خيانة رسمية

* الفصل الواحد و الثلاثون *

نزل على ، و دخل لؤي الاوضه عند شروق .....
شروق:جابلك كل حاجه ؟
لؤي:اها جابلى شنطتين فيهم كل حاجه
شروق:طيب كويس
لؤي:بس في حاجه غريبه قالهالى
شروق:ايه الحاجه دي يعني ؟!
لؤي:كلام غريب كده
شروق:ايوه قالك ايه يعني ؟؟؟
لؤي:قال ان ماما بعتالى معاه رساله
شروق:رساله ايه ؟!
لؤي:بتقولى خلى اختيارك ينفعك و مش هكلمك خلاص و مش عايزة اشوف وشك تانى
شروق:يا نهار ابيض .. طنط يارا تقول كده !
لؤي:اكيد هيثم مسخنها عليا اوى
شروق:ممكن .. طب هتعمل ايه ؟؟
لؤي:هروح لها و هصالحها و هفهما ان الحب مش بادينا و هقنعها انى مش هقدر اقعد عندها .. لازم افهم كمان اذا كان هيثم مسخنها عليا ولا لا و لازم هى كمان تفهم ان مابقاش ينفع انا و هيثم نقعد مع بعض في بيت واحد تانى
شروق:اعمل اللي يريحك .. بس المهم تخلى بالك من نفسك و من كلامك معاها
لؤي:ماتقلقيش .. انا هقوم بقى اخد شاور و اجى اللبس عشان اروح الصيدليه
شروق:تمام .. و انا هطلع هدومك احطهملك في الدولاب
لؤي:لالا ماتعمليش كده .. سبيهم في الشنطه طلعيلى الهدوم اللى هلبسها دلوقتي بس
شروق:ليه يعني !
لؤي:عشان مش كل شويه تشيلى و تحطي
شروق:و انا هشيل و احط ليه اصلا .. انا عايزة اظبطهملك عشان اما تعوز حاجه تلاقيها
لؤي:يا بنتى افهمى .. احنا كام يوم كده و هنروح الشقه بتاعتى
شروق:انهى شقه ؟؟
لؤي:شقتى اللى كنت هتجوز فيها رضوى
شروق:مممممم
لؤي:شروق دي مالهاش اى علاقه برضوى دي شقتى انا و بعدين مش هينفع يعني نقعد في شقه امك كتير .. احنا لازم نروح بيتنا الجديد و نبتدي حياه جديده
شروق:و ليه يعني ما هي هي في الحالتين ادينا قاعدين مع بعض كده
لؤي:انتى هبله !! انا قاعد معاكي هنا لحد ما نظبط الشقه هناك و نتجوز .. فاضل في الشقه حجات بسيطه و هتتشطب و هنجيب العفش و هنفرشها كلها و الشقه دي هتتقفل
شروق:انت قولت ايه ؟ هنتجوووز ؟؟
لؤي:ايوة طبعا امال هنعيش مع بعض بصفتنا لبعض ايه !
شروق:مش عارفه بس مكنتش متخيله انك هتقول اننا نتجوز
لؤي:لازم يا حبيبتى نتجوز
شروق:طب امتى يا لؤي ؟
لؤي:بالكتير كمان اسبوع .. اول ما الشقه تخلص هنكتب الكتاب .. بس للاسف مش هقدر اعملك فرح عشان ملناش حد يحضره
شروق:و مين قال انى عايزة فرح .. انا عيزاك انت
لؤي:و انا كلى ليكي .. يالا بقى جهزيلى الهدوم لحد ما اخرج من الحمام
شروق:اوك يا حبيبي .. دخل لؤي الحمام ياخد شاور و شروق حضرتله الهدوم و خرج من الحمام و لبس هدومه و قعد يتكلم مع شروق شويه ......
( روايات بسوم )
................................................................
عند رضوى في البيت .. قاعده رضوى و اسماء و قاعد معاهم كامل (ابو رضوى) بيتكلموا .....
كامل:يعني هي دى كده كل الحاجه ؟؟
اسماء:ايوة يا كامل انا جهزتهم كلهم عشان ميبقاش عايز مننا حاجه
كامل:تمام كده .. انا هروح اديلوا حاجته و يا دار ما دخلك شر اما بالنسبا لقلب بنتى اللى اتكسر .. فانا هفوض امرى لله فيه و هو يجيب لها حقها
اسماء:حسبي الله و نعم الوكيل فيه .. بس اوعى و انبي يا كامل تعمل مشاكل
كامل:انتى عارفه يا ام رضوى انى مش بتاع مشاكل .. و عتاب الندل اجتنابه
اسماء:صح كده .. الله ينور عليك
كامل:ساكته ليه يا رضوى ؟ رضوى
اسماء:يا رضووى
رضوى:هاا
اسماء:ابوكى بيكلمك يا حبيبتى
رضوى:نعم يا بابا
كامل:ساكته ليه و سرحانه في ايه ؟
رضوى:ولا حاجه يا بابا .. بس مش مصدقه اللى حصل
كامل:اجمدي يا رضوى .. اللى ميقدركيش ميستاهلكيش ولا يستاهل انك تفكرى فيه
رضوى:مش بفكر فيه يا بابا
كامل:امال بتفكرى في مين !!
