Boy Friendzoned

Chapter 19

Pakshet. Late na’ko sa usapan namin. Maggru-group study kasi kami ngayon kanila Nadine. Midterm exam na namin sa Lunes e. 9 am yung usapan namin na magkita kanila Nadine pero 9:45 na, nandito pa’ko sa bahay. Tagal kong nagising e.

“Ang tagal mo Pao ah.” Sabi ni Nadine habang binubuksan yung gate nila. “Magte-10:30 na o.”

“Sorry.” Sabi ko sabay pasok. “Tagal kong nagising e.”

“Oy Paolo, ngayon ka lang.” sabi ni Dave, kaklase namin habang binabanatan niya yung chichirya.

“Tagal nagising e.” sagot ko na lang sabay salampak sa sahig.

Mukhang mabuti na lang nga at na-late ako e, nagd-dvd lang yung mga loko-loko e. Di pa ata nagsisimula sa ‘group study’ kuno.

“Okay magsimula na tayo. Kumpleto na tayo e.” sabi ni Nadine sabay off nung TV. Tas umupo siya sa tabi ko.

“Okay.” Sagot naman nung mga mokong tas nilabas na nila yung mga notes nila.

“Pao. Papaturo uli ako sa Stat ha.” Sabi ni Nadine.

“Okay. Pero siguro naman na-gets mo na yung ibang formula.” Sabi ko sabay scan sa libro namin sa Stat. Tas napansin ko yung notes na ginawa ko para sa kanya. Kinuha ko yung notebook tas tiningnan ko.

Napansin ni Nadine na hawak ko yung notebook. “Akin na yan Pao.” Sabi niya sabay kuha nung notebook. “Baka bawiin mo e. Laking tulong kaya nito.”

Gay man pakinggan pero napangiti na lang ako sa sinabi niya. Sino bang di mapapangiti kapag na-appreciate nung taong gusto mo yung ginawa mo para sa kanya. Seryoso, kapag laging ganito si Nadine baka di ko kayanin. Baka mamatay ako sa sobrang tuwa. Loko lang Lord. Di pa’ko pwedeng mamatay, kelangan pa’kong sagutin ni Nadine e.

“Sige Pao. Magsimula na tayo.” Sabi niya sabay buklat nung notebook niya.

“Okay.” Sagot ko naman.

Nagsimula na din sa pag-aaral yung iba naming kaklase. Kami naman ni Nadine, busy sa Stat. Hirap talaga siya sa Stat e.

“Di ko pa rin makuha Pao.” Sabi ni Nadine na nakakunot ang noo. “Kuha ko naman ‘tong first part pero nawawala ako pag-abot na sa may gitna.” Dagdag niya sabay turo sa sinosolve niya.

“Akin na yung ballpen.” Sabi ko. “Ganito yan Nadz. Tingnan mo.” Dagdag ko tas ako yung nagpatuloy sa sinosolve niya. Seryoso naman siyang nakatingin sa pinagsusulat ko. “Gets mo na?”

Tiningnan niya yung sinolve ko. “Grabe Pao. Galing mo talaga sa numbers.”

“Madali lang naman yan kung binabasa mo yung mga example sa workbook.”

“Alam mo namang hindi ako mahilig magbasa e.” katwiran niya.

Napabuntong-hininga na lang ako tas nagpatuloy na lang ako sa pagbabasa ng notes ko sa Philo. Pinagpatuloy naman ni Nadine yung pagso-solve sa ibang problems. Tas maya-maya nagmerienda muna.

“Grabe kapagod mag-aral.” Sabi ni Jane, kaklase din namin, sabay subo ng Clover.

“Kung hindi lang delikado ang lagay ko sa Philo e.” sabat ni Mark sabay inat nung kamay niya sa mesa.

“Buti pa nga si Nadine e, inspired.” Pang-aasar ni Diane ke Nadine sabay siko. “Kamusta na si Gian ha?”

“O nga Nadz, sinagot mo na ba?” usisa ni Jane. Mga Mass Comm talaga e, hilig sa chismis.