-كيف أتوبك يا أجمل ذنوبي-

البارت الرابع

~البارت الثاني والعشرون~
الخشم الواقف الرموش الكثيفة الشعر الأسود وفي عز تأملها لثمرة حبها هي وفهد حست بذراعه تحاوط خصرها ويحط راسه على كتفها : وش تناظرين ؟ سرحانه
لطيفة بصوت هااادي: اشوف شبيهك
فهد بضحك : شبيهي انا ! سلطان يشبهني
لطيفة تلف عليه : ايه يشبهك ليه استغربت مب كنت تقول بيطلع حليو زي ابوه بيطلع حليو زي ابوه
فهد : من ناحية حليو فهو حليو بس زي مين هنا اعجز اتكلم
كانت حياة فهد ولطيفة مثال للحب والاحترام كل واحد ربي عطاه على قد نيته لطيفة الرجال الحنون المتفهم اللي كانت تحلم فيه وفهد اللي بالنسبة له لطيفة دعوة امه له بالزوجة الصالحة اللي تحبه وتعزه
^^^
عند العنود اللي انسدحت على سريرها ومعاها كوب الشاهي بعد ما مسّحت الميكب واخذت جوالها تشوف الصور اللي ورد ارسلتها بقروبهم
" حفيدات فهد  "
^^^
أذن الفجر ومن هنا ابتدا اليوم بالديرة على صوت أبو فهد يضرب بعصاه الباب يقومهم : ولد قم انت وياه الصلاة الصلاة
فز زايد اللي كان نومه خفيف والتفت لتركي اللي فسابع نومة : تركي قم يلا اذن الفجر
قام تركي وشاف ابوه قدامه وزايد جنبه والنور اللي متوسط سقف الخيمة مشغل قفّل عيونه بانزعاج من النور: طيب هذاني صحيت
ابو فهد : ابي القاكم مصفوفين قدامي بالمسجد
زايد وهو يلبس ثوبه : ابشر ، تركي اخلص يلا
راح تركي للمغاسل وقابل امه وراح باس راسها يصبّح عليها : صبحهم بالخير
ام فهد: صبحهم بالنور والرضا يا امي
تركي وهو يحك كفوفه ببعض من البرد : طيب يلا انا بتوضا ابوي بنتظرنا
توضا واخذ شماغه وراح هو وزايد يمشون للمسجد وبطريقهم قابلوا سهيل : السلام عليكم
زايد وتركي بصوت واحد : وعليكم السلام
سهيل وهو يضحك : عساكم نمتوا زين بعد امس ؟
تركي وهو يحرك يده يمين وي يسار : اي نوم ي ابن الحلال
وصلوا للمسجد وكان ابو العنود وابو فهد وخالد وأحمد جنب بعض بالصف الأول راح سهيل يبوس راس ابو فهد : السلام عليكم عمي
ابو فهد : وعليكم السلام وراك تأخرت ؟
سهيل وهو يحك راسه باحراج : والله بغت تروح علي نومة
ابو فهد : قايل لكم السهر مب زين بس ما تنتصحون !
لف سهيل لابو العنود يبوس راسه ويسلم عليه
وعلى خالد وأحمد
.
