حضنت عاصف تودعه وطلع بعد ماسلم عليهم يركب سيارته ويتحرك ويترك الرياض واحبابه فيها ارتجفت شفايف جُمان تنزل دموعها الي كانت تطالع من بلوكنتها مسكت قلبها بهمس: يارب رده لي بالسلامه
لفت من اختفت سيارته عن انظارها تنسدح على السرير وتحضن المخده وهي تبكي،، نزلت ريتال من غرفتها تناظر ماهر الي داخل: مهوريي
لف لها يبتسم ويفتح لها جناحه: عيونه
حضنته تبتسم ودخلت معه للصاله تجلس جنبه ونطقت: ماودك تعرس؟
رفع حاجبه: ليه في احد ببالتس؟
سكتت لثواني تبتسم باحلام: اي والله في وحده ماتناسب غيرك
ريح ظهره على الكنب: اي ومين هي؟
ريتال: ميّ
سكت شوي ماهر يشوف سعادتها وابتسامتها الي تظهر اول ماتذكرها هو يفكر بالزواج من قبل بس مالقى الي تناسبه للحين وابتسم: ان شاءلله قريب
دخلت رنا غرفتها بعد ماكلمها ابوها بخطبة سلطان لها والذهول يعتليها جلست على السرير تطلع جوالها وتتصل على مجد الي ردت عليها بعد رنتين: ارحبي ياعيوني
ابتسمت رنا بحب كبير لها: كيفك
مجد: بخير ياقلبي وانتِ؟
تنهدت تنهيده طويله تنطق: سلطان
سكتت ثواني تكمل: خطبني
توسعت عيون مجد تبتسم: العبب والله وجبتي راسه
ضحكت رنا: انا وين وانتِ وين مدري متوتره
اعتدلت بجلستها مجد: والله يارنا ماتلقين مثله ما شاءلله عليه رجال وهادي مافي احسن منه استخيري وشوفي ولا سلطان ماينرد
سكتت ثواني تهز راسها: ان شاءلله
سكرت منها مجد ترفع نظرها لمقبل الي دخل وكعادتها تتجاهله طلعت من غرفتهم تتوجه لغرفة جنى فتحت الانوار تدخل وناظرتها نايمه على سريرها جلست جنبها تبتسم بحب لفلّذة كبدها مدت يدها لوجهه وتجمدت ملامحها من شعرت بسخونتها رفعت يدها لجبهتها وتوترت تصحيها: جنىى ماما قومي يلا
تحركت جنى بانزعاج وتعب: مابي
حملتها بحضنها تدمع عيونها خوف عليها وطلعت لغرفتها مع مقبل: مقبلل جنى حرارتها مرتفعه تكفى الحقهاا
ماكان خوفها مبالغ فيه لان جنى معرضه للـ"حمى الشوكيه"لانها صابتها بعمر السنه بس الحمدلله لحقوها وقف مقبل بخوف عليها يتقدم يتحسس جبينها وغير بسرعه ثوبه ياخذ جنى لحضنه ومجد تلبس عبايتها باستعجال طلعت لسيارته تركب ورا وجنى بحضنه وحرك للمستشفى ركن سيارته ينزل وفتح الباب الخلفي يحمل جنى بحضنه ومجد تبكي وراه اخذها للطوارئ ونزلت الدانه بتشوف الحاله لانها هي دكتورة الاطفال انصدمت بوجودهم تتقدم لمجد: شفيتس؟
مسكتها مجد تبكي: تكفين شوفي جنى داخل الحقيها يادانه
دخلت دانه لجوا ووقفت مجد تبكي بخوف عليه حست بمقبل الي يحاوطها ويحضنها وبادلته لانها تحتاجه الحين ماتقدر تصده وتبعد ومقبل الي مو اقل منها بس لازم يقويها مرت نص ساعه تطلع الدانه بابتسامه توضح من عيونها وتقدمت لمجد تحضنها وتهديها: لا تخافي ياعيوني لحقناها وعطيناها مضاد مافيها شي الحين يمديتس تدخلين لها
شكرتها تدخل للغرفه وشافت جنى الي منسدحه على السرير تقدمت لها تحضنها وتبكي وتبوس وجهها: لا تخوفين ماما عليتس مره ثانيه
ابتسمت جنى ببراءه: ماما انا بخير
حضنتها تشتم رائحتها براحه ودخل مقبل ترفع نظرها له تقدم يجلس جنبهم ويحضن جنى ونطق: يمدينا الحين نطلعها
مسحت دموعها تهز راسها وضبطت نقابها يطلعون ومقبل حامل بحضنه جنى ركبو السياره يتوجهون للقصر نزلو مع بعض يدخلون لقسمهم وغطت جنى بفراشها بعد ماتطمنت عليها وطلعت لغرفتهم تفصخ عبايتها ناظرت مقبل الي وقف قدامها لحضه صمت تمر بينهم يتواصلون بعيونهم يشوف بعيونها العتب والخذلان وتشوف بعيونه الندم والشوق فتح يدينه لها: مايكفي يامجد؟
نزلت نظرها عنه ودخلت بحضنه يشد عليها مقبل بقوه ووده يدخلها باضلاعه: يشهد علي ربي اني نادم يامجد مابلقى مثلتس غلطه اعتبريها خلينا نطوي هالصفحه ونبدا صفحه جديده تعبت من صدتس
نزلت دمعه من عينها ماتنكر انها اشتاقت له بس كبريائها يمنعها اخذت نفس تنطق بصوت خافت: يكفي
ابتسم ابتسامه ما انرسمت على وجهه من مده وبعد وجهها يناظره ويقبل كل انش فيه بشوق لها غمضت عيونها تبتسم من حركاته ورجع يحتضنها تريح راسها على صدره براحه
