دخلت الغرفه تجلس على الكنب وطلعت جوالها بطفش تقعد تتصفح فيه؛ بحكم انه ام والو طلال مسافرين كعادتهم وجوليان نايمه وماعندها شي تسويه، رفعت نظرها لطلال الي دخل وصدت عنه بقرف لجوالها تقدم طلال يجلس قدامها بضيق من حالهم الي مو راضي يتغير من طرف روان حالهم مو حال ازواج رفعت نظرها له ترفع حاجبها من جلوسه ونطق طلال بهدوء: روان لمتى وضعنا كذا؟
تكتفت تريح ظهرها على الكنب: وش فيه وضعنا؟ تنهد طلال: حالنا مو حال ازواج صبرت عليك اسبوع واسبوعين عشان نفسيتك انا ماغلطت ولا سويت شي يضرك وماجبرتك على شي مو معاملتني كاني زوج لك وانا ساكت لمتى ياروان متى بتعقلي؟
وقفت روان بعصبيه ووقف معها طلال: انا مابيك! افهم ياخي انا تزوجتك غصب ما ابيك! انت مشكله بحياتي تفهم ياليتني بقيت عندهم ولا جيت عندك اكرهك شمتوقع اقعد اطبطب عليك واحبك مثلا؟ تخسي اكرهك بكل شعور عندي ليتني ماتزوجتك يا طلال اكبر غلطه بحياتي اني وافقت ليتني هربت وتركتكم وتركت انتقامك عشان تتزوجني
عقد حواجبه بألم من كلامها الي كسر قلبه لقطع طلال حبها بدون ما يحس ومتوقع انها مع الايام بتحبه بس؟ هذا كلامها له جمر استقر بحلقه وتجاهل كل كلامها ينطق باستغراب: انتقام؟
هزت راسها بسخريه: تزوجتني لاني ضربتك كف تظن اني ماعرف عارفه يا طلال نيتك تبي تذلني وتهيني
ذهول كبير صابه من تفكيرها الي مو منطقي! من يوم ماتزوجها ماعمره مد يده ولا قصر معها بشي مافكر تفكير حتى ودايم يوصي امه وجوليان ينتبهون لها مافكرت تلاحظ حتى؟ ناظرها لثواني يشوف عيونها الي تلمع وفيها كره وحقد وحزن وكل شعور سيّ موجود فيها لف ظهره يطلع من الغرفه ومن البيت ركب سيارته يحرك لدرب يجهله بس الي يعرفه انه يحتاج اسير الحين طلع جواله يدق عليه وثواني ورد: ارحب يبو عامر
ابتسم بعز ضيقته: اسير تعال مكاننا
استغرب من صوته الي واضح انه متضايق: تمام
سكر منه يحرك لمكانهم المعتاد الي بوسط البر وصل يجهز قعدتهم والشاهي وبعد وقت وصل اسير نزل يطلع فروته ولبسها يجلس جنب طلال الصامت صمت غريب وماهي من عادته صب له شاهي بالجمر يمد له واخذه اسير: طلال شفيك يولد؟
تنهد تنهيده تعبر عن ضيقته وضحك بسخريه على حاله: تقول اني اخذتها انتقام يا اسير تقول اني غلطة حياتها حاولت اصلح وضعنا بس كسرتنا والله يا اسير اني اخذتها وانا حبيتها بدون مادري تقول لي ابي انتقم منها!
عقد حواجبه اسير بحزن على حاله وطبطب على كتفه: هونها وتهون ياطلال هونها
ناظر النار قدامه: تتمنى انها هربت ولا تزوجتني لهلدرجه تكرهني؟ والله اني ماضريتها حتى بكلمه
ولف لاسير يبتسم بحزن داهم قلبه من بدايتهم: تدري انه كعبها للحين معي
جلس جنبه اسير واستند طلال على كتفه يكمل يفضفض ويطلع كلامه له واسير يسمعه ويواسيه
فتحت عيونها بتعب وابتسمت بخفوت من ناظرت فهد مرتز على راسها يتأملها وابتسم من فتحت عيونها وضمها بهدوء يقبل راسها: صباح الخير
ردت دانه بصوت ناعس: صباح النور
تثاوبت بنعاس وسكتت لثواني تنطق: ابي مخلل
ضحك يبعد عنها: بدينا وحام
ضحكت تهز راسها ووقف يأشر على عيونه: من عيوني
ابتسمت له وطلع فهد للمطبخ واخذ مخلل يحطه بالصحن ويرجع لها دخل يناظرها صلت وغيرت ملابسها لبجامه خفيفه وقاعده على الكنب قعد جنبها يحط الصحن على الطاوله واخذ بيده ياكلها ضحكت من حركاته تفتح فمها وفهد يأكلها خلص يحط الصحن ويلف لها: وش تحسين الحين؟
سكتت لثواني تنطق: ابي احضنك
فتح ذراعينه لها: تعالي
ابتسمت تحتضنه وحاوطها فهد ببتسامه ماتروح منه وهو معها
