-كيف أتوبك يا أجمل ذنوبي-

البارت الأول

في إحدى محافظات نجد
أبو فهد كالعادة قاعد فالحوش حق بيتهم وكان الجو شوي برد وقدامه زايد اللي يقهويه : أقول زايد
زايد التفت يناظره : سم يبه !
ابو فهد : ما كلمك أخوك وينه ما أقبل علينا ذا الاسبوع ؟
زايد : الا يبه يقول ينتظر شغله يخلص ويجي ان شاءالله
أبو فهد يحاول يقوم ويده ماسكة عصاه وترتجف : زين انا بروح للمحل وانت الحقني
زايد وقف يساعد ابوه وهو يحس ابوه مو تمام هاليومين : ابشر
دخل المطبخ عند امه وأخذ منها الصحون اللي كانت تغسلهم وهي ترتجف من برودة الموية : آخذهم عنك يمه
ام فهد وهي تبتسم لاخلاق زايد معها ومع خواته وممنونة له : ليه يحبيبي كنت انا اسويهم مب بارده
زايد جمع حواجبه بمزح : كيف مب بارده شكل يدينك نملَو من البرودة ما قمتي تحسين ! بعدين تذكر حال ابوه وأقدم يسألها : يمه ابوي ضايق من شي ؟ صاير شي ؟
ام فهد : لا بس حاله مب عاجبني ذا اليومين
زايد بضيق : خير ان شاءالله
طلع من المطبخ بيلحق ابوه للمحل مثل ما قاله وهذا حالهم كل يوم ،سمع صوت دق باب البيت بقوة : وجع انشاءالله من هاللي يدق كذا !! جيناك جيناك
سهيل وهو ياخذ انفاسه بالقوة : زايد .... عمي
زايد بصدمه : وش فيه ابوي ...انطق
سهيل: طاح بالشارع بسرعه الحق
شهق بصدمه من الخبر اخذ جواله من الحوش وطار من دون ما يقول لامه هو وين رايح وهذا اللي خلاها تتوتر ، لبست جلالها : سهيل وش صاير ؟
سهيل : بس عمي ابو فهد نادى زايد يبيه بشغله
ام فهد وهي ما تطمنت لملامح وجه زايد : زين يولدي كلم أمك تجي نقعد بالعصرية نتقهوى 
سهيل بارتباك يخاف تقفطه : ابشري
^^^
في سيارة الاسعاف رغم خوف زايد الا انه اول واحد طرا له هو تركي اخذ جواله يدق عليه إلين ما وصله الرد : زايد هلا والله
زايد : اسممع بسرعه وينك فيه ؟
تركي : بالمحكمة اخلص اوراق ليه صاير شي ؟
زايد يتكلم بسرعة : قابلني بالمستشفى أبوي طاح علينا واحنا رايحين المستشفى شوي ونوصل
تركي بصوت عالي : وشووو! كيف طا..
زايد : لا تتكلم واجد وكلم ورد تقول لامي لا تسمع من الغريب
قفل تركي من دون رد وراح لجهات الاتصال يدور رقم ورد دق عليها ....: الو ورد كيفك
ورد بمزح : بدري عليك تتذكّر اختك يالخايس
تركي بارتباك : ورد ، اسمعي كلمي أمي بس بهدوء وانتي لا تخافين مافيه شي بس نتطمن عليه
ورد بخوف : تتطمن على مين؟
تركي : أبوي طاح على زايد وهو رايح معه للمستشفى وانا بقابلهم هناك هو طيب مافيه شي
ورد: نعم!!! ك كيف طاح؟
تركي وهو يزفر بحزن وما بيده شي الا يهديها من ورا الجوال : ورد اسمعيني
ورد وهي تبكي : وش اللي ورد ابوي طايح وتقول ورد اسمعيني ! ولا واحد فيكم عندنا حريم بلحالنا في البيت حتى ما نقدر نروح له وبعدين وش دراني انك تقول الصدق وانه ما....ورجعت تبكي بشكل اقوى من قبل
تركي يحاول يهديها : هو طيب يحبيبتي بس نبغى نتطمن ولا تجي فبالك هالفكرة حتى ، خلاص أقدر  اعتمد عليك بانك تصيرين قوية وكلمي الجوهرة بعد تكون معك
ورد وصوتها يرجف من الخوف : اذا صار بابوي شي وما قلتوا لنا والله اني ما أسامحكم ي تركي
زفر تركي انفاسه وهو ما يتحمل يشوف احد يبكي وبالذات لو وحدة من خواته : ورد ، اوعدك اوعدك ابوي مافيه شي لا تخافين وانا بس بشوف زايد وبجي آخذكم
