اني في هواك متملك ( قصة جريئة )

Part 04

السلام عليكم بنات نتمنى تكونو بخير 🩷

❌شرط من شروط إستمرارية القصة تفاعلكم و بالضبط تعليقاتكم و تتمة غتكون من بعد 300 تعليق على الصغيرة و لكبيرة فالجزء يالله نبداو على بركة الله ❌

فضلا و ليس أمرا Vote + commentaire 🤍
___________________________________

بعنوان " انـي فـي هـواك مـتمـلك "

بقلـم : ImaneImy_

  إني اقترفتكِ عامداً متعمداً...و إن كنتِ عاراً  يا لروعة عاري... 🖤

نزلات منى و عايدة و حادة حتى هي و يوسف دا طوموبيل لباركينك خلاهم كيتسناو تماك .. حادة لي من لي وقفات و هي طلع و تنزل فيهم و تخنزر .. كتخنزر فعايدة و كون صابت القرطاس طلقو عليها .. كارهاها واحد الكره ما بحالوش ..

عايدة و حتى منى لي حسو بشوفاتها الحاقدين و نطقات عايدة غير تحت نيفها بهمس : يحسن عوانك ابنتي مع هاد الشيبة العاصية شوفي الشوفات لي كدير فينا تقول واكلينها فرزقها ..

منى ردات عليها بنفس الهمس : ما كتهمنيش لي عليا غنحتارمها و داري غتكون بعيدة عليها ..

عايدة تنهدات بعدم راحة: اوا على الله باينا فيها عااافية ..

قاطعاتهم حادة فاش هزات حاجبها فيهم و نطقات : اش كتقولو تحت نيفكم .. كاينا شي حاجة ..

عايدة شافت فيها بهدوء و نطقات ببرود : بنتي كنتسار انا وياها .. ياك تا نتي عندك لبنات كتساري معاهم اولا عيب ..

حادة قرنان فيها حجبانها حيت عطاتها جواب بكل جرئة يالله جات تنطق و هي تسمع صوت يوسف الرجولي وراها فاش وصل لعندهم : يالله مشينا ..

حادة فكات تخنزيرتها فلمح البصر و نطقات  : اهاه نمشيو اولدي ..

يوسف تبسم كيشوف فمنى و اشار ليها براسو يزيدو يدخلو .. تا نطقات حادة : و عمك اولدي فينو ..

يوسف : غيلحق علينا عند الحاج حسان مول الذهب

حادة: صافي اولدي ..

و زادو دخلو .. حادة غير زادو جوج خطوات و هي تشد فدراع يوسف و نطقات : انشد فيك اوليدي هاد الهبطة كتعذيني ..

يوسف تبسم و طبطب على يدها باش قابطا دراعو :  شدي الوليدة..

و كملو طريقهم ، تلات منى بحكم كانت لابسا الطالون هي و عايدة بداو كيتمشاو غير بالشويا لا يزلقو و يوسف كل مرة يدور يتفقدهم و عينو على الرجال لي دايرين بيهم لا تكون عينهم على حاجتو "منى " ، تا دخلو للقسارية  ديال الذهب و وقف عند محال الحاج حسان ..