو طالعة
وتلفتت فاتحة شيشمة لميه غاسلة وجها لـ رفعاته لـ المرايه متأملة ملامحها لـ فجأة ملتهم السعادة ، ختفي منهم الارهاق ، التعب ، الهم ، والحزن ، وكـ انه كلمة طالق ، رجعت الدم في عروقها ورجعت النور لـ وجها العابس من سنه كاملة ، برغم الكدمات والجرح الدامي لـ متوسط جبهتها ، الا انه مش خافي سعادتها وفرحة ملامحها .
سكرت شيشمة لمية وتلفتت مسحت وجها في الفوطه لـ تلطخت بدم جرحها ، وخدت نفسها قبل ماتفتح الباب وتشبح نجاح واسلام وحماتها لكبيرة نجاة لـ قربت منها : تعالي تعالي قعمزي كسر يدياته ان شاءالله
وتلفتت لـ اسلام : نوضي جيبي تنتوره وقطن وفاشه خل نديرولها جبهتها
وقفت اسلام مشت وخلت نجاة لـ قعمزت جود لـ متحكمة في ملامحها لـ حولتهم لـ الهدوء والجمود بـ صمت لازمها ماقطعة شي الا صوت خالتها نجوي لـ خشت : جود
رفعت جود راسها بـ دموع رجعت ملت عيونها واقفه حاضنه خالتها نجوي لـ ضمتها ناظره لـ نجاة : شن مداير فيها هدا شن مداير
وبعدت نجوي جود ناظره لـ جبهتها لـ تنزف : الله يكسر يدياته شن مداير فيك
نجاة : قعمزي يانجوي ماترعشيش المراة اكتر ماهيا راعشة
نجوي : وهيا مزال بترعش اكتر من هكي
وقفت نجاح بـ انزعاج من كلام نجوي : استهدي بالله يانجوي وماتزيديش الطين بله بنت اختك حتي هيا غالطه زيها زي ولدنا
شبحت نجوي لـ جود لـ هزت راسها بـ النفي خلت نجوي تتنهد محاوله تمسك اعصابها تحت نظرات نجاة لـ فنصت في نجاح لـ تأفافت وطلعت من الدار .
.
ضيق الحاج ناجي عيونه في خوه الحاج عبدالعاطي وقال بـ حده : كان علت صوتها عليه يطلقها بتلاته ، شن هيا سايبه ماعنداش عقل يفكر فيه
هز الحاج عبدالعاطي بـ خجل من خوه لكبير ممزوج بـ الغضب العارم من ولده لحطه في موقف لا ينحسد عليه ، خلا السانه يرتبط من عملته : ربي يهديه لحظة غضب واهو كلاها علي راسه
زاد الغضب تمكن من الحاج ناجي لـ صوته تعلا : من لكلاها ولدكم ولا بنتنا لولت مطلقه بين ليلة وضحها شن بيقولو عليها الناس بعد سنة من زواجها اطلقت بطلعو فيها اللي داراته واللي ماداراته الغلط بطلعوه كله منها هيا مش من ولدك لمش قادر يشد السانه تقول عيل مش راجل بشنباته