في طرف ثاني من بيت ابو فهد
الجوهرة نايمة بالغرفة قبل يجي أبوها ويلعن خيرها دخلت ورد تصحيها وهي عيونها حمممرا من البكي : الجوهرة ....الجوهرة
الجوهرة بصوت نااايم: ها
ورد تهزها بقوة : الجوهرة... اكلم مين انا ؟
الجوهرة بعصبية تشيل الباطنية من وجهها : وجع ان شاءالله وش فييـ... ورد ليه عيونك كذا ؟
ورد وهي ما قدرت تمسك نفسها ورجعت تصيح : الجوهرة والله اني خايفة وابغاك تعاونيني
الجوهرة ترفع وجه ورد والخوف بعيونها : من وش ؟ أحد صاير له شي
~البارت الرابع~
ورد : أبوي طاح على زايد ، وهم الحين بالمستشفى مع تركي وقالي قولي لأمي
الجوهرة حطت يدها على راسها بصدمة بس صحت بسرعة تستجمع قوتها : خلاص بسرعة غسلي وجهك نروح نقول لأمي تسمع مني ومنك ولا من الغريب
بالحوش عند أم فهد اللي كانت تلم الأغراض بعد ابو فهد وزايد توديها للمطبخ وطلعوا قدامها الجوهرة و ورد ، شهقت : بسم الله الرحمن الرحيم ما تكلمون ولا تقولون حنا بالمطبخ ولا تلحلحون فجعتوني الله يصلحكم
الجوهرة تتقدم تاخذ الصينية من أمها توديها للمطبخ وتاخذ امها للصالة تقعدها بهدوووء : فيه شي ! ليه وجيهكم كذا صفرا
الجوهرة ماسكة يد امها تمسح عليها : يمه بقولك شي بس لا تخافين أوعديني
ام فهد وعيونها تتنقل بين يد الجوهرة وعيون ورد المغورقة دموع : هذا انا خفت انطقي بسرعة أحد صاير له شي ؟
الجوهرة بتردد: بس أأبوي
أم فهد بصوت حاد : أبوووك....كملي بسرعة طيحتي قلبي
الجوهرة تتكلم بسرعة بنفس واحد : يمه أبوي طاح و زايد اخذه للمستشفى مع تركي ويقول انه طيب
ام فهد بصدمة : وشهووو! ، قامت بسرعة تدور عباتها : جيبوا لي عباتي بروح لابو عيالي بسرعة
ورد وهي تبكي : يا يمه ما يصير تركي يقول نقعد ننتظره هو بيجي ياخذنا ... وانتي قومي عاونيني بأمي
الجوهرة و وجهها جامد : وش اقولها ، مافيه قوة بتمنع امي تروح لابوي
ورد تمسح دموعها : انا اعرف من اللي بيمنعها
اخذت جوالها تدق على زايد اللي دخّلوا ابوه للطوارئ وهو مرتبك وخمسين فكره وفكره تحوم براسه حس بجواله يهز بجيبه طلعه لقاها ورد: ورد لا تخافون ابوي مافيه ..
ورد بصوت عالي تبي امها تسمع : وش قلت يزايد ؟
جت ام فهد وهي لابسه عبايتها وطرحتها : زايد أمي تكفى لا تكذب علي أبوك طيب ؟
زايد : طيب طيب
ورد : زايد امي لابسه عبايتها تبي تجيكم مب راضيه تسمعني
زايد : يمه أبوي طيب وانا بس يطلعونه لغرفته بخلي تركي يجي ياخذكم ...شوي واكلمكم
طلع الدكتور يدور بعيونه تقدم له زايد : دكتور ابوي اللي قبل شوي جبته بشرني ؟
الدكتور بابتسامة: لا الحمدلله طيب بس الوالد معرض للجلطات اكثر الحين بحكم عمره فلازم تنتبهوا عليه
زايد وهو يمسح على وجهه برضا: الحمدلله الحمدلله ، ابشر ابشر
في هذه اللحظات دخل تركي وهو يركض : زااااايد ي زاااايد
زايد التفت عليه وهو يبتسم وهذا اللي طمن تركي : بشر
زايد : جت سليمه وانا اخوك ، حضن تركي زايد بقوة وهو يضرب على ظهره : الحمدلله الحمدلله
وتذكر ورد وكلمتها ( لو يصير شي لابوي والله ما اسامحكم ) واخذ جواله يتصل فيها الين ما وصله صوتها المبحوح : تـ ت تركي
~البارت الخامس~
تركي وهو يضحك : وش فيك يبنت اقولك طيب طيب مافيه الا العافيه توه الدكتور مبشرنا
ورد وهي تضحك وتبكي : الحمدلله .... أكييييد تقول الصدق !
