Boy Friendzoned

Chapter 20

“Ha?” sabi ni Mitchie. “Magde-date sila?”

“Oo.” Sagot ko sabay inom ng tubig.

“Grabe. Ang bilis nung karibal mo Kuya.” Sabi ni Mitchie habang inaayos yung mga papel na hawak niya. “Wag ka na babagal-bagal Kuya. Sige ka baka mapasagot na talaga nun si Ate Nadine.”

Tindi din makasuporta nitong kapatid ko e.

“Kaya nga nag-iisip na ako ng sarili kong pakulo e.” sabi ko.

“Good Kuya. E ano bang naisip mong strategy sa panliligaw kay Ate Nadine?” nakangiting tanong niya.

“Wala pa akong naiisip na strategy e.” Napakamot lang ako ng ulo. “Parang di rin naman kasi magiging effective ke Nadine kung makaisip man ako ng strategy.”

“Hay naku Kuya, wag ka ngang nega.” Sabi niya tas napatingin siya sa hawak niyang papel. “Alam ko na Kuya. Ba’t di ka gumawa ng love letter para kay Ate Nadine.” nakangisi niyang sabi.

“Love letter? Grabe, korni nun Mitch.”

“Corny? Ang cute tsaka nakakakilig kaya.” Katwiran niya.

“Psh. Tingin ko di effective na strategy yan pagdating ke Nadine.” sabat ko naman.

“Ba’t mo naman nasabi Kuya?” sabi niya nakataas ang isang kilay. “Kahit pala mag-best friend kayo Kuya, madami ka pang hindi alam kay Ate Nadine.”

“Hindi alam?” tanong ko na nakataas ang isang kilay. Ano bang ibig sabihin ng makulit na ‘to?

“Oo. Hindi mo kasi alam na mahilig si Ate Nadine sa mga mushy at old school na paraan ng panliligaw.”

Tiningnan ko lang siya. Da’ing alam nitong batang ‘to. Minsan tuloy napapaisip na ako kung wala pa ba talaga ‘tong boyfriend e.

“E ba’t di ko alam na mahilig siya sa mga ganyan.”

“Hindi mo alam kasi hindi niya sinabi sayo kasi alam niyang pagtatawanan mo lang siya.” sabi niya sabay paypay nung papel na hawak niya.

“Pa’no korni naman talaga Mitch.” Katwiran ko.

“Siguro corny siya kasi lalake ka, pero para sa aming mga babae Kuya, ang cute at sweet kaya nun. Alam mo kasi Kuya, the cornier, the better.” Sabi niya. “Kahit sino atang babae kikiligin kapag nakatanggap ng love letter, lalo na pag cute at creative yung pagkakagawa.”

“Cute at creative?” tanong ko. “Di ko talaga maiintindihan yang mga ganyang bagay Mitch.”

“Hay Kuya.” Sabi niya sabay buntong-hininga. “Cute at creative, tulad nito.” Sabi niya sabay abot nung hawak niya papel. “Tingnan mo yan, nilagyan niya ng message para dun sa pagbibigyan niya pero hindi lang basta message ang nilagay niya, sinulatan din niya ng lyrics ng kanta.”

Tiningnan ko yung papel. May message nga tas may nakalagay ding song lyrics. Kakaiba din mag-isip ng pakulo ‘tong gumawa nito e.

“San mo naman nakuha yan ha?” tanong ko sabay sauli nung papel.

“May nagbigay sa akin.” Nakangiti niyang sabi. “Ang cute nga e.”

“Cute ka dyan!” sabi ko sabay batok sa kanya. “Di ka pa pwedeng mag-boyfriend no!”