بلعت ريقها من سمعت اصوات البنات جايين ناحيتها فتحت الباب :يلا روح بيجون البنات
سمعت ضحكة سهام بدلع..التفت وعيونها يطلع منها الشرار..طلع والتفت لها:بعدين حسابك معاي
عبدالعزيز:الله يصبّر قلبي بين يجي هالبعدين واضيع فيّك
تبدلت تكشيرتها لابتسامه من غزله:الا وتحّور الحكي على كيفك
تنهد بسعاده:لعيُونك بس..يلا انتبهي لنفسك يامُهجتي
عقدت حواجبها:مُهجتي ؟
عبدالعزيز:دوري لمعناها وتعرفين وش كثّر إنه يلوق لك
نجد:تمام بشوف..يلا روح
ابتسم وعطاها ظهره ولاكنه استوقفها كلمته:انتبه لنفسك ياوطن نجد
قفلت الباب من خلصت كلمتها ..ابتسم من سمع صوت الباب وعّرف إنها انحرجت..تنهد والتفت للباب"أنا لو كانت تنتهي الدنيا ابيها تنتهي معك"يقُولها بنفسه وكأنها تسمعه..
..
نادت البنات اللي كانو فالطرف الثاني من المكان ..:قال ندخلها برا
ضحكت الجوهره:للحين ماطلعتي من تأثيره
عقدت حواجبها:ايش
هناي تغمز:اجل ندخلها برا
ضحكت بحرج:ما انتبهت
سهام باستغراب:الحين هذا زوجك؟
رفعت حواجبها باستنكار من اسلوبها:ايه
هدى باستفزاز:ماتناسبون بعض الصراحه
التفت هناي وبحدة:انتبهي لكلامك لا اخليك انا تنتبهين
نجد بضحكه واستفزاز:هناي حبيبتي معليك خليها تهذر مع نفسها
شمقت لهم بكبّر ودخلت..هناي بعصبيه:اتركوني عليها ادفنها هنا
الجوهره:خلاص هناي مالنا خلق مشاكل
جو بقية البنات وانتبهو لتوتر الوضع هيفاء:وش فيكم
هناي:ذيك المعصقله ودي انتفها
ورد:مين تقصدين
هناي تقلدها:المكان مرا سغير وش هذا ليه التراب فكل مكان
ضحكت بصوت عالي :هدددى؟
هناي:اجل من غيرها يمه رفعت ضعطي
اميره:ماعليك منها ..بعدين ذا كبير كيف بنشيله
نجد:والله صادقه ..بس نحاول كلنا
وبدأو يشيلون القدر بصعوبة لين دخلوه المطبخ عند الخدم ..
دخلت نجد الصاله وكانو يسولفون عن عبدالعزيز جلست بجنب جدتها..
ام زيد:يابخّته ولدكم ببنتنا
ام عبدالعزيز:اي والله يابختّه بنجد
زوجة علي(عم نجد) بحقد:ايه ماشاءلله
زوجة زيد:الله يحفظهم يارب ويبعد عنهم كل سوء
زوجة بندر(عم نجد):شقصدتس يا حصه؟احنا وش مسوين لها
زوجة زيد:ابد ماحد جاب طاريكم
ام زيد:بسكن مداحر انتو ماتتوبون عن هالحتسي اللي ماله لزوم
زوجة بندر:والله ياخالتي مدري وش علامها حصه شايله علينا من وفاة ام نجد وكاننا احنا اللي ذبحناها
رفعت راسها بصدمه من كلمتها وحسّت النار تحرق قلبها دخلو البنات على كلام زوجة عمهم ..التفتو لنجد اللي بان عليّها الغضب عضت شفايفها بغضب :وش قصدك وش اللي تقوليه
ام زيد:يمه نجد ماعليتس منها لسانها متبري منها
وقفت ورفعت اصبعها وبصراخ :احترمي الميت على اقلها احترمي اني موجوده لاتحسبين اني ما اتذكر حركاتكم مع امي للحين مانسيت عداوتكم لها وبكل لحظه تحاولون تكيدوها بس انا مو امي اللي تسكت عن حقها انا اسمع الكل وش بتسوون ووش ناوين عليه لاتدوسون لي على طرف لا احرقكم باللي فيه
زوجة علي ..وقفت:انتي بتحترمين نفسك وتحترمين الكبير ولا اجي اربيك
ام زيد بصراخ:بسكم خلاص فضحتونا الله لايفضح مسلم
التفت لجدتها :راح توقفينهم عند حدهم وتعلميهم يحترمون امي وهي ميته ..ولا انا بعلمهم كيف يحترموها
ام زيد بعصبيه:نجد اطلعي لا اكسر هالعصا براستس
وقفت ام عبدالعزيز ومسكت يد نجد وطلعتها من عندهم تحت صدمة نجد من كلام جدتها..نزلت دموعها بصدمه:خالتي سمعتيهم ولا انا اتوهم اللي سمعته خالتي طردتني وهي عارفه انهم غلطانين
ام عبدالعزيز:خلاص حبيبتي اهدي ماعليك منهم
ارتمت بحضنها وبكت بحرقه ..تذكرت التجريح اللي عاشته امها والاذى اللي شافته منهم ..
