Boy Friendzoned

Chapter 39

“Titigil ka na talaga?” seryosong tanong ni Miggy habang tinotono yung hawak niyang gitara.

“Oo. Yun din naman yung gusto ni Nadine.” sagot ko sabay dampot nung isang gitara. Tiningnan lang ako ni Miggy.

“Grabe. Sa unang araw ng klase ka pa talaga nabasted.” sabat ni Carl na nakahilata sa sofa. “Ibig sabihin niyan ngayon di ka na magpapatuloy sa panliligaw ke Nadine?”

“Oo.” Tipid kong sagot.

“E pa’no yung pagiging magbest friend niyo?” tanong uli ni Carl. “Siguradong di yun agad mababalik sa dati pagkatapos nung nangyari.”

Napatingin kami ni Miggy ke Carl. Tama yung ungas e. Iniisip ko pang mababalik yung pagiging magbest friend namin ni Nadine pagkatapos nung nangyari kahapon. E sigurado namang mag-iiwasan lang kami.

“Kelan mo naman planong kausapin si Nadine pagkatapos nung nangyari Pao?” tanong ni Miggy. “Di mo naman siguro siya planong iwasan hanggang sa pag-graduate niyo sa college.”

“Di ko pa alam kung kelan ko siya kakausapin… tsaka wala akong planong iwasan siya.” sagot ko tas tinono ko na rin yung gitarang hawak ko.

“Ayos lang yan Pao. Napagdaan ko rin yan. Di nga lang siguro yung tulad ng sa’yo na sa best friend mo. Isipin mo na lang muna yung band contest natin. Di pwedeng sintunado yung vocalist dahil lang broken hearted siya e.” sabi ni Carl sabay bato ng chichirya sa’kin. “Ayos lang na malungkot ka pero wag kang magpapadala dyan.”

“Alam mo Carl, paminsan me nasasabi ka ring matino.” Pang-aasar ni Miggy ke Carl.

“Anong paminsan? Palage akong me nasasabing matino, di niyo lang ako pinapansin.” Hirit ni Carl sabay hilata uli sa sofa. Natawa naman kami ni Miggy sa sinabi ng mokong.

“Mabuti pa pag-usapan na lang muna natin yung tutugtugin natin dun sa band contest.” Sabi ni Miggy. “Di naman binago yung rules. Tulad pa rin nung huling contest. Ang isang idinagdag lang e dapat may original composition tayong tutugtugin.”

“Original composition?! Teka, yari tayo dyan! Walang nagsusulat ng kanta sa’ti— Hmmm…” biglang tigil ni Carl.

“Me naisip ka?” tanong ni Miggy.

“Hmm. May kilala akong pwede tumulong sa atin dyan sa original composition na yan.” Nakangising sabi ni Carl.

“O sige. Ikaw na’ng bahala sa original composition natin.” Sabi ni Miggy sabay tayo. “Mauna na’ko. Me klase pa ako. Pag-usapan na lang uli natin yan mamaya.”

“Sasabay na’ko Migz.” Dagdag ko tas bumalik na kami ni Miggy sa school.

“Medyo ayos ka na ba ngayon?” biglang tanong ni Miggy habang naglalakad kami pabalik sa school.

Tumango lang ako. “Salamat nga pala kahapon Migz.”

“Para saan? E wala naman akong ginawa.” Sagot niya. “Nga pala, wag ka masyadong magpapaapekto dyan sa nararamdaman mo ngayon. Masakit, oo pero lilipas din yan Pao. Tsaka, baka mag-alala nang husto yung kapatid mo. Tinext niya ‘ko kahapon kung ano raw’ng nangyari sa’yo.”

“Si Mitchie?”

“Oo. Kaya wag ka masyadong magmukmok sa kwarto mo para di kung anu-ano ang iniisip nung kapatid mong yun.” Sabi ni Miggy.