قامت ورد تصلي وتساعد أمها بالفطور وحطت الدلة والفناجيل بالحوش وراحت تدق عالعنود تشوف اذا يفطرون سوا
العنود : هلا صباح الخير
ورد : صباح النور نمتي ؟
العنود : نمت ساعة ولا ساعتين بس وانتي
ورد بضحك : والله شفتي سرير الجوهرة لزقته بسريري وصار سرير كبيييير ونمت نومة تطيير العقل
العنود وهي تضحك على حركات ورد : منتي طبيعية لهالدرجة حاطة عينك على سرير البنت
~البارت الثالث والعشرون~
ورد : ما علينا بتجين تفطرين معنا ؟ سويت شكشوكة بتاكلين اصابعتس وراها
العنود : صحة وعافية بس ابوي والعيال بيفطرون بالبيت اليوم فبقعد مع امي اعاونها نجيكم بعد الغدا ان شاءالله
ورد : منجد ؟ على كذا شكل حتى العيال بيكونون بلحالهم ، طيب نحتريكم بعد العدا لا تأخرون
العنود بمزح : ان شاءالله عمتي اي اوامر ثانية؟
ورد بضحك : يشينك بسسس اقلبي وجهك يلا
دخل تركي المطبخ عند ورد : ها وش الفطور اليوم ؟
ورد : سلم سلم أول
تركي : ما اشوف شي من الجووووع جوعان
ورد وهي تعطيه الصينية حقت الشاهي : ها خذ نجي انا وامي مافيه احد ؟
تركي : لا مافيه احد
ورد تنادي امها : يمه تعالي يلا فطور
ام فهد : طيب ثواني
راحت ورد وباست راس ابوها ورتبت السفرة هي وتركي بمساعدة زايد
زايد وهو يعدل جلسته : وين امي؟
ورد بصوت عالي: يممممه يلاا فطور
ابو فهد وهو يضرب بالسبحة على رجلها : اقصري صوتك بالحوش حنا
ورد بخوف : آسفة يبه
ام فهد وهي تلف طرحتها على راسها : هذاني جيت وش فيك؟
تركي بضحك : متنا جوع يالغالية
ابو فهد : سموا بالله سموا بالله
ورد وهي تشرب الشاهي : تركي عطني المربى
ناولها المربى والتفت لامه بخباثة : الا اقول يمه
ام فهد وهي متكية على المسند اللي بينها وبين ابو فهد : هلا يمه
تركي وهو يناظر ورد : امس وش صار ؟
ام فهد : بوش ؟؟
تركي : وحدة من حريم الديرة تكلمت ، قالت شيي؟
ورد : ليه تكلّم بالالغاز عن وش يتكلمون ؟
تركي : اصبري انتي ، اقصد محد خطب وريدوه شيي
زايد بضحك : وانت وش دخلك ؟
تركي : اختي ، اسأل عادي
ورد وهي تناظر تركي بقهر : تدري وش ان عاد فتحت فمك دخلت هالشوكة بعينك
ام فهد بضحك : وش فيك ي حبيبتي ترا صدق امس فيه وحدة تكلّمت عليك
تركي بضحك : ترا امزح يمه مب من جدي ؟!
ورد : يمه حتى انتي علي مع ولدك
ام فهد وهي تناظر ابو فهد : وانا صادزه ام سهيل كلمتني امس
زايد : وشووو خالتي ام سهيل !!
ورد شرقت باللقمة تكح بقووة ، تركي يضرب ظهرها بكفه بقوة : لمين تكلمت عنها ؟ 
ام فهد : لمين يعني لسهيل ، وش رايك ي ابو فهد ؟ هي كلمتني قبل وبعدين بيجون خوال سهيل يخطبون رسمي
ابو فهد : والله والنعم بسهيل وام سهيل بس خل نشوف هاللي شرقانه وش تقول ؟
ورد وعيونها تدمع من الشرقة : ي يعني الحين صدق خالتي سلوى كلمتك ؟؟؟
.
.
عند ام سهيل : سهيل ي امي
سهيل وهو يصب لها الشاهي هي وسارة : سمي يمه ؟
سارة تناظر امها باستغراب تعرف امها لما يكون عندها سالفة ، : انا كلمت امس خالتك ان فهد
سهيل : ايه كيفها وش اخبارها
ام سهيل : طيبة الحمدلله دايم تسأل عنك وتسلم عليك
~البارت الرابع والعشرون~
سهيل بابتسامة : الله يحفظها ويسلمها
سارة : يمه قولي اللي عندك واضح فيه ساااالفه
ام سهيل : لا لا خير ان شاءالله بس انا اقول يسهيل ي حبيبي انت وحيدي وقرة عيني وابي اشوف عيالك قبل أموت ابي افرح فيك
سهيل : بسم الله عليك يمه لا تقولين كذا الله يحفظك لنا
ام سهيل : أنا شفت لك أمس بنت يربي ي سهييل تقول للقمر قوم وانا اقعد مكانك تااااخذ العقل وأنا اقول اخطبها لك
سهيل باستغراب يناظر سارة : مين هي بنت من ؟؟
سارة ترفع كتوفها : مدري ترا ما قالت لي شي
ام سهيل بابتسامة : ورد بنت عمك ابو فهد
سهيل وهو انحرق لسانه بالشاهي : مين مين !!
