طباع ضِباع
"البارت التامن والعشرون"
بيننا وبين الحقيقه خيط إبرا 🪡
لحظة ادراك ، ان كل قناعاتك مضروبه في عرض الحائط ولا شي منها له اساس من الصحه ، هيا لحظه بس تسوا سنين من عمرك ، لحظه تخليك تقتنع بشي حاولو كبار صغار بقناعك بيه من سنين ، هيا لحظة النجاء من الظلام الابدي ...
رتسمت بسمه علي مبسم جواهر لزداد خجلها من كلمات نسايم: خلاص عاد حشمتو لبنيه ، اصلا ياسين مايبيش يعطيها قعده صغيره برو دورو لمعزرتكم بعيد علينا
ضحكت حنان عمت ياسين لكبيره : ههههه ربي يحفظك لوخيك ويحفظك ليه ، كنا نبو نشوفو جود حتي هيا خيرها ماجتش معاكم
رفعت جواهر عيونها فيها برفعت كتاف: جمعه اليوم لاهيه مع حمواتها
نسايم: الجايات اكتر من الرايحات ان شاءالله ، تي وينهم هدا كله يوتو في النسكافي
جاها صياح رتاج من المظبخ لمقابل دار المعيشه: نوضي حركي روحك معانا نوضي خليتينا اني وجنة بروحنا والكلبات هدوكم مشو لحوش خالي بـ بكرة ابيهم
رفعت نسايم حواجبها متلفته لـ حنان: بنتك ناقصتها ربايه تكلم في خالتها لأكبر منها هكي
قالت نسايم اخر كلماتها وهيا تنوض وتخلي في جواهر تتلفت لـ حنان لقالت بـ ضحكة : هههه كل مايتعاركو تجيب سيرة العمر كذبت الكدبه وصدقتها
رفعت جواهر حواجبها: علاش كدبه هههه
حنان : تي هيا اصغر من رتاج وياسين ، لكن تره قولي قدامها تاكلك بقشورك ، عندها كان هيا خالتهم عيب نقولو انها اصغر منهم ههههه
تعلت ضحكت جواهر بفرحه وسعاده انها وسط عيلة خوها ، وسط بيئته ، ونشأته ، ولا كانت تتخيل في يوم انه حـ تولي قريبه منه هكي ، ولا يوم تخيلت كل كرها وحتقارها لكانت اظن انها تكنه ليه عبارة عن وهم وهوا عكس ماظنت تماما ، وانه هوا حب وشوق ، لدرجة خلاها في شهر تتعلق فيه تعلق يخليها تستغني عن الجميع علي خاطره .
خدت جواهر نفسها من بين بسماتها وهيا تتلفت لـ تليفونها لعن عن مكالمه لـ اول ماقامت التليفون بين يديها وشافة هوية المتصل تلاشت بسمتها بـ قرنت حواجب خلتها تتلفت لـ حنان : عادي نطلع نرد علي التليفون ولا فيه حد برا
حنان: خشي للمربوعه خير ممكن مافيها حد ، برا بالك لولاد يتحاوسو
بتسمت جواهر بـ هزت راس قبل ماتوقف تتلفت تطلع بخطواتها من جنبهم داخله لـ المربوعه لـ اول ماردت بابها فتحت الخط راده : ايوا حيدر
جاها صوت انفاس حيدر اللاهته لـ خلتها ترفع حواجبها : الو حيدر الو خيرك ؟! الو
خدي حيدر انفاسه بشهيق وطلعه بزفير مع صوته المرتعش كـ رعشت يده لماسكه التليفون : جـ جـود ، كلمي جود تـ تـ تـ ـوا كلميـ ـها يالجواهر ، قو قـ ـولها ماتسكتـ ـش قولها كـ كـ كـ ـان تعرف حاجة تـ ـكلم ياسين ولا الحـ ـارث وتقولهم كـ ـل شي ضروري ياجـ ـواهر تـ ـوا ضروري تـ ـوا توا كلميها سـ سـ ـكري وكلميها مـ ـاعاش تستـ ـنو تكلمو ماعاش تسـ ـكتو
