Boy Friendzoned

Chapter 5

“Pao. Ba’t para kang nakakita ng multo dyan?” nagtatakang tanong ni Nadine.

“Ha? Ah. E.” nauutal kong sabi. Mukhang hindi niya narinig yung sinigaw ni Carl.

“May problema ba?” tanong niya uli.

“Wala Nadz. Nagkwekwentuhan lang kami ni Paolo. Nagulat lang siya kasi bigla kang nagsalita.” Natatawang palusot ni Carl. Sarap batukan. Kung di niya sinigaw yun, di ako mukhang tanga ngayon.

“Ah. Kala ko kung ano na e.” nakangiting sabi ni Nadine.

“Ba’t ka naman nandito?” tanong ko sa kanya.

“Nakasalubong ko kasi si Miggy kanina sa hallway, pinapabigay niya ‘to. May klase pa daw kasi siya e. Kaya nandito ako.” Sabi niya sabay abot nung hawak niyang papel. “Sumali pala kayo dun sa band competition para sa college fiesta?”

“Oo. Yun naman yung matagal na naming pinagprapratiksan e.” sabi ko sabay kuha nung registration form.

“Excited na nga ako e.” nakangising sabi ni Carl. “Manonood ka naman diba Nadine?” tanong ni Carl sabay tingin sa akin. Pang-asar talaga.

“Syempre naman. Number 1 fan niyo ata ako.” Sabi niya sabay porma na nakapamaywang. “Gusto niyo gumawa pa ako ng placards e.”

“Wag na. Nakakahiya.” Sabat ko.

“Hay. Wag ka ngang KJ Paolo. At least may supporter tayo.” Kontra ni Carl. Nang-aasar talaga ‘tong mokong na ‘to e.

“Oo nga Pao! Pasalamat ka nga e magchi-cheer ako para sa inyo.” Second the motion ni Nadine. “Nga pala, anong ginawa niyo kanina sa Media Law?” tanong niya sabay upo sa tabi ko.

“Wala. Nag-lecture lang yung professor.” Sabi ko sabay tayo. “Sige Carl, una na’ko. Bukas na lang tayo pumili ng kanta para sa song entry.” Dagdag ko sabay kuha nung gitara.

“Ah. Sige. Sabihan ko na lang din si Miggy.” Sagot ni Carl. Umalis na’ko.

“Teka Pao! Sabay na tayo pauwi.” Humabol si Nadine.

Ngayon na lang uli ata kami nagkasabay sa pag-uwi. Madalas niya kasing kasabay yung barkada niya ngayong college o kaya yung Gian na yun naman ang kasabay niya. Naglakad lang kami papunta sa sakayan ng jeep. Tahimik lang siya habang naglalakad kami. Nakakapanibago.

“Ngayon na lang uli tayo nagkasabay sa pag-uwi.” Bigla niyang sabi.

“Busy ako e.” mayabang kong sagot. “Busy ka din sa barkada mo tsaka dun sa Gian na yun.”

“Di naman. Kayo nga, panay ang practice niyo nila Miggy.” Sagot niya.

“Kelangan naming magpractice araw-araw no. Bumuo pa kami ng banda kung di rin kami magprapractice tas sasali sa competition.”

“Pao. Sabihin mo, may nagugustuhan ka na ba sa school?” bigla niyang tanong. Natigilan ako sa tanong niya. Narinig niya kaya yung sinigaw ni Carl. Napatingin lang ako sa kanya. “Natigilan ka, ibig sabihin niyan meron.”

“Ano bang sinasabi mo? Ba’t ba tinatanong mo na naman yan?”

“Wala. Naisipan ko lang itanong. So ano? Meron no? Sa reaction mo kasi parang meron e.” pangungulit niya sabay siko sa tagiliran ko.