شهقت سارة : وريدوه ما غيرها من جدك يمه؟!
سهيل : لا لا يمه ورد ما أبيها
ام سهيل بغضب تخوّف سهيل به : وش اللي ما أبيها على كيفك هو عمرك قرب يصير ٣٠ وانت لهالحين ما أعرست وانا أمك ادرى بمصلحتك ، وكلمت ام فهد خلاص
سهيل يقوم بغضب : وش اللي كلمتيها يمه كيف تكلمينها بدون علمي يرضيك ي سارة تشوفين ؟!
سارة : يمه ليتك كلمتي سهيل قبل حطيتيه بالأمر الواقع
ام سهيل : اسمعني انت ان كان تبيني راضية عليك فبتزوّج ورد ، اما لا كان رضاي مب مهم فروووح وتزوج اللي تبي بس اعرف قلبي غضبان عليك
سارة وهي تدمع : يمه لا تقولين كذا تكفين اكيد سهيل ما يقصد
سهيل وهو يشوف امه زعلانة عليه: طيب يمه ليه تسوين كذا فيني يا اتزوج ورد ولا تغضبين علي ليه ؟ خلصوا كل بنات الديرة ما لقيتي الا ورد اللي اشوفها زي اختي واخوانها اخواني وابوها ابوي !
ام سهيل : كل بنات الديرة يدورون الفلوس وطمعانين اما ورد ولا في بالها وبنت حسب ونسب وتربية ام فهد ماشاءالله ماشاءالله الكل يدري فيها وش فيها لو صارت زوجتك !!
سهيل : ومتى كلمتي خالتي ام فهد ؟
ام سهيل : أمس قالت بتشوف ابو فهد وتكلمني وبنروح بعدين مع خوالك نخطب رسمي
سهيل : وش اللي خوالي يمه لا لا لا خوالي مستحيل انا بروح اخطب لحاااااالي
ام سهيل : وليه خوالك وش في... لحظة لحظة يعني انت موافق ؟
سهيل بطرف ابتسامة : ولي حل ثاني
ساره راحت تحضن سهيل بقوووه مبسوطة فيه هو و ورد كانت معارضة موقف امها مع سهيل بس للفكرة أبدددا بالعكس ،باس راس امه يطلب رضاها وابتسمت له برضا وهي تدعيله : الله يرضى عليك ويسعدك ويفتح لك أبواب الرزق ويتمم لك على خير يا ربي يا كريم
سهيل وهو يطبطب على راس سارة اللي على كتفه : آمين آمين
^^
عند العنود وهي فطورهم كان اعتيادي تلم الصحون من بعد اخوانها وتنظّف وراحت للمطبخ تحط القهوة عالنار واخذت كرسي قعدت عليه تنتظر القهوة تخلص وتقلّب بجوالها وطاحت عينها على فيديو تركي وهو يلبّس الحوهرة هديتها فتحت الفيديو تكبر فيه على وجه تركي تتمعّن فيه ( بينها وبين نفسها ) : وشذا الملح يربي الدقن والعيون طيب الشعر بسس
صحصحت على صوت ابوها : يالعنود وين القهوة ؟
قالت بهمس : وشفيك انتي انهبلتي تسرحين بالصور
اخذت صينية القهوة وراحت لأبوها بالصالة
أبو العنود : هلا هلا ب بنيتي هلا ، قم خذها من اختك
( ان شاءالله استمتعتوا بالقراءة ، لا تنسوا الـ⭐️⭐️⭐️)
لينة