_
أطباع ضباع
"البارت الخامس"
ويـأتِيك أمر من حَـيث لا تُـحتسب يُـبعثر موازيــن حياتُـك 🌪
:هيا لعبة لوحها طلال ناخذها اني ولا شنو بجديات تدوو ولا قعدين تتسهوكو عليا
قال الحارث كلماته بـ صدمة وهدوء متنقل بـ نظره بين طلال لمشبك يديه موطي وجهه لتعبير الغضب مرسوم عليه ، وبين بوه لـ قال بـ انفعال كسر هدوئه : لا نتسهوكو منظري ومنظر خوك منظر تسهويك
وقف الحارث بـ انفعال وغضب مكسر صدمته الهاديه لكان عليها قبل شوي بصوت عالي : منظر تسهويك ايه منظر تسهويك يابوي كلامك ، دوتك تسهويك ، طلقها هوا يتحمل لداره ماتجوش تحطوني في امر واقع اني مش مسؤال عليه
صيح عبدالعاطي بـ غضب بـ صوته الغليظ وهوا يوقف : لا مسؤول عليه اللي داره كلنا مسؤولين عليه ماتجوش في اخر عمري اديرولي مشكله مع خوي وتسودو وجهي قدامه وتخلونا نتفرقو في اخر الزمان ، غصب عليك وعلي خشمك تتزوجها وتحللها لخوك والا غضبي عليك لا يوم الدين ولاك والدي ولاك قعد تحت جناحي
في لحظه امتحت من داكرت الحارث انه لقدامه بوه لـ يهابه ويخافه حد الرعب مقرب منه بـ صوت عالي غاضب حد الجنون : اجعلك معاد رضيت ولا حطيتني تحت جناحك وزواج مانيش متزوج يابوي واعلا مافي خيلك اركبه
نهي كلامه بـ نظرات تحدي لـ عبد العاطي لـ الدم صعد لـ راسه وهوا يشوف في الحارث لـ تلفت بـ يطلع بس طلع صوته بـ صرخة تهديد : امالا اسمع ارض وادي الربيع لبعتها بـ مليون تحسابني راقد علي وداني حقها نبيه اليوم وتوا والا نجيبه بالمحاكم
وقرب بـ خطواته واقف قدام الحارث خابط عكازه في الارض مرتين مكمل : تلاته شهور عندك ياولد فكر فيهم كيف ماتبي جيبها حدفها يا تتزوج ياتنحبس علي لفلوس لودرتهم في مشروعك الفاشل
بلع الحارث ريقه بـ عجز طفي جزء من انفعاله لـ تبدل لـ خيبة امل ، هامس بـ مبرر مشكوك في امره : الارض بأسمي كيف بتحبسني واني بعت ارضي
عبدالعاطي : من قال بأسمك انت الوكيل بس مافيش حاجة بأسمك
ضم الحارث شفايفه بـ خيبه من نفسه لـ الباين حـ تقعد في طوع بوه المتحكم ، رافع يده حك طرف خشمه راجع رافع عيونه لـ بوه بـ هدوء رجع تلبس صوته : باهي تزوجتها وحللتها وطلقتها و ولت لطلال ، هدا مش حرام ، تفسرو في ايات ربي علي كيفكم قبل ماتسألو مفتي عالم وعارف ايات ربي مش الجاهلين لقعدين في الجوامع يفسرو علي كيفهم من غير تعليم مش فالحيين غير يحلالو اللي يناسبهم ويحرمو اللي مايناسبهمش
خبط عبدالعاطي عكازه علي الارض بـ رفعت حاجب ناطق بصوت حاد : وهذا مايناسبكش اكيد بتشكك فيه وبتحرم فيه ، انت غير صلي صلاتك وشد المصحف بعدين تعالا ادوي
مرر الحارث يده علي ملامح وجهه لـ ابتسمت بـتشنج ابتسامت استهزاء بمسمع مع بوه لـ قال خاتم كلامه : كلامي وقلته وقدامك تلاته شهور قكعورها كيف ماتكعور في راسك