تركي وهو يضحك : وش فيك يبنت اقولك طيب طيب مافيه الا العافيه توه الدكتور مبشرنا
ورد وهي تضحك وتبكي : الحمدلله .... أكييييد تقول الصدق !
تركي بمزح : أقوووووول
ورد : خلاص طيب متى تجون تاخذونا لابوي
تركي بتردد وزايد يأشر له : قولها بنجيكم بعد شوي
تركي : ااا بنجي ببعد شوي
^^
عند العنود اللي تتمشى بالحوش وهي ماسكة كوب قهوتها وتتمشى بالحوش وهي تسمع :
"قل للذي باع المشاعر والاحساس
إني على جروحي مشيت و...تبسمت
رجعت انا لنفسي وتلفظت الأنفاس
وأقوى من أول من بعد طيحتي قمت
وخير يعني شصار حبيتهم باعوك ؟
ترا الحياة حلوة ...يقلبي لا تزعل
راح وعـ.....           "
قطع اندماجها أحمد اللي طلع وهو يتمايل بمزح : ترا الحياة حلوه يقلبي لا تزعل ، وش هالكآاااااابه
شغلي شي فرايحي شي يرقوصنا ( يخلينا نرقص )
العنود تطفي الأغنية بعصبية : لا صدق وع قاعده بالحوش مروقة منطربة يجي هالاغبر يخرب علي ويييييع اسمع عبدالمجيد يطلع بوجهي هذا
أحمد بمزح : يحصل لك تقابلين وجهي أصلا احمدي ربك كل اللي يشوفون وجهي يغنون :
قمرين قمرين دول ولا عينيك
قلبي بيسألني عليك
أتاريني بفكر فييييك"
العنود وهي تضحك بصوت عاااالي : وش وش وش يغنون ؟
أحمد وهو يقرب منها يغني : قمرين قمرين دول ولا عينيك
العنود وهي يتغير مودها على طول صحيح ان احمد سامج بس يضحكها : زين زين انا بدخل اشوف امي وش تبغى مني يا ابو " قمرين"
^^^
ورد قاعده بالحوش حاضنة فروة ابوها وهي تشم فيها ريحة العود اللي تفوح منها وجنبها امها والجوهرة ينتظرون واحد من العيال يجي ياخذهم يشوفونه ، سمعوا دق بوري قوووي وقريب بيتهم فزت ورد : ليه يدقون كذا شكل فيه شي
الجوهرة وهي تبتسم : لا يغبية هذا حق سيارة زايد اسمعي ...... هو والله هو ، قامت بسرعة تفتح الباب وابتسامتها قلبت لضحك يوم شافت تركي يسوق وجنبه ابوه وزايد ورا : تركي بعد جا معهم
أم فهد وهي رجلها ما تشيلها من الفرحة : وينه وينه ؟
دخل تركي وهو ماسك ذراه ابوه يسنده ومن الجهة الثانية زايد : انا ولا ابو فهد ؟؟
أبو فهد يناظره بحدة: ولللد كانه لسانك طال
تركي باحراج : آسف يبه
, ضحكت ام فهد وهي تاخذ كيس الأدوية من زايد وعصا ابو فهد توديها للغرفة مسرعة قبلهم عشان ترتب فراشه وينام ويرتاح
أبو فهد يناديها : ام فهد .. مانيب نايم
ام فهد جايه لسه بترفض بس صدمها انه قعد ب بيت الشعر والعيال قاعدين يسوون له قهوة بالمشب : وليه ؟
~البارت السادس~
ابو فهد بعصبية : ومن متى وحنا ننوم الظهر ها !
