Boy Friendzoned

Chapter 41

Nadine’s POV

“—adz, okay lang?” tanong ni Jane sabay tapik sa balikat ko. Napatingin naman ako sa kanya.

“Ah, oo. Sorry. Nag-iisip lang ako ng pwede nating maging topic para sa term paper natin sa Humanities.” Sagot ko sabay buklat nung encyclopedia sa harap ko.

“Hmm. Sure ka?” tanong uli ni Jane.

“Oo.” Nakangiti kong sagot. “Wag niyo lang akong pansinin. Kulang lang ako sa tulog kagabi kaya medyo wala ako sa sarili ngayon.”

“Okay sabi mo e.” sabi ni Jane. “Hay. Bukas na natin ‘to ipagpatuloy. Nakakapagod na e. Tsaka pinapauwi rin ako ng maaga ni Mama ngayon.”

“Ako rin e.” second the motion ni Diane habang inaayos yung gamit niya.

“Okay. Hihiramin ko na lang ‘tong book ng Humanities para ipapagpatuloy ko na lang sa bahay yung pagre-research pagkauwi ko.” sabi ko habang pinapasok yung mga gamit ko sa bag.

“Okay Nadz. Sige una na talaga ako sa inyo.” Sabi ni Jane sabay beso sa amin ni Diane tapos umalis na siya. Sumunod naman si Diane na umalis.

Dumiretso naman ako sa counter ng library para hiramin yung libro. Pagkatapos e dumiretso na ako sa sakayan ng jeep. Pasakay na sana ako sa jeep na pumara nung biglang tumunog yung cellphone ko.

“Hello? Ate? Pauwi na ako. Napatawag ka?”

“Hello, Nadz? Teka, wag ka munang umuwi. May ipapabili kasi ako sayo e.”

“Ipapabili? Okay, ano ba yan?”

“Naubos na kasi yung lotion ko tsaka yung cream ko para sa buhok. Alam mo naman yung brand nun diba? Daanan mo na lang sa Watsons sa mall.”

“Okay, okay pero babayaran mo ako ha. Allowance ko ‘tong ipambibili ko e.”

“Okay. Sige, thanks Nadz. Mwah!”

Sumakay na agad ako ng jeep na papunta sa mall. Mabuti na lang at maaga kami dinismiss ng prof namin ngayon. Pagkadating ko sa mall e dumiretso na agad ako sa Watsons tapos binili ko na yung mga pinabili ni Ate. Medyo maaga pa naman kaya nag-ikot-ikot muna ako sa mall tapos napatigil ako dun sa boutique na puno ng stuff toys. Ang cu-cute kasi nung mga stuff toy na minions e. Ibabalik ko na sana yung hawak kong stuff toy nung biglang may humawak din dun.

“Hindi mo ba ‘to bibilhin?” tanong nung babae sa may tabi ko na may hawak namang Rilakkuma na stuff toy sa kabilang kamay niya. Tiningnan ko naman siya. “Akin na lan—Ah. Nadine?”

Si Gwen. “Gwen.” Sabi ko sabay bitaw sa stuff toy na hawak niya na ngayon. “Sige, sayo na yan. Hindi ko naman yan bibilhin e.”

“Ah. Sigurado ka? May ibang design pa naman e.” Tumango lang ako tapos ngumiti. “Okay. Paborito mo rin pala ang minions?” tanong niya habang naglalakad papunta sa counter.

“Ah. Oo. Nacu-cute-an kasi ako sa kanila e.” sagot ko habang naglalakad din papunta sa counter.

“Hmmm.” Sabi niya habang binabayaran yung dalawang stuff toy. “Ah. May kasama ka ba?”

“Ah. Wala. Bakit?”

“Ganun ba.” Sagot niya tapos tinitigan niya ako sandali. “Hmm. Pwede ba kitang makausap sandali?”