رضوى:بفكر في صاحبتي اللى خانتني .. و مقدرتش العيش و الملح اللي بينا
اسماء:ربنا يجازيها و يديها على اد ضميرها
رضوى:بصت لمامتها بحزن و ماتكلمتش .. و فجأه موبايلها رن .....
( روايات بسوم )
كامل:مين بيتصل بيكي ؟؟
رضوى:ده هيثم
كامل:هيثم مين ؟
رضوى:هيثم يا بابا اخو لؤي
كامل:اها اها .. و بيتصل ليه ده عايز ايه ؟!
رضوى:معرفش .. ممكن بيطمن عليا
كامل:طب هاتيه انا هرد عليه
رضوى:اتفضل يا بابا .. اخد كامل الموبايل و رد ع طول ...
هيثم:ايوة يا رضوى
كامل:انا مش رضوى .. انا ابوها
هيثم:عم كامل .. ازيك يا عمى عامل ايه ؟
كامل:كويس .. ممكن اعرف عايزين ايه من بنتى تانى؟
رضوى و اسماء بصوا لبعض و رجعوا بصوا لكامل بانتباه ....
( روايات بسوم )
هيثم:اكيد حضرتك مش فاهم الموضوع .. و اكيد مفكر انى مثلا داريت على اللى عمله اخويا او ان حضرتك فاكر انك بتتعامل مع العيله كلها زى اى اب ما بيتعامل مع عيله خطيب بنته
كامل:اكيد ما ده الطبيعي
هيثم:بس المره دي الموضوع مختلف .. حضرتك المره دي هتتعامل مع شخص واحد مش عيله و كمان العيله دي معاك و مع موقفك ضد الشخص ده
كامل:ازاى يعني ؟ انا مش فاهم الكلام
هيثم:حضرتك ممكن تكون مش فاهم قصدي عشان حضرتك متعرفش البنت اللى خان لؤي رضوى معاها تبقى مين
كامل:عارف طبعا .. تبقى صاحبه رضوى .. صديقه عمرها
هيثم:دى اخر معلوماتك .. لكن اللي لسه متعرفهوش انها كانت خطيبتي .. يعني زى ما لؤي و شروق خانوا رضوى بنتك خانونى انا كمان
كامل:ايييه .. ايه الكلام ده ؟! عمرى ما عرفت ان شروق اتخطبت او مثلا جالى خبر ان اخو لؤي خطب
هيثم:فعلا .. بس كان في بنا ارتباط و كان في مشروع خطوبه و اليوم اللى اكتشفنا فيه اللى حصل انا كنت رايح لها البيت عشان انا و امى نكلم والدها و نحدد ميعاد الخطوبه
كامل:لا حول ولا قوه الا بالله .. حقيقي زعلتنى اوى يا ابنى
هيثم:كلنا زعلانين و مش مصدقين يا عمى
كامل:الله يكون في عونا كلنا .. بس مقولتليش كنت عايز ايه من رضوى .. في حاجه حصلت ولا ايه ؟؟
هيثم:لا الحمدلله مفيش حاجه .. انا بس كنت عايز اطمن عليها و كنت عايز اقولها ان لؤي بعت الولد اللى شغال عنده اللى اسمه على ده و معاه مراد المحامى الصبح بدرى و اخده كل حاجه تخصه من البيت عشان مش راجع البيت تانى
كامل:ازاى الكلام ده !
هيثم:ده اللى حصل .. و رضوى كانت قايله امبارح انها هتبعتله كل حاجته انهارده .. فكنت عايز اقولها لو هتبعتله حاجه متجيبوهاش ع البيت ودوها عنده في الصيدليه او عند شروق في البيت .. و يستحسن متبعتلوش حاجه اصلا لانه هياخد الحاجه دي يديها لشروق
كامل:ميخصنيش .. حاجته لازم تتبعتله ميلزمناش منه حاجه .. و كويس انك قولتلى موضوع انه ساب البيت ده .. انا كده هبعت العربيه اللى هتوديله الحاجه عنده علي الصيدليه و انا هبعتله مسدج من موبايلى الخاص .. و نبقى ريحنا دماغنا و زي ما دخلنا بالمعروف نبقى خرجنا بالمعروف
هيثم:تمام يا عمى اللى تشوفه .. و خلى بالك من رضوى و قولها اني بسلم عليها
كامل:الله يسلمك يا ابنى .. كتر خيرك
هيثم:ميرسي يا عمى .. تؤمرنى بأى حاجه تانيه ؟
كامل:الامر لله .. تسلم
هيثم:الله يسلمك .. مع السلامه
كامل:سلام
قفل كامل السكه و ادى الموبايل لرضوى و مسك موبايله يبعت منه مسدج .....