ام فهد وهي تداري الموضوع : زين مثل ما تبي
دق باب البيت وراح تركي : هلا وسهلا بسهيل أخبارك
سهيل وهو يحضن تركي : الحمدلله طيبين انتم وشلونكم كيف عمي عساه احسن
تركي يهمس لسهيل بضحك : لا لا طيب من يوم ما توسّط ذا الخيمة وقام يهاوشني عالقهوة وهو طيب
سهيل : ايييييه كذا السااااالفة اجل انا بروح قبل ما يشغّلني معكم مع السل..... استوقفه صوت ابو فهد : هذا سهيل اللي دق الباب تعال ي ولد
تركي وهو يضحك : راااااحت عليييييك
سهيل وهو يرفس تركي يمشي قدامه : امش امش قدامي
^^^
ورد بعصبية بعد ما طلت من شباك المطبخ: وجع ان شاءالله وش جابه السكني سهيلوه ؟
ام فهد بهمس : بنت عيب عليك
ورد : يمه وش اللي عيب ابوي ما قعدنا معه كله من راسه
الجوهرة وهي تحط بيالات الشاهي بالصينية وناظرت حولها تشوف امها راحت : حرام عليك والله انه حليل ويحب ابوي كانه ابوه الله يرحمه
ورد وهي تاخذ الصينية من الجوهره تعطيها تركي : ما قلنا شي بس كنت ابغى اقعد مع ابوي الحين بيقول لازم يتعشى عندنا ويتكي الاخو
تركي وهو يحط يده على خصره بمزح : بعض الناس ما ينادون اخوهم يسلمون عليه
ورد وهي تحضنه بقوه وهي واقفة على اطراف اصابعها لان فرق الطول بينهم كبير : تركييييي وحشتني مررررررررره
تركي يأشر للجوهره تجي عنده : تعالي وش فيك
تركي أقرب واحد لخواته بالسوالف والتفكير عكس زايد صحيح يحبهم ويمزح معهم أحيانا بس يغلب عليه الجدية
ام فهد وهي جايه عندهم المطبخ بعد ما صلت المغرب : هلا أمي
تقدم يبوس راسها ويدها : هلا ي حبيبتي الأولى والأخيرة هلا بحلوة اللبن هلا قلبي هلا عيووووووني هلا يا بعد طوايفي انتي هلا
ورد تناظره بطرف عين : الأولى صدقناها الأخيره ذي مشكوك فيها
تركي : اقول اص ، يمه متى يجي فارس احلامها يعتقنا
ام فهد وهي تقبص خده بمزح : بتلهيني بكلامك الحلو تحسبني نسيييت وش خربطت بالحوش
الجوهرة : يممه حرام عليك
ورد تسكتها: وش عليك انتي خليها يستاهل
^^
سهيل هو وزايد بطرف الخيمة يسولفون بس قطع عليهم تركي اللي ارتمى قدامهم : ايييه سهيلوه كيف شغلك ؟
سهيل بابتسامة: الحمدلله كويس
زايد : طيب انا احس انه فيك شييي تعرف انك تقدر تقولنا صح
تركي باستغراب من زايد : ايه ايه اكيد وش عندك طلّع
~البارت السابع~
سهيل يتنهد بضيق : اختي
زايد : وشفيها اختك ؟
سهيل : خطبها ابو عامر لولده
تركي : طيب ؟ يعني هي مب راضية
سهيل : مب هي انا ابو عامر شريكي بواحد من محلاتنا فهو الحين يقول لو ما زوجت اختك لولدي اعتبر المحل رااااااح
زايد بغضب : وشلون يعني وش هالكلام يخسي
تركي : حلوه ذي اختك وبكيفك وهي وبكيفها غصب هو ، طيب انت عندك اوراق تثبت شراكتكم ؟
سهيل : ايه عندي اتوقع بالخزنه
تركي وهو يطبطب عليه : شوف ياخوك جيب الأوراق معك اللي تثبت ورثكم من ابوكم و اللي تثبت الشراكة واعتبرها محلوله والكلب هذا يخسي يشم شي
زايد : يحسب الدنيا على كيفه والله ان لقيته بالسوق لنسيه اسمه انا اوريك فيه انت بس..
قطع عليه أبو فهد بصوته العالي : اقول انت وياه ما كلمكم عمكم ؟
زايد : بالرياض يبه خبري اليوم يجي اكيد اول ما يوصل بيجي عندك
تركي يشوف الساعة لسه 6 ونص : اكيد انه جاي تبي ادق عليه يبه
ابو فهد : ايه شوف وينه تطمن عليه ، سهيل
سهيل التفت له : سم يبه
ابو فهد برضا: الله يرضى عليك يولدي صب لي
قهوة وتعال اقعد جنبي سولف علي وش صار بالديره اليوم
تركي بعد ما وصله الرد : هلا عمي
ابو العنود : قول السلام يولد وش اللي هلا
تركي بضحك: السلام عليكم عمي
ابو العنود يتكلم بسرعة : وعليكم السلام اخباركم اخبار ابوك واخوانك وخواتك ان شاءالله طيبين كيف شغلك
تركي : كويس كويس كله ابشرك ، وينه خالد ادق عليه ما يرد
ابو العنود التفت لخالد  : يسوق يسوق ترانا دخلنا الديرة خلاص بنمر عندكم
تركي بارتباك : زين نحتريكم
قام تركي زي المقروص ياخذ الفناجيل والدلة يغسلهم وضبّط قهوة جديدة كل هذا بمراقبة أبو فهد وزايد وسهيل حايس مع تركي : حط الزعفران
سهيل بوهقة : وينه ؟؟
تركي : قدام وجهك الحلو شوفه بالر...
زايد : خلاص انا بكمل انتم رتبوا المجلس

(  ان شاءالله استمتعتوا بالقراءة ، لا تنسون الـ⭐️⭐️⭐️ وتعليق )
لينة