...
عمّ الصمت على المكان من بعد طلوع نجد ..
وقفت هناي وطلعت اتصلت على عبدالعزيز..
الجوهره :وش تسوين انتي؟
هناي بعصبيه:ادق على عزيز اعلمه
الجوهره بحده:انتي انهبلتي بتكبرين المشكله
هناي:ماشفتي شلون يسوون فيها
طلعت وجد:الله ياخذهم يقهررروون بنات تخيلو طلعت وهم يضحكون لبعض بخبث ولعانه
صفقت بيدها:هاه شفتي وتقولين اسكت
رد عبدالعزيز بعد دقايق:هلااا
هناي:فاضي بكلمك
كان يشب النار:لا والله مشغول
هناي بعصبيه:اترك اللي بيدك واسمعني هالشي عشان نجد
عقد حواجبه وترك الحطب من يده وبانت ملامح الغضب على وجهه :تمام انا بتصرف
هناي:يلا
وجد:وش قالك
هناي:قال بيتصرف
الجوهره:الله يستر الله يستر
هناي:انا بطلع اشوف نجد
طلعو معاها البنات وكان حالها يرثى اليه من البكا..
بعد نص ساعه دق جوالها وكان عبدالعزيز..لاكنه تجاهلته ماتبيه يسمع صوتها ويعرف انها بكت ..رجع اتصل على هناي..
هناي:هلا عزوز
عبدالعزيز:عطيني نجد
رفعت نظرها لها:تمام ..عزيز يبيك
تنهدت بضيق وحاولت تعدل صوتها:هلا عزيز
عبدالعزيز بحده:امسحي دموعك لأن ماعاش اللي يبكيك ..وابيك تنزلين لي وكان ماصار فيك شي فاهمه؟
نجد:بس عزيز
عبدالعزيز بحدة:نجد انتي زوجة عبدالعزيز وماعاش اللي يهين زوجتي وسط عزيمتها ..سواءً كانو كبار او صغار لك احترامك وينفرض عليهم من كبيرهم لصغيرهم انتي طلعتي من امانة ابوك لامانتي ومستحيل افرط فيِك ولا بدمعه من عيونك والحين اسمعي الكلام عشر دقايق واحنا تحت ..
نجد:انتو؟
عبدالعزيز:ايوه والبسي ساتر ..يلا فمان الله
ابتسمت هناي وهي تبتعد عن نجد :كفو عليه والله
مسحت دموعها:وش بيسوي
ابتسمت ام عبدالعزيز:ولا يهمّك مارح تصير مشكله
دخلت وغسلت وجهها وعدلت مكياجها لاجل مايبان بكاها ..تنهدت بضيق:قال البس ساتر اكيد اعمامي بيجون
مدت لها وجد بالطو طويل:خذي هذا يسترك وبنفس الوقت حلو
لبسته سمعت دق الباب..:مين
هيفاء:نجد اعمامي تحت ينتظروك
شهقت بخوف والتفت لفهده:ياخوفي يصير شي
ام عبدالعزيز مسكت يدها:لاتخافين يمه عزيز مستحيل انه يسبب مشكله بينكم
بلعت ريقها ..الجوهره:نجد
التفتت لها..:ارفعي راسك ماسويتي شي غلط خليك شامخه قدامهم
ابتسمت ونزلت بثقه ..مشت من قبالهم بشمُوخ وثقه طلعت ولقت اعمامها سلمت عليهم..
العم علي:شلونك يبه عساك بخير
نجد:الحمدلله طيبه
العم بندر:الله يديمها..كلمنا عبدالعزيز عن اللي حصل بينكم جوا..وصدقيني يا نجد مايصير خاطرك الا طيب -نادا بصوت عالي-هيفاء
طلعت:هلا عمي
العم بندر:نادي عماتك وخليهم يتغطون
دخلت وقالت لهم ..وطلعو متغطين وانصدمو من وجود اعمامها كلهم زيد وبندر وعلي
زيد:والحين يا نجد بيعتذرون منك قدام الكل
انصدمو من كلامهم ..
العم علي بصوت غاضب:واللي تفكر انها ماتعتذر راح تطلع من هنا على بيت اهلها
حسّو بالنار تحرق صدرهم ..زوجة بندر:اسفه يا نجد اعذرينا
زوجة علي:اسفه
كانت تسمع اسفهم ومعطيتهم ظهرها ..وهالحركه اشعلت النار بداخلهم..
كانو البنات مصدومين من المنظر ..كانت امهم واقفه على الباب تناظرهم بفخر..دخلو الحريم ومابقا الا اعمامها ..
زيد:اعذريهم يبه
ابتسمت بوجع ونزلت دمعه تعبر عن احساسها باليُتم:ان شاءلله
فهالاثناء دخل عبدالعزيز وانتبه لعيُونها الباكيه..اقترب منها وابتسم لها يحاول يلطف الجو..