( روايات بسوم )
رضوى:هتعمل ايه يا بابا ؟؟ و هيثم قالك ايه ؟؟؟
كامل:زى ما سمعتى .. لؤي ساب البيت خالص و الظاهر انه هيفضل قاعد مع صاحبتك دي على طول .. و هيثم قالى ابعتله حاجته على الصيدليه او على بيت شروق لكن مش على بيت امه
رضوى:و حضرتك هتعمل ايه ؟
كامل:و انا نازل الشغل دلوقتي هقول للسواق اللى هيوديلوا الحاجه يروحله على الصيدليه على طول .. بس انا مش هروح مع السواق
رضوى:اومال ايه ؟
كامل:هبعتله مسدج على موبايله حالا
رضوى:هتبعت لمين مسدج ؟
كامل:للؤي
رضوى:هتقوله ايه فيها يا بابا ؟؟
كامل:هبعتها و اديهالك تقريها
رضوى:اوك يا بابا .. بس بلاش كلام جارح
كامل:اخرجى منها و متقلقيش
رضوى:حاضر
بعت كامل المسدج للؤي و ادي رضوى الموبايل عشان تقراها ......
اسماء:سمعيني معاكي يا رضوى
رضوى:احب اشكرك يا دكتور لؤي على الامانه اللى ادتهالك و ماعرفتش تحافظ عليها ولا تصونها .. و احب اشكرك على رجولتك و جدعنتك و ولائك لبنتى و وفائك و احترامك للبيت اللى دخلته .. ياريت ماتحاولش تكلم بنتى ابدآ لاى سبب مهما كان و بالنسبه لحاجاتك فهى هتوصلك بعربيه لحد باب صيدليتك و اظن شبكتك امبارح وصلتلك .. و ارجو منك تعتبر كل شئ انتهى و ماتفكرش ترد عليا بأى شئ مهما ان كان .....
( روايات بسوم )
كامل:اظن ماغلطش اهو باى كلمه
رضوى:تمام يا بابا
اسماء:الحمدلله على كل حال يا كامل .. قوم يالا روح على شغلك
كامل:ماشي .. خلى بالكوا من نفسيكوا
اسماء:متقلقش علينا
كامل:يالا سلام
اسماء و رضوى:سلام
نزل كامل و بلغ السواق يروح على الصيدليه و عطاله العنوان و فهمه هيعمل ايه و سابه و طلع على شغله .....
( روايات بسوم )
..................................................................
شروق:يالا بقى كفايه كلام .. و انزل على شغلك ولا انت من اولها كده بقى هتقعدلى في البيت
لؤي:هههههه يا سلام يا ستى
شروق:وحياة عبدالسلام يا سيدي
لؤي:انتى لحقتي تزهى منى بقى ولا ايه
شروق:ما اقدرش ازهق منك .. بس الطبيعي انك تباشر شغلك بنفسك
لؤي:حاضر اهو هنزل بس خلى بالك من نفسك
شروق:ماتقلقش عليا .. و انت ماتتأخرش
لؤي:مش هتأخر يا حبيبتي
شروق:اوك يا حبيبي .. تروح و ترجع بالسلامه
لؤي:الله يسلمك
باس راسها .. و طلعوا لحد باب الشقه و فتحت شروق الباب للؤي و طلع عشان ينزل ......
( روايات بسوم )
شروق:لؤي
لؤي:نعم
شروق:افتح موبايلك عشان ابقى اكلمك اما اعوزك و اطمن عليك
لؤي:بس ..
شروق:ما بسش يا لؤي .. انت بتهرب من مين يعني ! .. لو حد كلمك و مش عايز ترد عليه ماتردش .. بس مالهوش لزوم انك تقفل الموبايل .. افتح الموبايل عشان خاطرى
لؤي:حاضر هفتحه و امرى لله .. و فتحه
شروق:ماتقفلهوش يا لؤي
لؤي:حاضر و الله مش هقفله
شروق:بجد
لؤي:بجد .. ايه ده ؟؟؟
شروق:في ايه ؟
لؤي:بصي .....
.........................
#بسمه_ممدوح