-كيف أتوبك يا أجمل ذنوبي-

البارت الخامس

~البارت الخامس والعشرون~
قام أحمد ياخذ منها الصينية ويصب القهوة لابوه : سَم
ابو العنود : علميني ي ابوك وش جديدك
العنود وهي فزّت تجيب كراستها من غرفتها : هذا جديدي
ابو العنود بانبهار : ههذا انتي راسمته؟؟
العنود تهز راسها : ايه وش رايك يبه ؟
ابو العنود يلف الكراسة لخالد واحمد : بالله وش رايكم ؟
خالد بابتسامة : يجنن تسلم يمناك
أحمد بمزح : وع انا ارسم أحلى
العنود تبي تقهر أحمد : تسلم ي حبيبي انت يا خلودي ، وبعدين وريني وش ترسم عساك تكتب اسمك !
^^^
قامت ورد تغسّل الحوش وتفرّك الأرضية بالسّلك وتكب المويه والصابون على الأرضية تحت انظار العيال وابو فهد مستغربين فزتها للتنظيف على غير عادتها
أبو فهد بربكة يناظر العيال : تعالي تقهوي
رفعت راسها : تسلم يبه
كملت ترش المويا مع الصابون وفحين ماهي تفرك بالسلك زلقت رجلها وطاحت انتفضوا العيال يتطمنون عليها
تركي وهو يقوّمها : بسم الله عليك سمي بالله
ورد بألم : بسم الله
زايد وهو يطفّي المويا : يوجعك شي ، تعورتي ؟
ابو فهد ماشي عندهم بيشوف ورد بس وقفه زايد : يبه لا تجي انت بعد تطيح علينا لا سمح الله خلك خلك
ورد وهي تقوي نفسها تمشي ببطئ للبيت شافتها أم فهد وشهقت : وشذا الحال من مسوي فيك كذا
ورد : محد
أم فهد : روحي غيري ملابسك لا تبردين
أبو فهد وهو يكلّم ام فهد : شوفي هالبنت ماني مرتاح لها شوفي وش فيها انا بروح للمحل مع العيال
ام فهد بقلق: طيب درب السلامة
ابو فهد ينادي العيال : يلا للمحل
تركي بضحكة : يوووه زمان عن المحل
ابو فهد : من زمان عن المحل أكييييد وانت منقوع لي بهالمدينة
تركي : امزح يبه وش فيك علي
<<بالسوق>>
تحديداً محل فهد للأقمشة
تركي اللي حاط قدامه بيالة الشاهي قاعد قدام المحل ويسلم عاللي رايح واللي جاي وزايد جوا المحل يحسب الفلوس اللي بالدرج وأبو فهد يسيّر على جيرانه وقف تركي لما شاف ابوه جاي : بشر يبه كيف ابو عبدالله عساه طيب ؟
ابو فهد : طيب طيب ، انت روح شوفه يقول فيه شغل يبيك فيه
تركي : طيب
دخل ابو فهد للمحل وقف قدام زايد وبينه وبينه الطاولة اللي يحطون عليها القماش ويقصونه ، زايد: هلا يبه آمرني
ابو فهد : لما يجي سهيل يخطب ورد بنخطب منه اخته
زايد : لمن لا تقول تركي ؟!!!
ابو فهد : لا ...لك
جمد وجه زايد لثواني وانرسمت قدامه ذكرياته مع طليقته وبعدين صار يسمع كلام تركي "يا زايد انت شايل بقلبك حب لشخص ما درا عنك "
انتبه لنفسه على صوت ابوه : ولد وين رحت ؟
سمعت وش قلت
زايد : وش قلت
ابو فهد يقرب لزايد : عط نفسك فرصة اسمع من ابوك
زايد : طيب بس عطني فرصة اقلب الموضوع فمخي
~البارت السادس والعشرون~
عند تركي اللي كان يشيل أكياس فيها بشوت واغراض كثيرة دق جواله اخذ جواله من جيبه حط اللي بيده عالارض و رد : السلام عليكم
وسن: اهلا وعليكم السلام بمن طوّل الغيبات
تركي : وش نسوي نشوف الأهل ، انتي اخبارك كيف الشغل ؟
وسن بزهق تقفّل اللابتوب قبالها : بخير ، على خبرك قاعدة أحاول أجمّع أدلة تثبت براءته بس لازم تساعدني
تركي يأشر على خشمه بمزح : على خشمي
وسن : عليه الش..عليه الشحم صح
ضحك بعلو صوته : صح عليك
وسن : تمام باذن الله فانتظارك سلّم عالأهل
تركي : يوصل
،
ورد قاعده بالصالة تهوجس بسهيل محتارة كيف سارة ما بيّنت لها على نيتهم من أول ومعقولة العنود وسارة يعرفون وماقالوا لها حز بخاطرها شوي ، دخلت ام فهد : وش تهوجسين فيه علميني ؟
ورد بابتسامة تشتت افكارها : ولا شي يمه بس احس غريب على كثر ما كنت اتحلطم من الشغل والكرف على كثر ماني رافضة الموضوع وخايفه منه ، سهيل ما قد شفته اكثر من اخو ودايم يقهرني لما يقعد مع اخواني وابوي ويطوّل وانا اقعد لحالي وانا كنت ابي اتزوج واحد مب من الديرة ابي اسكن بالرياض واطلع واتمشى واسافر مب سهيل راعي البرّان
ام فهد تنهدت :الخيرة فيما اختاره الله يبنتي ما تدرين يمكن هاللي ساكن بالرياض وتسافرون وتروحون وتجون ما يسعدك ويكون وجه ضيق وكرب عليك و ولد جيراننا اللي اعده ولدي سهيل ولد سلوى صديقة عمري الخلوق اللي يوقف باول الصف بالمسجد اللي الكل يشهد على اخلاقه اللي ساكن بالديرة وعايش مع امه واخته يسعدك ويصير وجه خير وسعاده عليك ، لا تتسرعين يا أمي استخيري البسي جلالك وافرشي سجادتك واستخيري مب ضارك شي وادعي من كل قلبك ان الله يرشدك للطريق الصح ويفتح لك أبواب السعاده والرزق وانا بوقف معاك سواءً قلتي أي ولا لأ
لمعت عيون ورد وقربت تحضن امها بعزم ما فيها : الله يخليك لي ولا يحرمني منك يمه مدري وش بسوي من دونك
أم فهد وهي تطبطب عليها بضحك : آمين آمين ي حبيبتي ويحفظك انتي واخوانك لي يا نور عيوني انتم
،
"بعد الغدا"
تركي وهو شايل شنطته الصغيره بيده : انا أستأذنكم
ابو فهد يأشر له : تعال سلّم يا ولد
تقدم له تركي يبوس راسه ويده ونفس الشي لام فهد وقرّب يحضن ورد وهمس باذنها : لا تشلين هم وانتي اخت تركي
ابتسمت ورد وردت عليه : أدري
راح تركي وقلبه ممصوع على أهله في كل أسبوع يرجع فيه للرياض