زيد:يلا احنا بنطلع
علي:واعذرونا على اللي صار
عبدالعزيز:عدت على خير الحمدلله
طلعو اعمامها والتفت لها:ليه هالدموع
وكأن سواله خلاها تنفجر وتبكي بحرقه:ابي امي وابوي ابيهم عزيز
سحبها لحضنه وابتعد عنهم ..شد عليها بحضنه يخليها تبكي براحتها ..:عزيز ابيهم الله يخليك روحي توجعني
بلع غصته بصعوبه:نجد حبيبي ناظريني
رفعت عيُونها والتقت عيونها بعيُونه اللي شافت فيها اللمعه:امك الله يرحمها راحت للي ارحم مني ومنك راحت للجنه بإذن الله ..اما عمي لو تبين تكلميه الحين تبشرين
مسحت دموعها بفرحه:اقدر؟؟
ابتسم وطلع جواله :افا عليِك انتي اطلبي وانا انفذ لك
اتصل على الضابط علي:الو السلام عليكم
الضابط علي:هلا وعليكم السلام
عبدالعزيز:علي ولا عليك امر ممكن تعطيني عمي حاكم اكلمه شوي
الضابط علي:ضروري؟
عبدالعزيز:اي لاهنت
الضابط علي:يلا دقايق بس
مسح دموعها ..حط الجوال ميوت:خلاص اهدي ولاتبينين لابوك انك كنتي تبكين خليك قويه
هزت راسها بالايجاب وهي تمسح دموعها بحماس:خلاص خلاص ماببكي
ابتسم بوجع ومسك خصلات شعرها يلعب فيها :حرام عليك للحين قلبي يعورني على شعرك
ضحكت بخفه:معليك بيطول
عبدالعزيز:اي وبعدها اقص راسك لو فكرتي تقصيه
الضابط علي:عزيز تفضل
عبدالعزيز:دام فضلك..
اخذ الجوال :هلا عبدالعزيز
مد لها الجوال ونزلت دموعها غصب من سمعت صوته:يبه
غمض عيُونه بوجع:يا قلبه
مسحت دموعها تحاول تستجمع قوتها:اشتقت لك حيل الله يخليك ارجع
مسح على وجهه بقهر:ان شاءلله يا ابوي انتي ان شاءلله برجع لك بس انتي خليك قويه
نجد:ماقويت الدنيا من غيرك ومن غير امي
تنهد بضيق ونزلت دمعه قهّر :مايخالف يبه باذن الله انا راجع لك
نجد ببكا:ليه ما ودعتني قبل تسلم نفسك ليه استخسرت فيني وداعك
حاكم بوجع:ماقويت ياعيُون ابوك ماقويت اودعك بس اوعدك إني راح اجيك
مسحت دموعها:دام وعدتني واثقه انك مابتخلف فيه
حاكم:ان شاءلله ياحبيبتي انتي ..ماقلتي لي كيفك وكيف عزيز معاك
ابتسمت :الحمدلله كل شي تمام ولا يهمك
سحب منها الجوال وحطه سبيكر:بس انا ياعمي عندي شكاوي كثير
ضحك حاكم:افا وش مسويه بنيتي
عبدالعزيز بضحكه:ياعمي عذبتني تخيل قصت شعرها الطويل
ضحك حاكم:والله ياعزيز هذي غلطتك انا سنين ونا احاول امسكها لاتقصه انت المُلام يعني
ضحكت على كلامهم:لو داريه ان شعري بيزعلكم قصيته من زمان
ضحك عبدالعزيز:وضيف عليها اي شي يزعلني تدوره مدري ليه تحاربني
حاكم:ايه حلاوة الحُب بالمناقره ..اسأل مجرب
ابتسم بوجع..نجد بلعانه:بس يبه تراه مبكيني كثير
حاكم بحده:افا ونا ابوك وش مسوي لك
عبدالعزيز:والله ابد ماسويت لها شي بس بنتك شوي مدلعه
حاكم:ترا باوريك شغلك لو تبكيها واخليك تندم على كل دمعه نزلت من عيونها هذي بنتي وعيُوني وجوهرتي بهالحياه مستحيل افرط فيها
رفعت حواجبها تحارشه:يابعد قلبي يا يبه بس حبيت تسمعه شوي تهديد عشان اعانده على كيفي
ضحك عبدالعزيز:والله مغلوب على امري
حاكم:يالله ما اطول عليكم ..انتبهي على نفسك يانجدي وباذن الله بنلتقي ..وانت عزيز خل نجد بعيُونك وانتبه عليها حتى من النسمه
عبدالعزيز:ولا يهمّك نجد بعيُوني وقلبي واللي يأذيها يأذيني لاتوصي ولاتخاف
حاكم:والله واثق
نجد:يبه انتبه لنفسك ولاتنسى اني احبك حيلل
حاكم:ونا والله ياروح ابوك ..يالله فمان الله
كلهم:مع السلامه
التفت لها:ونا متى تقولين لي احبك
ضربت كتفه :قلتها لك مره بس كنت وقتها ثور
ضحك بخفه:افا ثور مره وحده
نجد:ايه لانك فرطت باعترافي
