මිඳුණු ඇසිඩ් 𝙁𝙍𝙊𝙕𝙀𝙉 𝘼𝘾𝙄𝘿 (BL)

2 වෙනි කොටස - කෝපි කෝප්පය

වීදුරු දොරටුව මහ හඩක් නගමින් දෙපසට විසිවී ගිය අතර ශාලාව තුල වූ සැමදෙනාගෙම හිස් හැරුනේ වීදුරු දොරටුව දෙසටයි.

"ඔය දොරත් වැඩි කාලයක් තියෙන එකක් නෑ!"

සෙමින් මුමුණමින් ඩේමියන් පුටුවක වාඩිවිය.

දොරටුව තුලින් ඇතුලට ආ උස තරුණයා දෙස කීත් දෑස් යොමු කලේය. ඔහු ඉතාමත් උසය. මුහුණ දිගුය; උසැති ඍජු නාසයක් සහ දිගු උල් වූ නිකටක් හිමිය. කොණ්ඩය ගෙල තෙක් වවා තිබූ අතර එය අපිලිවෙල ලෙස කපා ඇත්තේ එයින් භාගයක් පෝනිටේල් ආකාරයට පිටුපසට කර බැද දමාය. FBI සහ K12 ඒකකය තුල නිලධාරින් හට තම පෙනුම, හිසකේ සැකසීම සහ ඇදුම් පැලදුමෙන් සැරෙසෙන්නට නිසි ක්‍රමවේදයක් ඇත. නමුත් මෙම තරුණයා ඊට හාත්පසින් වෙනස්ම ආකාරයට තම පෙනුම සකසාගෙන ඇත. පෙනෙනාකාරයට ඔහුට K12 ඒකකයෙ හි ක්‍රමවේදයන් අදාල නැත.!

ඔහුට පිටුපසින් ආ මදක් මිටි තරුණයා අලංකාර රත්තරන් පැහැති කොන්ඩයක් විය; එය නිසි ආකාරයට කපා සකස් කර ඇත. මුහුණ ගැටවරයෙක් මෙන් වූවද මේ අවස්ථාවේ නම් එම මුහුණ කේන්තියට පත් වී ඇත. ඔහු තම ඉදිරියේ ඇවිදන් යන උස තරුණයාට කුමක් හෝ හේතුවකට බැන වදිමින් සිටීයි.

උසැති තරුණයා නැවතත් තම ගමන නවත්වා තම පිටුපසින් බැණ වදිමින් පැමිනෙන තරුණයා දෙසට හැරුනේය.

"ඇයි උඹ එකපාරක්වත් හිතන්නේ නැත්තේ ගස් ගෝනෝ..!! මේ ඔක්කොම උනාට පස්සෙ කෝල්මන්ට උත්තර හදන්න වෙන්නේ අපියි අනිල්ටයි..! තොට නම් කිසිම ගානක් නෑ!!"

බැණ වදිමින් පැමිණි තරුණයා කේන්තියෙන් පැවසීය.

පොදු කාමරයේ සිටි සියලු දෙනා වැඩි අවදානයක් ඒ දෙසට යොමු නොකර තම තමන්ගේ වැඩකටයුතුවල නියැලෙන අයුරු කීත්ට දැකගත හැකි විය.

"ඉතින් උත්තර හදන්න එපා!" 

උසැති තරුණයා සැහැල්ලුවෙන් එහෙත් දැඩිව පැවසීය. ඔහුගේ කටහඩ ගැබුරුය.

දෙදෙනාගේ ඇදුම් දෙස බැල්මක් හෙලූ කීත්ට දැක ගත හැකි වියේ කලු කලිසම, කලු බූට් සපත්තු යුවල, සුදු කමිසය සමග උරස්, බද සහ කළවා හරහා බැද ඇති FBI swat පැලදුමයි. ඒ අනුව ඔවුන් දෙදෙනා උදෑසනම යම් ආකාරයක ක්ශේත්‍ර රාජකාරියක් හෝ අපරාධ කටයුතු සම්බන්ධ වැටලීමක් වැනි දෙයක් සදහා පිටත්ව ගොස් ඇති බව කීත්ට පසක් උනි.