ကျွန်တော်က စိတ်ဖတ်နိုင်တယ် but (ဘာသာပြန်)

Chapter 6

👾Chapter 6:
အင်ပါယာကြီး တကယ်ပဲ ပျက်စီးတော့မယ်ထင်ပါတယ်

"ဘော့စ်...မဟုတ်ပါဘူး ဗိုလ်ချုပ်..."

ခုန ဖြစ်ပျက်သွားသမျှကို မြင်လိုက်ရသော လုအန်းဟယ်တစ်ယောက် မယုံနိုင်ဖြစ်ကာ ပါးစပ်အဟောင်းသားဖြစ်သွားသည်။

ဗိုလ်ချုပ်ဟယ့်ကတော့ ဂရုမစိုက်ပဲ ဤမလိုင်ပူတင်း၏ရနံ့က သူခုနက ရခဲ့သော ရနံ့နှင့် တူနေသည်ကို သေချာစေရန် ထိုမလိုင်ပူတင်းကို သေသေချာချာဝါးနေလေသည်။ ထို့နောက်တွင်မှ ဇွန်းကိုချ၍ လုအန်းဟယ်ကို သူ၏ပုံမှန်အတိုင်း မျက်နှာတည်တည်ဖြင့် လှည့်ကြည့်လိုက်သည်။

လုအန်းဟယ်ကတော့ သေတော့မလို အံ့ဩနေသည့်ပုံဖြင့် ပြန်ကြည့်နေသည်။
"မလိုင်ပူတင်းက တော်တော်ကောင်းလို့လား ဗိုလ်ချုပ်..."

သူ၏‌ဘော့စ်သည် ပူတင်းက ကောင်းလွန်း၍ သူ၏ အေးစက်စက်အပြုအမူများကို ခွာချ၍ ရာထူးကိုစွန့်ကာ သာမာန်လူအတိုင်း ပျော်ပျော်ရွှင်ရွှင်နေတော့မည်လားဟု လုအန်းဟယ် တွေးလိုက်မိသည်။

"မဆိုးပါဘူး..."
ဟယ့်ယွင်ထင်က ခုနကပင် မလိုင်ပူတင်း အပိုနှစ်ခု ထပ်‌တောင်းထားသူက သူမဟုတ်သကဲ့သို့ အေးစက်စက်ပြန်ဖြေလိုက်သည်။

ဗိုလ်ချုပ်ဟယ့်သည် နောက်တစ်ခုထပ်တောင်းထားသော မလိုင်ပူတင်းအား အပေါ်မှ အုပ်ထားသည့် ကရယ်မယ်သကြား* ကိုသာ ခွဲ၍ စားနေသည်ကို မြင်၍ လုအန်းဟယ်က ထိုသကြားအလွှာကို လက်ညှိုးထိုးကာ ထပ်မေးလိုက်သည်။
"ဒီတစ်ခုကရော ကောင်းလား ဗိုလ်ချုပ်..."

[*ကရယ်မယ်သကြား - caramel (မီးသင်းထားသော သကြား)]

"မဆိုးပါဘူး..."

ဗိုလ်ချုပ်ဟယ့်က သူ့ထုံးစံအတိုင်း အေးစက်စက်နှင့်သာ ထပ်ဖြေလိုက်သည်။ သို့သော် သူ့မျက်လုံးများက လုအန်းဟယ် လက်ညှိုးထိုးထားသည့် သကြားအလွှာကို အချိန်အနည်းငယ် စိုက်ကြည့်ကာ မေးလိုက်သည်။

"ဒါက ဘာလဲ..."

"..."

လုအန်းဟယ်သည် အချိန်တော်တော်ကြာ ဘာပြောရမည်မသိဖြစ်သွားပြီးမှ ဖြေလိုက်သည်။
"ကရယ်မယ်သကြားပါ..."