وصل البيت واخذ اللوحه وطلع لجناحهم كانت تسولف مع وجد بحماس ..دخل والشرار يتطاير من عيونه انصدمت من منظره بحّده وبصوت اشبه بالصراخ:وجد اطلعي برا
عقدت حواجبها:عزيز وش فيك
غمض عيونه وبصراخ:لما اقولك تطلعين يعننني تطلعين فاهمه ؟
طلعت بخطوات متسارعه وقفلت الباب وراها ..
شهقت بخُوف من منظره والدم اللي بطرف كمه ..رمى اللوحه عند رجولها وانصدمت من شافتها غمضت عيُونها بخوف:سؤال واحد بتجاوبين عليه الحين
نزلت دمعه خُوف وحزن:عزيز
اقترب منها :هذي لك؟
بلعت ريقها بخوف:عزيز اسمعني
ضرب الطاوله برجله وبغضب :قولي لك ولا للاا
هزت راسها بالايجاب..سكنت ملامحه من ردها ابتسم بوجع:بينكم شي؟
رفعت نظرها له بصدمه:والله ..
اقترب منها وسكّر فمها بكفه:لاتحلفين لاتحلفين مابي اسمعك
ابعدت يده بقسوه:ماحبيت غيرك ولادخل حياتي غيرك والله
جلس على الكنبه وغطى وجهه بكفوفه يحّس بقهر وحرقه يحس بالاستغفال والغدر ..دخلت امه باستعجال من قالت لها وجد عن اللي صار ..:بسم الله عليكم وش صاير
وقفت نجد تمسح دموعها:ولا شي خالتي
مسح بكفوفه وجهه وشعره:انا طالع الحيِن رايح لمهمه مُكلف فيها انتبهو على بعضكم
اخذ الشنطه الصغيره اللي كانت مجهزتها له ..مسكت يده برجى:الله يخليك لاتروح الحين
سحب يده بقسوه..متجاهل رجاها ودمُوعها
ام عبدالعزيز:يمه عزيز اهدى انت الحين بعدين روح
اقترب منها وبَاس راسها:دعواتك يمه
طلع تاركها تندب حضها وتلملم دمُوعها وجروحها ارتمت فحضن ام عبدالعزيز من سمعت صوت الباب يتسكر بقوه..:ياربي والله ماكان بيننا شي والله
ام عبدالعزيز:بسم الله يمه وش صاير
نجد من بين دموعها:كان جار لنا ودايم يحاول انه يتقرب مني بس كنت اصد عنه كان يحاول مره ومرتين وخطبني بس كنت ارفض وبعدها تزوجت عبدالعزيز واكتشفت انه صاحبه واللي شهد على زواجنا والله ماكنت ادري والله
مسحت على راسها بحنيه:الله يهدي النفوس يمه وانا بكلم عبدالعزيز وان شاءلله بيفهمك..بس انتي ليه ماقلتي له
مسحت دموعها:خالتي كل ما اقول بتزين حياتنا يجي شي يخربها ولما قلت اخيراً زانت اروح اقوله واخربها بيديني؟
ام عبدالعزيز:بس ولو يمه دين ودين الرجُل انه يحس انه استغفل
نجد ببكى:والله ما استغفلته والله ماكنت اقصد اضحك عليك والله
..
طلع من البت وركب سيارته ..مشى فالشوارع يحّس بالضيق اللي ينهش رُوحه ..وراح للمكان اللي كان متردد انه يجيه ..وقف قبال المقبره وبداخله المشاعر تعصف يحس بشعُور الغيره اللي يحرق جّوفه ..اقترب من قبر ابوه ورفع يديه يدعي..مسح وجهه بكفوفه وجلس تنهد بضيق -الله يرحمك يا ابوي ..ليتك كنت بجنبي ووجهتني للصح ابو حاتم دايم يذكرك بالخيِر ويثني عليِك ويحكيلي عنّك ..وهو اللي طلعني ووقفني على رجُولي ووصلني للمكان اللي انا فيِه الحين صدقني يا ابوي دمك مارح يروح عبث وراح يجي اليُوم اللي اعرف فيه المتسببين بموتك واخذ حقك منهم واحد واحد ..-نزل راسه بوجع ونزلت دمعه ..مسحها بقسوه ووقف بثبات يعكس داخله المنتهي ..وطلع من المقبره ...
واقف قبال باب بيته اتصل عليِه ..
عبدالعزيز:السلام عليكم
حاتم:هلا وعليكم السلام
ضحك على صوته :نايم ؟
حاتم بنعس :ايه
عبدالعزيز:طيب تستقبلني؟
حاتم:الله يحييك اكسر الباب وادخل
عبدالعزيز:اقول افتح لي الباب
حاتم بعصبيه ونعس:يالله جايك
اخذ شنطته ووقف قبال الباب ..وثواني انفتح يشوفه يمشي معطيه ظهره ..:الله يحييني
التفت له:البيت بيتك مافيه احد غيري وغيرك خذ راحتك انا بكمل نومتي اللي عمرك ماريحتني فيها
ضحك عبدالعزيز على شكله المعصب وتنهد بضيق ورمى بنفسه على الكنبه..
